Hosea 14 - ICIGHAN BIBILO

¹ We, Iserael, hide hen TER, Aôndo wou; gadia u nôngo gbev sha ifer you.

² Tôô nen akaaôron ne, za nen a mi; hide nen hen TER; kaa nen a Na ner: De ifer ci ca cii, rumun kwagh u a lu u doon yô, nahan sé gema ityumbujôôv yase sé na nagh sha mi, sha ityough ki anomabua.

³ Ashiria una yima se ga; sé henda anyinya ga; man sé kera yila tom wase u aveegh ser: Aôndo wase, ga; gadia ka her a We ancôgholov ve zough a mhôônom ma zungwen ye.

⁴ Me wanger mhirjime ve, vea gba doon Mo ishima tsô; gadia iyugh Yam gema her a na kera;

⁵ Me hingir hen Iserael er avure nahan; una mondo er ityombo nahan, una ta amise a na er Lebanon nahan.

⁶ Una ta agbaa, dooashe na una hingir er kon u olev nahan, ihuma na kpaa er Lebanon nahan.

⁷ Mba ve tem shin mure na vea shi vea lôô alakema, vea kpar er kon u wain nahan; man iwuese i á wuese un ia lu er i wain u Lebanon nahan.

⁸ Eferaim: Ka nyi i shi i gbem a akombo? Ka Mo M ongo un shi M nengen sha a na kpaa; M ngu er kon u fer u lun shough shough nahan; ka her a Mo atam a ou a dugh ye.

⁹ Or u nan lu a kwaghfan yô, nana̱ ver ase ikav sha akaa ne; u nan lu a mfe yô, nana̱ fa a, gadia igbenda i TER ngi jighilii je, mbaperapera mba zenden sha i; kpa mbaperenatindi yô, mba nenge gbev sha i.