Habaku 1 - ICIGHAN BIBILO

¹ Mkaanem ma Aôndo ma profeti Habaku nenge a min.

² TERE, ka nan je m yila, man We U kera ongom ga? M genger imo her a We mer: Ipila; kpa U rumun u yiman ga.

³ Ka sha ci u nyi U erem m nengen a iferkwagh man m kenger icana? Gadia mtim man ipila mbam sha ishi; numsuwen ngu, man ahendan gema mough.

⁴ Nahan yô, tindi kera ngu a agee ga, man ijirôron sha mimi kera due ken igbar ga; gadia mbaaferev kase mbaperapera tser, ka nahan man ijirôron i dugh mcinga ye.

⁵ Yô, nenge nen ken akuraior, ver nen asema, i̱ kpiligh ne iyol tsung je, gadia M ngu eren tom ugen ken ayange a en, u zum u á ôr ne u, né rumun u jighjigh ga yô.

⁶ Gadia nenge, Me mough a Mbakaldi, ikurior i nyoon ishima tsung, man i tsogh tso tsogh, i i zende sha igbanger i tar, sha u ngohol ajiir a teman a a lu a i ga yô.

⁷ Ka mbatan ihindi iyol man cier iyol kpaa; ijirôron ve man icivir ve gema due her ayol a ve.

⁸ Anyinya a ve wa kpaver hemba mbaanyam, a hemba vihin kwagh a ugbaseela mba aikighe; mbaanyinyav vev ngughum sha imanger, een, mbaanyinyav vev va ca je, ve purugh ve van er gafa u shirin sha kwagh u una ya yô.

⁹ Ve cii ve va sha u eren ipila, ve ver ishiv vev ken hemen sha gbashima, ve kuran mbakwarev er waarawa nahan.

¹⁰ Ve nahan utor tar, mbatarev kpaa ve lu ve kwagh u lahan kera; hanma iyou i utya i lu ve kwagh u lahan, gadia ve ta atihianyaagh ve ngohol.

¹¹ Nahan ve kar er ahumbe nahan ve yem ken hemen, ve hingir mbalun a ibo, ve mba agee a ve a lu aôndo ve la.

¹² We, U kera lu hiihii je ga, TERE, Aôndo wam, Icighan wama? Sé kpe ga. TERE, U va a ve sha ci u mtsaha, man We Vande, U ver ve sha u kôôm ior.

¹³ We u ashe Ou a lu wang je, a gande u kenger sha iferkwagh, man U fetyô u kenger sha kwaghbo ga, ka nyi U kenger sha mbamimiga man shi U gbe huan ving zum u orbo ka a mena or u nan hembe un perapera la nahana?

¹⁴ Nahan U gema ior hingir er ishu i shin zegemnger man er akaa a kper a kpela inya a a lu a ortaregh ga nahan.

¹⁵ Ve tsuwe ve cii sha tsuwe, ve kôr ve sha kper ve, man ve kohol ve shin kper ve; nahan doo ve ve ember yagh yagh.

¹⁶ Nahan ve na kper ve nagh, man ve nande kper ve kwaghhumandoon; gadia ka sha a na je, ci na a gbe ikev man kwaghyan na dumbur kpaa ye.

¹⁷ Nahan una nduur kper na, una timin akuraior gbem a mhôônom ga nahana?