Habaku 2 - ICIGHAN BIBILO

¹ Me tile sha ijiir yam i kuran, me lu sha iyou i taven gôgônan, me kenger sha u me fa kwagh u Una kaam yô, man kwagh u me gema me kaa sha mhuna wam yô.

² TER gema kaa a mo er: Nger mpase la a̱ due wanger wanger, sha i kpande, sha er or nana karen kpaa, nana ôr yô.

³ Gadia mpase u sha mnenge ne ngu keghen shighe na, ngu zan fefa sha u kuren, una er aie ga; shin er una ngôôr kpaa, kegh un, gadia una va kpee, una bunde ga.

⁴ Nenge, ishima na manger, ngi ken a na vough ga; kpa orperapera yô, ka sha jighjigh u nan, u nan ne la, man nana lu uma ye.

⁵ Mimi je, wain ka kwagh u icughugh je; orimangeregh memen ga, hua na gba ikôr er Sheol nahan, ngu er ku nahan, kwagh kom un ga, a kohol akuraior cii sha ci na, man a ta ior ijuku her a na cii.

⁶ Mban cii vea ver ishor sha a na gaa, man vea wa un asôngo gaa, man injakwaghôron er: Kwagh á tser un u a kohol akaa a a lu a na ga ne— ka zan zan hanma shighe je?—man a kange ikav iyol sha akaa a ityungugh.

⁷ Mba vea nyuma u, vea mough sha fefa gaa, man mba vea ta u mciem iyol vea nder gaa, man ú kera hingir ve ishar gaa?

⁸ Sha ci u we u sar akuraior kpishi, ior mba ve shi her cii ve di kpaa vea sar u, sha ci u awambe a ior, man sha ci u ipila i i er tar man gar, man mbateman kimi cii.

⁹ Kwagh á tser un u a ye mtsera u bo sha ci u ya na, sha u una wa iya sha ijiir i taven sha je, sha u una war kwagh u bo yô,

¹⁰ U hen mhen u kunya sha ya wou, sha u ú tim ior kpishi, u vihi uma wou kera kpaa.

¹¹ Gadia iwen i ken kpekpe ia genger imo, man ihange i sha uha ia rumun.

¹² Kwagh á tser un u a maa gar sha awambe, man a taver garutya sha iferkwagh!

¹³ Yô, nenge, kera ka TER u akum a Sha A ne er ior ve eren tom u ican sha ci u usu, man akuraior ve vôr ayol a ve sha ci u gbilinkwagh ye gaa?

¹⁴ Gadia tar ua mgbough a mfe u iengem i TER, er mngerem ma ngee ma cir zegemnger nahan.

¹⁵ Kwagh á tser un u a ne orwanndor a na kwaghman, we u u nongo megh ough sha mi, man u ne un ihundugh kpaa, sha u ú nenge idyelegh ve yô!

¹⁶ U mgbough a kunya sha ityough ki icivir; yô, we kpaa ma, kunya wou a̱ hingir ken igbar; iyongo i sha uwegh ku yanegh ku TER, á gema a i hen a we, man kunya u ndôhôrshima ua cir icivir you.

¹⁷ Gadia ipila i i er Lebanon la ia cir u, man mtim u i tim inyamtoho la, una ta u mciem iyol— sha ci u awambe a ior man sha ci u ipila i i er tar, man gar, man mbateman kimi cii la.

¹⁸ Eev mbu gban a gba, mbu or nan gbe mbu la, mbu a inja sha nyi? man shi eev mbu haan, mbu mbu lu ortesen u aiegh la, or u nan gbe mbu la nan gem nan suur sha kwagh u nan gbe la, or ka nan gba ieev mbi gbiliniv mbi fan ityô u lamen ga!

¹⁹ Kwagh á tser un u a kaa a kon er: Nder; man a iwen i lamen ga er: Mough sha la, ia fatyô u pasen kwagh kpa? Nenge, i cir i zenaria man azurfa iyol, man iôôn ngi ken atô u i ciôn kpaa ga.

²⁰ Kpa TER ngu ken icighantempel Na; yô, tar cii u̱ huan ving sha ishigh Nagh.