I Solomon 4 - ICIGHAN BIBILO

¹ U doo ashe tsô, we u u doom ishima ne, een, u doo ashe; ashe ou nga er a atii nahan, ken ijime i ikondo you i yisan la; ice you ngi er ikpilaivo, i i hongo sha uwo u Gileadi yô.

² Anyi ou nga er ikumiyôngo i i tende i aive hegh, i i dugh shin ijiir i ôôn iyol, hanmô i lu a ônov uhar uhar yô, i mô i môm ngi tswen ga.

³ Ityumbuzwaagh you ngi er mou u nyian bong yô, zwa wou kpaa doo u kenger; a-ase a ou nga er pomegraneti u i pav un avegher ahar nahan ken ijime i ikondo you i yisan la.

⁴ Mon wou ngu er gôgôyou u Davidi u taven tsung, u i maa sha ci u ikav mbi utyav la nahan, henpe i har mbaakuvautya dubu yô, ka iperutya i anomaior cii je la.

⁵ Atumba a ou ahar nga er ônov mba ahinav uhar mba morya, mba ve ye toho ken atô u uimondon mba ityombov yô.

⁶ Zan zan iyange ia va ndôhôr, man mure kpaa una kar kera ve, me yem sha uwo u mire u human doon, man igungu u libano u human doon la.

⁷ U doo ashe tsembelee, we u u doo ishima ne; ma kwagh u vihin ngu sha iyol you ga.

⁸ Mough a mo imôngo sha Lebanon, kwasehe, mough a mo imôngo sha Lebanon. Hungwa sha ityough ki Awana, sha ityough ki Senir kua Hermon, sha ubar mba ubegha, sha iwo i mbaanyam la.

⁹ U ngohol mo ishima anngômkwase, kwasehe, u ngohol mo ishima sha mkenger u ashe ou kwa môm, sha gbaashaa môm u sha mon wou la.

¹⁰ Dooshima wou doo je, anngômkwase, kwasehe! Dooshima wou doo hemba wain je! ihuma i mkurem ou kpaa doo hemba hanma ilyôghonough cii!

¹¹ Zwa wou ngu nôndon zaryoughough, kwasehe, iyough ngi shin ijime i nombor wou kua atumba kpaa; ihuma i akondo a ou kpaa ngi er ihuma i Lebanon yô.

¹² Sule u i kase u igyar, kape anngômkwase, kwasehe a lu la; imbormnger i i kase i, man ijôr i i wuhe i.

¹³ Agbaa a ou ka ishule i ikon i pomegraneti a atam a mimi, imondon u henna, ikparen u nardu,

¹⁴ nardu man saferon, kalamu man shinamon a ikon i libano i human doon cii, mire man alou, a ilyôghonov mbi hemban cii.

¹⁵ Hwembemnger u ken ishule, ijôr i mngerem ma umam, man uikuwanmbamngerev mba senen sha Lebanon.

¹⁶ Nder, we ahumbe a ken imbusutarimese; va, we ahumbe a ken imbusutariyan; pever sha sule wam, ihuma i ilyôghonov mbi u i̱ samber ken won. U a doom ishima la, a̱ nyôr ken sule na, a̱ ya atam a u a dedoo la.