I Solomon 8 - ICIGHAN BIBILO

¹ Sarem er ma u lu er anngôm, u a me atumba a ngôm je yô! Mea kohol we ken won, me suse u zwa, man ma or nana laham kpaa ga.

² Ma m hemen we, ma m ve a we hen ya u ngôm, wen ma a tesem; ma m ne u wain u i nongo ilyôghonov sha mi, ma u me, zar u he u pomegraneti wam.

³ Uwegh nagh ku imesegh ku̱ lum shin ityou, man uwegh nagh ku yanegh ku̱ kuvem.

⁴ M ngu wan ne kwagh, ne ônkasev mba Yerusalem, ka nyi man ne kpoghol dooshima, man ka nyi ne nderen un er i lu a kuma un ga nahana?

⁵ Ka anti nan moughon shin ikôngo nan kende, nan suur sha u a doo nan ishima laa? Shin itinekon u apel m nder u, ka her je ngôu lu toghol iyav ou ye, ka her je un u a mar u la a lu toghol iyav ye.

⁶ Verem er kunya u i nger ikav sha mi sha ishima you man er kunya u i nger ikav sha mi sha uwegh ough kpaa; gadia dooshima taver er ku nahan; mgbegh u dooshima taver er Sheol nahan, myegh na ka myegh u usu je, nomborusu u TER je.

⁷ Mngerem ma kpishim kpaa maa fatyô u pirin dooshima ga, uifi kpaa vea fatyô u miren a na ga; aluer or nana na akaa a hen ya u nan cii sha u yamen dooshima yô, á laha nan doo doo je.

⁸ Se mba a anmgbian u kwase u kiriki, ngu a va atumba ga; tsô sé er a anngô wase shon nana, sha iyange i á va sôôr un laa?

⁹ Aluer una lu kpekpe yô, sé kumba igyar i azurfa sha mi, una lu hunda yô, sé hire un sha ikpande i sedar.

¹⁰ Mo m ngu kpekpe, atumba am kpaa nga er ugôgômbaayoughouv nahan. Zum la m hingir ken ashe na er or u nan zough a bem yô.

¹¹ Solomon lu a sule u wain hen Baal-hamon, a na u sha ikev i mbakuran; hanmô nana̱ va a agbenger a azurfa dubu sha ci u atam a u la.

¹² Sule wam u wain u u lu u wam je yô, ngum sha ishi; dubu ne ka u wou Solomon, man gema deri uhar ka u mba ve nengen sha atam a u yô.

¹³ We u u tem ken ishule la, akar a am a zende nga keghen ato sha imo you, mo kpaa ma m ongo i.

¹⁴ Za ayem, we u u doom ishima, lu er morya shin er gumashim nahan, sha iwo i lun a ilyôghonov la. Shin er gumashim nahan, sha iwo i lun a ilyôghonov la