Hosea 6 - ICIGHAN BIBILO

¹ Va sé hide nen hen TER; gadia ka Un A ande ye, shi Una wanger se; ka Un A gber avav ye, shi Una kange se a.

² Er ayange á kar kera ahar yô, Una na se uma; sha iyange i atar la Una mough a vese sha, nahan sé lu uma sha ishigh Nagh.

³ Yô, sé fa nen, sé nôngo nen tsung u fan TER; mdugh Na ka u kpee je, er m-av u use nahan: Una va hen vese er ura nahan, er ka ura u masetyô u haan mngerem inya yô.

⁴ Me er nana a we, we Eferaim? Me er nana a we, we Yuda? Gadia dooshima wen ngu er ka ibeenegh ki pepegh yô, man er avure a ka a ndoor kera fese yô.

⁵ Ka sha ci u nahan, M gber ve sha uprofeti ye; M wua ve sha mkaanem ma ken zwa Wam; ajiraôron a i ôr u yô, due fele er ka iwanger yô.

⁶ Gadia ka dooshima a sarem ye, ka nagh ga; man mfe u fan Aôndo kpaa hembam doon a iniav mbi nanden.

⁷ Kpa ve vihi ikuryan er Adam nahan; ka heera ve er a Mo dang ye.

⁸ Gileadi ka gar u mbaerenafer, a côvor sha awambe.

⁹ Man er ikum i mbanumungbenda ka ve yer ve kegh nahan, kape nongo u upristi kpaa ve woo ior sha gbenda u zan Shekem la; een, ve er kwagh u kunya.

¹⁰ M nenge a kwagh u ndôhôrshima ken ya u Iserael; Eferaim er idya ker, Iserael hôngor.

¹¹ We Yuda kpaa, i ver u iyange i sundan. Zum u Me due a ior Av ken kwar yô.