Hosea 8 - ICIGHAN BIBILO

¹ Wa korough sha zwa. Bee iguve ngi shilin sha ya u TER; sha ci u ve vihi ikuryan Yam man ve per tindi Wam.

² Ve yilam er: Aôndo wam! Se Iserael, se fa U.

³ Iserael gbihi kwagh u dedoo kera; mbaihomov vea tôv un ityô.

⁴ Ve ver utor, kpa ka sha ishima Yam ga; ve ver mbatarev kpa ka sha mfe Wam ga; sha azurfa man zenaria ve la, ve er ieev vev sha u timin ayol a ve kera.

⁵ Wanbua wou ndôhôr ishima, Samaria; iyugh Yam yegh sha a ve; ka hanma shighe je vea hingir wan ga?

⁶ Gadia kwagh ne due ka ken Iserael; or u eren eev er un, ka aôndo ga; wanbua u Samaria la, á hembe un avur avur.

⁷ Gadia ve lôô ahumbe, vea gema á sunda hiar; asagher nga ga, kwagh u menden la kera ngu a mwem ga; aluer una we sam kpaa atôatyev ma a ye u.

⁸ I mena Iserael; hegen ve mba ken akuraior er ikagh ki or nan soo ki ga yô.

⁹ Gadia ve kôndo sha Ashiria, er jaki i toho i zenden tswen nahan; Eferaim kimbi inyaregh sha u zuan a mba un doo ve ishima yô.

¹⁰ Shin er ve kimbi akuraior agen inyaregh, nahan kpaa hegen Me kohol ve; vea hii u panden sha ci u ikav mbi yuhwan mbi tor u mbatarev a we ve la.

¹¹ Gadia Eferaim a seer a seer atse a nanden nagh sha mi sha u eren kwaghbo, a hingir un atse a eren kwaghbo sha mi.

¹² Shin er M nger un atindi a Am, a kuma dubu pue nahan kpaa, nga ve er kwagh u ve fe un ga nahan.

¹³ Mba sôngon iniav nan Mo, ka ve inyam tsô, mba ye i, doo TER a mbi ga; hegen yô, Una umbur iferkwagh ve man Una tsaha ve sha asorabo a ve, vea hide ken Igipiti.

¹⁴ Gadia Orgban u Iserael hungul un, a maa ayou a utor; Yuda maa agar kpishi a lun a ugir, kpa Me tindi usu ken agar a na, ua hia ayouautya a a.