Levitiku 11 - ICIGHAN BIBILO

¹ Tsô TER ôr kwagh a Mose man Aron, A kaa a ve er:

² Ôr nen kwagh a Mbaiserael ner: Ishôso i sha won cii, i né yaan i yô, ka i ne:

³ Hanma swase u u pav apande ahar dedoo, shi u kengese kwaghyan kpaa yô, ka u, yaan nen ye.

⁴ Kpa i i kengese kwaghyan man i i pav apande, i né yaan i ga yô, ka rakumi, gadia un kengese kwaghyan kpa a pav apande ga, a̱ lu ne kwagh u a lu wang ga yô.

⁵ Man ikuwa, gadia i kengese kwaghyan, kpa i pav apande ga, i̱ lu ne kwagh u a lu wang ga yô.

⁶ Man alôm, gadia un kengese kwaghyan, kpa a pav apande ga, a̱ lu ne kwagh u a lu wang ga yô.

⁷ Man igo kpaa, gadia i pav apande, a pav dedoo je, kpa i kengese kwaghyan ga, i̱ lu ne kwagh u a lu wang ga yô.

⁸ De ye nen inyam i i ga, mbende tsô kpaa, de benden nen a gundu u i ga, i̱ lu ne kwagh u a lu wang ga yô.

⁹ Akaa a shin mnger a né yaan di yô, ka hanma kwagh u shin mnger u a lu a tsaase kua avuu, á lu shin zegemnger shin á lu shin uifi, ka a yaan nen ye.

¹⁰ Akaa a a lu shin zegemnger man shin uifi, akaa a zenden shin mnger man akaauma cii a a lu shin mnger a a lu a tsaase kua avuu ga yô, a̱ lu ne kwagh u ndôhôrshima je.

¹¹ Een, a lu ne kwagh u ndôhôrshima, de ye nen inyam i a ga, agundu a a kpaa a̱ lu ne kwagh u ndôhôrshima.

¹² Hanma kwagh u shin mnger u a lu a tsaase man avuu ga yô, a̱ lu ne kwagh u ndôhôrshima je.

¹³ Man inyon i ia lu ne kwagh u ndôhôrshima, i yan i ga, i i lu kwagh ndôhôrshima yô, ka: iguve man gafa man iwaa;

¹⁴ man azembe, man tsoghor, anza la cii;

¹⁵ man gugôô, anza la cii;

¹⁶ man konkofi, man kpire man shimiu man kunkure, anza la cii;

¹⁷ man kaaki man ayaicambev man ivungu;

¹⁸ man akiki man akumedu man apu;

¹⁹ man ôô-ôô man ipevnor, anza la cii; man inyonalôm kua inima.

²⁰ Ankaam ma ma lu a ingur ma ma zenden sha angahar anyiin, ma̱ lu ne kwagh u ndôhôrshima.

²¹ Ankaam ma ma lu a ingur ma zenden sha angahar anyiin ma né yaan yô, ka ma ma̱ lu a agbeen a tsuwen mi yô;

²² a i rumun, u né yaan a yô, ka: ahungwa, anza la cii; man ahungwa u sha kon, anza la cii; man ahungwa u tsuwen, anza la cii; man uigu mbaahungwa, anza la cii.

²³ Kpa akaa agen cii a a lu a ingur man angahar anyiin yô, a̱ lu ne kwagh u ndôhôrshima je.

²⁴ Ka akaa a á na ne, né kera lu wang ga ne, anti or u nana bende a mô ve u a kpe yô, nana kera lu wang ga zan zan iyange ia kar been;

²⁵ anti or u nana tôô mô ve u a kpe yô, nana ôô akondo a nan, nana kera lu wang ga zan zan iyange ia kar been.

²⁶ Hanma inyam i i pav apande, a pav ahar dedoo ga, shi i kengese kpaa ga yô, i̱ lu ne kwagh u a lu u wang ga yô; hanma or u nana bende a i yô, nana kera lu wang ga.

²⁷ Ishôso i akevegh i zenden sha angahar a i anyiin la cii yô, i̱ lu ne kwagh u a lu u wang ga yô; anti or u nana bende a gundu u i yô, nana kera lu wang ga zan zan iyange ia kar been.

