Hosea 11 - ICIGHAN BIBILO

¹ Zum u Iserael lu wanye yô, a doom ishima; ka ken Igipiti man M yila wan wam kpaa ye.

² Er i yila ve ngegh kpaa, ve hemba yemen a yem ca; ve na Ubaal nagh ku sôngon, man ve nande ieev mbi gban a gba nagh ku human doon.

³ Nahan kpaa ka Mo M tese Eferaim u zenden, M kôr ve sha ave Am, kpa ve kera fa er i lu Mo M wanger ve ga.

⁴ M urugh ve sha kor u or sha ikangenev mbi dooshima; M hingir ve er mbala mba ve kenden ve agbur sha azegher kera yô, man M ngurum M ver un kwaghyan.

⁵ Una hide ken tar u Igipiti; Ashiria una lu tor na, sha ci u ve venda u geman ishima yô.

⁶ Sanker una ta num sha agar a na, una vihi uishindan nav vea saa ishe, sha ci u mbamhen vev mba ve hen la.

⁷ Ior Av ver ishima u geman undun Mo, aluer i lu yilan ve Sha nahan kpaa, mô ve môm nan nôngo u moughon sha kpaa ga.

⁸ Me er nan man Me de u kera Eferaim, Me er nan man Me gbihi u Iserael? Me er nan man Me de u, u hingir er Adema nahana? Me er nan man Me gema u u hingir er Seboim nahana? Ishima gemam kimi, mhôônom kôrom tsung.

⁹ Me kera er sha mvihi u iyugh Yam ga, Me kera tim Eferaim ga, gadia Mo M ngu Aôndo je, M ngu or ga, Icighan her atô wou, Me kera va sha iyugh ga.

¹⁰ Vea zende a TER ityô; Una ta kume er begha nahan; gadia Una ta kume, tsô ônov mba nomso vea mough shin ityôtar vea va her a Na a akarkase iyol.

¹¹ Vea due ken Igipiti a akarkase iyol er annyon nahan, man er atii nahan ken tar u Ashiria; shi Me na ve vea tema ken uya vev, kape TER A kaa ne.

¹² Eferaim kasem sha mbaaie, ya u Iserael kpaa kasem sha icugh, man Yuda kpaa ar ave, kera wa Aôndo iko ga man U a lu Icighan u jighjigh la kpaa ga.