I Solomon 3 - ICIGHAN BIBILO

¹ Tugh, sha gambe wam, m ker un u a doom ishima la, m ker un, kpa m zua a na ga.

² Yô, me mough hegen, me zende ken gar, sha igbenda kua ityembe, me ker un u a doom ishima la; m ker un, kpa m zua a na ga.

³ Mbakuran mba ve zenden ken gar la, zua a mo. Ne shi nenge a un u a doom ishima la kpa?

⁴ M undu ve ca lu a gba ga, tsô m kohol un u a doom ishima la; m kôr un, m rumun u pasen un tuhwan ga, saa er m vande van a na hen ya u ngôm, ken iyou i u a marem yô.

⁵ M ngu wan ne kwagh, ne ônkasev mba Yerusalem; sha umorya man mbaashim mba ken toho, de kpoghol nen dooshima ga man shi de nderen nen un kpaa ga, saa á kuma un ve.

⁶ Ka unô ve moughon shin ikôngo ve kende er mtôm ma mnyim nahana? mgbough a ihuma i dedoo i mire kua i libano, kua vuwe u ilyôghonov mbi human doon mbi orkasua cii.

⁷ Nenge, ka gambe u Solomon je; ior mba ageev akunduatar kase un, ka ior mba ageev mba ken Iserael je.

⁸ Ve cii ve lu a sanker, ka mbafantyav doo doo je, hanmô a sanker u nan ikooso, sha ci u cian tugh.

⁹ Tor Solomon er ikônough ki torough nagh, ki tôôn un a mi, sha ikon i Lebanon.

¹⁰ A er mtuunum ma ki sha azurfa, ijime i ki lu sha zenaria, pe teman la lu nyian dindee, her atô u ki cii, i er ki sha hwe, lu iwua i sha dooshima i ônkasev mba Yerusalem.

¹¹ Due nen, ne ônkasev mba Shion, nenge nen tor Solomon, a tsar u sha ityou u ngô na kange un sha iyange i a er kwase la, sha iyange i iember na i ken ishima la.