Habaku 3 - ICIGHAN BIBILO

¹ Msen u profeti Habaku, mba we un sha ikenge i Shigionoti:

² TERE, m ungwa ahura Wou, nahan cier mo iyol, TERE; shi nder tom Wou ken atô u anyom, na, i̱ fa u ken atô u anyom; ken iyugh kpaa umbur mhôônom ma zungwen.

³ Aôndo mough ken Teman va, u A lu Icighan la, mough sha uwo u Paran va. Sela. Iengem Na cir Usha, tar kpaa mgbough a iwuese Na.

⁴ Engem er iwanger i iyange nahan; iengem i haan vir vir ngi duen sha uwegh Nagh, ka ker i yer tahav Nav ye.

⁵ Bouange ngu zan Un sha hemen, angev mbu tseenyol dondo Un ijime.

⁶ A tile, A er tar tenger; A yenge, tsô akuraior sambe sha mcie, utsembaiwoov kpaa sar, uicôronmbaagunguv wa ityouv inya; igbenda Na ka i ngise je.

⁷ M nenge utenti mba Kushan ken ican; akondo a tenti a tar u Midian tenger.

⁸ Ishima vihi We a uifi, TERE? Ishima nyoon We a uifi? Shin U yuwe a zegemnger er U zende sha anyinya a Ou, sha akeke a Ou, a mhembe la?

⁹ Ada Wou hingir iyol gbilin; mbambum mba hen ikwe lu kwaghôron u dông. Sela. U pav tar sha uifi.

¹⁰ Iwo nenge a We, cier i iyol; mngerem ma zegeura kar; iv kaa imo i i, i kende ave a i sha.

¹¹ Iyange man uwer tile gir gir hen ijiir ve, sha iwanger i avaan a Ou er a lu zan la, man sha iwanger i iwange You i iengem la.

¹² U zende U kar hen tar sha kume, sha ishima i vihin You, U shoghol akuraior angahar sha ishima i nyoon.

¹³ U due sha ci u myom u ior Ou, sha ci u Un u i shigh Un mkurem la. U her ityough ki ya u ipila, U bugh imagh je, zan zan ar sha mon. Sela.

¹⁴ Ka sha udagi nav iyol na U kuma ityough ki mbautyav nav mba ve ve er hir nahan sha u samben mo la ye; ve ember je, er vea ya mbaatsanev ken myer nahan.

¹⁵ U ndyar zegemnger sha anyinya a Ou, ka tihi u mngerem ma vesen.

¹⁶ M ungwa, nahan ikav yav mbi ken atô zômon; sha ci u imo la, ityumbuzwaagh yam kunde; mhee nyôr ken akuhe am je, ikarikase gbidyem iyol hen pe m til la; nahan kpaa me lu ving me kegh iyange i ican sha u i̱ va sha ior mba ve nenge ityav a vese a akumautya la.

¹⁷ Shin er kon u tur ua kpar ga, man er ma atam aa lu sha ikon i wain ga, man atam a kon u olev aa lu ga; shin er ishule ia doo iyiagh ga, man iyôngo ia tim ken ityôr kera, man ibua kpaa ia kera lu ken atôr ga,

¹⁸ nahan kpaa, mo me ember ken TER, me ember ken Aôndo u myom wam.

¹⁹ AÔNDO, Ter, ka agee am, A gema angahar a am hingir er a ashim yô, a erem m zende sha ajir a am a taven sha. Ka sha ci u orhemen u mbawanatsam; mba koho mbaadiguve sha mi.