²⁸ Man u nan tee gundu u i la kpaa, nana̱ ôô akondo a nan, nana kera lu wang ga zan zan iyange ia kar been; i̱ lu ne akaa a a lu wang ga yô.

²⁹ Akaa a a kper a kpela inya a a̱ lu ne kwagh u wang ga yô, ka: ijuhyev man ihyev man mende, anza la cii;

³⁰ man adendem man huel man vange man ishondo man hum.

³¹ Ka akaa a a kper a kpela inya a a lu ne kwagh u wang ga, je ne; or u nana bende a a zum u a kpe la yô, nana kera lu wang ga zan zan iyange ia kar been.

³² Man shi hanma kwagh u mô ve u kpen, a gbe sha mi yô, una kera lu wang ga, shin a lu ikagh ki konough, shin akondo, shin ikôvough, shin iba; hanma ikagh ki i eren tom a ki cii, i̱ wa ki shin mnger kia lu wang ga zan zan iyange ia kar been, man kia wanger ye.

³³ Hanma ikagh ki inyaagh kpaa ki hanmô ve a gbe sha mi yô, hanma kwagh u a lu shimi cii, una kera lu wang ga; nahan hembe nen ki.

³⁴ Hanma kwaghyan u i we mngerem sha mi yô, una kera lu wang ga; man hanma kwaghman u á ma shin injaika shon kpaa una kera lu wang ga.

³⁵ Hanma kwagh u gundu ve una gba sha mi yô, una kera lu wang ga, shin a lu atse, shin a lu ityev mbi jiir kwagh mi kpaa, i̱ hembe kera, gadia ve kera lu wang ga je ve, ve̱ lu ne kwagh u wang ga.

³⁶ Nahan kpaa imbor kua ijôr henpe mngerem ma kohol yô, ia lu wang, kpa or u nana bende a gundu u a shin mi la yô, nana kera lu wang ga.

³⁷ Man aluer gundu ve una gba shin ivorkwagh i i ver sha ci u lôôn yô, ia lu wang.

³⁸ Kpa aluer i haa mngerem sha ivor la man gundu ve una gba shimi yô, ia lu ne kwagh u wang ga.

³⁹ Aluer hanma ilegh ki ne ye kpaa, kia kpe a kpe yô, or á bende a gundu u ki, nana kera lu wang ga zan zan iyange ia kar been.

⁴⁰ Or u nana ya gundu u ki, nana̱ ôô akondo a nan, nana kera lu wang ga zan zan iyange ia kar been; man u nan tee gundu u ki kpaa nana̱ ôô akondo a nan, nana kera lu wang ga, zan zan iyange ia kar been.

⁴¹ Inyarev mbi zenden hen inya iuu la, ka kwagh u ndôhôrshima je; i̱ de ye mbi ga.

⁴² Hanma kwagh u a kper iyav inya man hanma kwagh u a zenden sha angahar anyiin man hanma kwagh u lun a angahar kpishi kpaa, ka inyarev mbi zenden hen inya la cii, de ye nen ga, gadia ka akaa a ndôhôrshima je.

⁴³ De gem nen ayol a en hingir nen kwagh u ndôhôrshima sha hanma inyarev mbi zenden hen inya iuu la ga; man shi de hôngor nen ayol a en sha mbi ga, sha er de kera hingir nen wang ga, sha mbi ga.

⁴⁴ Gadia ka Mo M lu TER Aôndo wen; nahan tsegha nen ayol a en, lu nen uicighanmbaiorov je, gadia Mo M ngu icighan je; yô, de hôngor nen ayol a en sha inyarev mbi mbi kper a kpela inya ga.

⁴⁵ Gadia ka Mo TER u M dugh a ven ken tar u Igipiti sha u Me lu Aôndo wen yô; lu nen uicighanmbaiorov, gadia Mo kpaa M ngu icighan je.

⁴⁶ Ngun ka tindi u sha ishôso man sha inyon man sha hanma kwaghuma u a zenden shin mnger, man sha hanma kwagh u a zenden sha tar kpaa yô;

⁴⁷ sha er á pav kwagh u a lu wang ga kposo, a kwagh u a lu wang yô, man ishôso i i doo u yan kpaa, a i i doo u yan ga yô.