Hosea 10 - ICIGHAN BIBILO

¹ Iserael ka kon u wain u hômon gese gese, u umen atam a u; er a seer umen atam yô, kape a seer di u tan atse a nanden nagh sha mi; er tar na u ze hemen, u doo yô, kape a timen mtôm ma awenem ma doon ashe kpaa la.

² Asema nga ve ahar, hegen yô, vea ya ibo; Una hembe atse a ve a nanden nagh sha mi, Una vihi mtôm vem ma awenem kera.

³ Hegen vea kaa er: Se mba a tor ga; aluer se mba cian TER ga yô, tor yô, una wase se sha nyi?

⁴ Mba er akaaôron a gbilinigh, mba bumun sha aie, mba ye ikur; nahan ijirôron ia due er imendenev mbi bov mbi shin ahighasule nahan.

⁵ Ishima ngi nyian mbateman ken Samaria sha ci u wanbua u Bete-aven; gadia ior nav vea zungwen un, man upristi nav kpaa, mba ve lu ember un sha ci u icivir na la, vea zungwe, gadia i kar her a na kera.

⁶ Un iyol na kpaa á yem a mi ken Ashiria, á er tor Yarebi iwua a min; Eferaim una ya kunya, man Iserael una va ahenge sha mbamhen nav mba a hen la.

⁷ Á tim Samaria kera; tor na hingir er ka ishaleghkon u sha mnger nahan.

⁸ Ajiir a taven sha a Aven, ka isholibo i Iserael je la, á tim a kera; usaa man usagher vea mende sha atse a ve a nanden nagh sha mi la; vea kaa a iwo er: Cir nen se, man a agungu kpaa er: Kighir nen se.

⁹ We Iserael, u er kwaghbo hii sha ayange a Gibea la je— ka keregh ve til ye; nahan ityav mbi i nôngo a ônov mba iferev la mbia kohol ve ken Gibea gaa?

¹⁰ Zum u á kumam yô, Me tsaha ve; á kohol akuraior sha u tan num sha a ve, zum u á kange ve sha afer a ve ahar la.

¹¹ Eferaim ka tulebua u i tese un, doo un u shoghol iyiav; M tange mon na u doon ashe la. Me zer Eferaim ikyekye; Yuda una kpela ikyekye i kahan sule, Yakob una kpela ikyekye i hemben alôgh.

¹² Lôô nen perapera sha ci wen, sunda nen dooshima; kaha nen utsa enev, gadia shighe kuma u keren TER, zan zan Una va nôô perapera sha a ven er ka ura nahan.

¹³ Ne kaha kwaghbo ne sunda iferkwagh, ne ya atam a mbaaie; gadia u suur sha gbenda wou, ka sha mngee u ior ou mba ageev.

¹⁴ Nahan yô, ayôôso a utya aa mough a ior ou; á vihi ayouautya a ou cii kera, er Shaleman yan vihi Bete-arbel sha iyange i utya, ta ngô a ônov nav inya, her ve avur avur la nahan.

¹⁵ Kape Betel una er a ven sha ci u zegekwaghbo wen la; pepe dindee nahan kwagh u tor u Iserael una bee kera tsembelee.