Genese 9 - ICIGHAN BIBILO

¹ Tsô Aôndo ver Noa doo doo kua ônov nav cii; A kaa a ve er: Maren nen, seer nen a seer, man shi iv nen tar.

² Hanma inyam i sha tar cii hanma inyon i sha kpaa, né cier ve iyol, vea cia ne; hanma kwagh u a kper a kpela inya cii kua ishu i shin zegemnger cii, i wa ne sha ikev.

³ Hanma kwagh u tenger u a lu uma yô, una lu kwaghyan wen; M na ne ve cii, er lu M na ne akaamenden nahan.

⁴ Saa di inyam kua uma u i tsô, ka awambe a i je la, de ye nen ga.

⁵ Kpa awambe a en yô, Me or iyev i a kpee je, Me or i sha hanma inyam, sha or kpaa, orgen a orgen, Me or iyev i uma u or.

⁶ Or u nan hee awambe a or inya yô, shi ka sha ikev i or á haa di awambe a nan inya ye; gadia ka sha mlu u Aôndo je, A er or ye.

⁷ Ne kpaa, maren nen, seer nen a seer, samber nen sha tar, ngeen nen sha u.

⁸ Aôndo ôr kwagh a Noa kua ônov nav a na imôngo, kaa er:

⁹ Nenge, Mo yô, M ya ikur a ven kua tsombor wen u ken ijime yen kpaa,

¹⁰ man a hanma kwagh u uma u a lu a ven imôngo, mba ve dugh ken tso la cii, inja na yô, ka hanma inyam i sha won cii.

¹¹ M ya ikur a ven, á kera tim uuma sha won cii sha mngerem ma deemee ga; man shi mngerem ma deemee ma timin tar kpaa, maa kera lu ga.

¹² Shi Aôndo kaa er: Ingin ka ikav i ikuryan Yam a ven, man hanma kwagh u uma u a lu a ven imôngo, sha ikov ikov zan zan je:

¹³ M ver ikume Yam sha abeen Mer i̱ lu ikav i ikuryan Yam a tar.

¹⁴ Nahan zum u Me gba ura sha tar man á nenge ikume la sha u yô,

¹⁵ Mo kpaa, Me umbur ikuryan Yam a ven kua hanma injakwaghuma u uuma sha won cii; mngerem kpaa maa kera va deemee sha u timin uuma sha won cii ga.

¹⁶ Zum u ikume la ia lu sha abeen, Mo kpaa, Me nenge a i, Me umbur ikuryan i tsôron i Aôndo ya a hanma injakwaghuma i uuma sha won cii la.

¹⁷ Aôndo kaa a Noa er: Ingin ka ikav i ikuryan i m ya a uuma sha won cii je la.

¹⁸ Ônov mba Noa mba ve due ken tso la yô, lu Shem man Ham kua Yafeti. Ka Ham je a lu ter u Kanaan ye.

¹⁹ Mba utar mban ka ônov mba Noa; ka ve je ve na ior ve samber sha won cii ye.

²⁰ Noa hii tom u sule, a kaha sule u ikon i wain;

²¹ tsô a ma wain, a gba hunden, a yav ken tenti na idyelegh.

²² Ham, ter u Kanaan la, nenge idyelegh u ter na, nahan a za kaa anngôôv nav mba uhar mbala ken won.

²³ Tsô Shem man Yafeti tôô ikondo, ve hambe sha avande ve, ve uhar cii, ve gba zan ajimejime, ve za cir idyelegh u ter ve; ishiv vev yô, lu ken ijime, ve nenge idyelegh u ter ve ga.

²⁴ Tsô zuzu u wain been Noa ashe, va kaven kwagh u wan na u kiriki la a er un yô,

²⁵ akaa er: Ifan i̱ kôr Kanaan; a̱ hingir kpan u ikpan i anngôôv nav.

²⁶ Man a shi a kaa er: I̱ wuese TER, Aôndo u Shem; Kanaan yô, a̱ lu kpan na.

²⁷ Aôndo A̱ gbanger Yafeti tar, a̱ tema ken utenti mba Shem; Kanaan yô, a̱ lu kpan na.

²⁸ Er mngerem ma deemee bee kera yô, Noa shi tsa anyom deri utar man akunduahargber.

²⁹ Ayange a Noa cii yô, lu anyom deri utaankarunyiin man akunduahargber, man a kpe ye.