I Solomon 2 - ICIGHAN BIBILO

¹ M ngu er ishohough ki Sharon, imondon i ityombo i shin ijande.

² Er imondon i ityombo i ken atô u usaa i lu nahan, kape u a doom ishima la a lu ken atô u ônkasev la.

³ Er kon u apel u lu ken ikon i ikôô nahan, kape u a doom ishima la a lu ken ônnomso la. M tema shin mure na, doom iyol kpekpe, atam a na nyohom ken zwa.

⁴ A nyôr a mo ken iyou i man wain, tuta u a tim sha a mo yô, ka dooshima.

⁵ Taver mo sha azen a atam a wain a ombor, i̱ kundum iyol sha uapel, gadia m hume sha dooshima.

⁶ Uwegh nagh ku imesegh ku̱ lum shin ityou, uwegh nagh ku yanegh ku̱ gema ku kuvem.

⁷ M ngu wan ne kwagh, ne ônkasev mba Yerusalem, sha umorya man mbaashim mba ken toho, de kpoghol nen dooshima ga, man shi de nderen nen un kpaa ga, saa á kuma un ve.

⁸ Ungwa! Wen u a doom ishima la! Ngula van la; ngu tsuwen sha iwo, ngu shimin sha agungu.

⁹ U a doom ishima la ngu er morya shin gumashim nahan; ngula! a til ken ijime i kpekpe wase, a gbirin ashe ken ahura, a meen a nengen her a-an a windou la!

¹⁰ U a doom ishima gba ôron kwagh, a kaa a mo er: Mough sha, we u u doom ishima ne, udoonashe wam, va ase.

¹¹ Gadia nenge ase, fam bee ve, ura tôndo tsembelee.

¹² Uimondon mba toho mba duen ken igbar sha tar; shighe u wan icam kuma ve, mba ungwan imo i atii ken tar wase.

¹³ Kon u tur ngu kagher atam a u, ikon i wain ngi kparen, ngi nan ihuma i i, i dedoo. Mough sha, we u u doom ishima ne, udoonashe wam, va ase.

¹⁴ Atii wam, u a lu ken kwevande, ken ijiir i yeren hen bowoogh, de m̱ nenge mlu wou, m̱ ungwa imo you, gadia imo you i dio, u wa doo kpekpe.

¹⁵ Kôr nen se atsôngo, atsôngo a kiriki angan a a vihin ishule i ikon i wain ne, gadia ishule yase i wain ngi kparen ave je.

¹⁶ U a doom ishima la, ka u wam je, mo kpaa m ngu u na; ngu kuran ilev nav henpe uimondon mba ityombo ve lu yô,

¹⁷ zan zan iyange ia ndôhôr man mure kpaa una kar kera ve. Hide, we u u doom ishima ne, hingir er morya nahan, shin er gumashim nahan sha iwo i i pav ahigha la.