Hagai 1 - ICIGHAN BIBILO

¹ Sha inyom i sha uhar i tor Dariu, uwer u sha ataratar sha iyange i hiihii i uwer la, kwaghôron u TER va sha ikev i profeti Hagai hen Serubabel, wan u Shealtiel, gomna u Yuda, man hen zegepristi Yosua, wan u Yehosadaki, kaa er:

² TER u akum a Sha ngu kaan nahan er: Ior mban mba kaan er: Shighe ngu a kuma u maan iyou i TER ga.

³ Tsô kwaghôron u TER va sha ikev i profeti Hagai er:

⁴ Shin shighe kuma u ne ayol a en ne tsa ken ayou a en a i cir a ikpande sha yô, er iyou ne i gem i lu alôgh nahana?

⁵ Nahan yô, TER u akum a Sha ngu kaan nahan er: Ver ishima, nenge nen sha akaa a a lu tseren ne yô.

⁶ Ne lôô kpishi, kpa ne sunda kpeghee; ka ne ya kwagh kpa i kuma ne ga; ne haa akondo iyol, kpa i tsee ma or iyol ga; man or u nan eren tom sha tôndo kpaa, nan hee injar i nan ngohol la ken ikpa i peven.

⁷ TER u akum a Sha ngu kaan nahan er: Ver ishima, nenge nen sha akaa a a lu tseren ne yô.

⁸ Unde nen sha uwo, za tôô nen ikon, va maa nen iyou ne, Mo kpaa i̱ saan Mo iyol a i, M̱ zua a icivir, kape TER A kaa ne.

⁹ Ne ver ishima ner, kwagh á ngee, kpa nenge gema ngu kpeghee tsô; man zum u ne va a mi ken ya yô, M fehe un kera. Ka sha ci u nyi? Kape TER u akum a sha A kaa ne. Ka sha ci u iyou Yam hembe hingir alôgh, man ne gema ne lu zan ayem hanma or hen ya u nan yô.

¹⁰ Ka sha ci u nahan man Sha a de u gban avure sha a ven man tar kpaa u nyum iyiagh ki u ye.

¹¹ M yila icegh va sha tar man sha iwo, sha samuyia man sha wain, man sha mkure man sha hanma kwagh u a menden hen inya cii, man sha ior, man sha uile, man sha ityom i aveegh cii.

¹² Nahan Serubabel, wan u Shealtiel, man zegepristi Yosua wan u Yehosadaki kua asande a ior a a shi her cii la, ve wa imo i TER, Aôndo ve, iko kua akaaôron a profeti Hagai er TER, Aôndo ve, tindi un yô; ior kpaa cia sha ishigh ki TER.

¹³ Tsô Hagai ortyom u TER ôr ior loho u TER, a kaa er: M ngu a ven imôngo, kape TER A kaa ne.

¹⁴ Nahan TER kpoghol jijingi u Serubabel wan u Shealtiel, gomna u Yuda, man jijingi u zegepristi Yosua wan u Yehosadaki, man jijingi u asande a ior a a shi her la cii; nahan ve va sha u eren tom u iyou i TER u akum a Sha, Aôndo ve,

¹⁵ sha uwer u sha ataratar, ayange a u ikundu kar anyiin, sha inyom i sha uhar i tor Dariu la.