Hosea 1 - ICIGHAN BIBILO

¹ Kwaghôron u TER u a va hen Hosea wan u Beeri, sha ayange a Ushia man Yotam man Ahashi man Hesekia, utor mba Yuda, man sha ayange a Yerobiam wan u Yoashi tor u Iserael.

² Zum u TER hii u ôron kwagh a Hosea yô, TER kaa a Hosea er: Za za er idyakwase man lu a ônov mba idyakwase kpaa, gadia tar ne ngu eren idya tsung undun TER.

³ Nahan a yem a za er Gomer wan u Dibelaim u kwase; a wa iyav, a mar wannomso.

⁴ Tsô TER kaa a na er: Ii un iti wer, Yesereel, gadia shi anshighe kpeghee tsô, Me or ya u Yehu iyev sha awambe a Yesereel la, Me er tartor u ya u Iserael ua kure.

⁵ Tsô sha iyange la Me kever ada u Iserael shin pev u Yesereel.

⁶ Shi a wa iyav, a mar wan u kwase. Nahan TER kaa a na er: Ii un iti wer, Lo-ruhama (i zungwe un mhôônom ga), gadia Me kera seer u zungwen ya u Iserael mhôônom sha u den ve ibo ve ga.

⁷ Kpa Me zungwe ya u Yuda mhôônom, Me yima ve sha er M lu TER, Aôndo ve yô; Me yima ve sha ada shin sha sanker shin sha ikav mbi utyav shin sha anyinya shin sha mbaanyinyav kpaa ga.

⁸ Er Lo-ruhama de atumba yô, a wa iyav a mar wan u nomso.

⁹ Nahan TER kaa er: Ii un iti wer Lo-ami (Ioravga); gadia ne mba ior Av ga, Mo kpaa Me lu Aôndo wen ga.

¹⁰ Nahan kpaa iyenge i ônov mba Iserael ia lu er waarawa u shin zegemnger, u i fetyô u karen u ga, shin u ôron u kpaa ga yô, tsô hen ijiir i i lu kaan a ve er: Ne mba nongoior Wam ga la, á gema á yila ve er: Ne mba ônov mba Aôndo u uma.

¹¹ Tsô ônov mba Yuda man ônov mba Iserael vea kohol imôngo, man vea ver or môm nana lu ityough sha a ve, vea due ken tar la; gadia iyange i Yesereel ia lu iyange i vesen je.