Genese 50 - ICIGHAN BIBILO

¹ Tsô Yosev ngurum sha ishigh ki ter na, gba vaan un susen un zwa.

² Man Yosev kaa a mbatomov nav mbatwerev la er, ve̱ shighe ter na icigh ki yangen mhee; mbatwerev mbala maa shighe Iserael icigh.

³ Kwagh la kuma ayange akunduahar je, gadia ka ape ayange a shighen icigh luun je la; Mbaigipiti kpaa vaa un ayange akunduatargber je.

⁴ Tsô ayange a vaan ku na nga kar yô, Yosev ôr kwagh a ya u Farao kaa er: Aluer a doo ne a mo yô, shi ôr nen kwagh sha ato a Farao, ner:

⁵ Terem erem m bum, a kaa er: Nenge, m ngu kpen; yô, ka ken uwar u m tim sha ci wam iyol yam ken tar u Kanaan la, ú iim ker ye. Nahan yô, shi de m̱ za keregh m̱ za ii terem, tsô me hide.

⁶ Farao kaa er: Za, za ii teru, er a er u u vande bumun nahan.

⁷ Tsô Yosev za sha u za iin ter na; mbatomov mba Farao kpaa za a na imôngo, ka mbavesen mba hen ya na je la, man mbavesen mba ken tar u Igipiti cii je la,

⁸ man mba hen ya u Yosev cii kua anngôôv nav man ior mba ter na kpaa; mase shin ônov vev mba kiriki, man ilev vev mbi kiriki kua ibua vev, ve undu ken tar u Goshen ye.

⁹ Akeke a anyinya kua mbaanyinyav kpaa za a na imôngo; lu ikumior ivesen je.

¹⁰ Mba va nyer hen vande u gbidyen alakema u Atadi u u lu yande Yordan la yô, ve vaa ku heregh tsung; a wa ayange ataankarahar a vaan ku u ter na.

¹¹ Zum u mba ve lu hen tar la, ka Mbakanaan je la, ve nenge ku zungwen sha vande u Atadi yô, ve kaa er: Ku u Mbaigipiti ve zungu ne, u vihi ve tsung je, ka nahan man i maa i yer ijiir la er Abel-miseraim ye, u a lu yande Yordan la.

¹² Ônov nav er er a kaa ve nahan vough;

¹³ gadia ônov nav tôô un za a na ken tar u Kanaan, ve za ii un ken bariwen u ken tiôntar u Makpela, tiôntar u a lu sha ishigh ki Mamre, u Aberaham yam a Eferon Orhiti, hingir ijiir na i waregh la.

¹⁴ Yosev iin ter na kera yô, a hide ken Igipiti, un man anngôôv nav, kua mba ve za a na imôngo cii sha u za iin ter na la.

¹⁵ Zum u anngôôv mba Yosev nenge ter ve kpe yô, ve kaa er: Alaghga Yosev una hingir iyongo a vese, una or se iyev sha kwaghbo u iyange se er un la cii.

¹⁶ Nahan ve tindi loho hen Yosev er: Er teru iyange lu a kpe ga la, a kaa nahan er:

¹⁷ Kaa nen Yosev nahan ner: Ma u shi de anngôôv ou ibo ve, man isholibo ve, gadia ve er u kwagh u bo; yô, shi de ibo i mbatomov mba Aôndo u teru la. Tsô Yosev vaa zum u ve ôr kwagh a na la.

¹⁸ Anngôôv nav kpaa ve za gure un sha ishi ve kaa er: Nenge, se mba ikpan you.

¹⁹ Yosev kaa a ve er: De cie nen ga, mo m hingir Aôndo shinii?

²⁰ Ne yô, kape iyange ne wa ishima a mo bogh je la, kpa Aôndo yô, lu a awashima u dedoo sha kwagh la, sha u Una yima ior kpishi er i lu nyian nahan.

²¹ Hegen yô, de cie nen ga, me koso ne kua ônov enev mba kiriki. Kape a sur ve asema, a ôr ve kwagh sha asema ve la.

²² Yosev lu ken Igipiti, un kua ior mba hen ya u ter na; man Yosev tsa sha won anyom deri man pue.

²³ Yosev nenge ônov mba Eferaim ikov itiar je; man ônov mba Makir, wan u Manase kpaa, i mar ve sha ikum i Yosev je.

²⁴ Tsô Yosev kaa a anngôôv nav er: M ngu kpen; Aôndo Una va sôr ne kpee je, Una due a ven ken tar ne, Una yem a ven ken tar u A bum er Una na Aberaham man Isaka man Yakob yô.

²⁵ Yosev er ônov mba Iserael ve bum, a kaa er: Aôndo Una va sôr ne mimi je, nahan tôô nen akuhe am heen kera, yem nen a mi.

²⁶ Tsô Yosev kpe; anyom a na lu deri man pue; ve shighe un icigh ki yangen mhee, ve wa un ken akwati ken Igipiti.