Genese 46 - ICIGHAN BIBILO

¹ Tsô Iserael mough a akaa a na cii, gba yemen, a va nyôr ken Bersheba, a na Aôndo u ter na Isaka nagh.

² Aôndo ôr kwagh a Iserael sha mbampase tugh. A yila er: Yakob! Yakob! A rumun er: Een.

³ A kaa er: Ka Mo Aôndo, Aôndo u teru, de cie u zan ken Igipiti ga, gadia Me gema u ú hingir ikurior i vesen keregh;

⁴ Me za a we ken tar u Igipiti imôngo, Me shi Me hide a we kpee je; Yosev una kusu u ashe.

⁵ Tsô Yakob mough hen Bersheba; ônov mba Iserael tôô ter ve Yakob kua ônov vev mba kiriki man kasev vev, sha akeke a Farao na er i̱ va tôô un a mi la.

⁶ Ve kura ilev vev man akaa a ve, a ve zua a mi ken tar u Kanaan yô, ve va nyôr ken Igipiti, Yakob a tsombor na cii;

⁷ ônov nav man ônov mba ônov nav a na imôngo man ônov nav mba kasev man ônov mba kasev mba ônov nav, tsombor na cii, a va nyôr a u ken Igipiti.

⁸ Ônov mba Iserael, mba ve va ken tar u Igipiti, Yakob a ônov nav, ati a ve yô, ka a ne: Waniunda u Yakob ka Ruben.

⁹ Ônov mba Ruben yô, ka: Hanoki man Palu man Heseron kua Karmi.

¹⁰ Ônov mba Shimeon yô ka: Yemuel man Yamin man Ohadi man Yakin man Sohar kua Shaul wan u Wankanaan la.

¹¹ Ônov mba Levi yô, ka: Gershon man Kohati man Merari.

¹² Ônov mba Yuda yô, ka: Er man Onan man Shela man Perese kua Sera; kpa Er man Onan yô, ve kpe ken tar u Kanaan. Ônov mba Perese yô, ka: Heseron kua Hamul.

¹³ Ônov mba Isakar yô, ka: Tola man Pua man Yobu kua Shimeron.

¹⁴ Ônov mba Sebulon yô, ka: Seredi man Elon kua Yakeleel.

¹⁵ Mban ka ônov mba Lea, mba a mar a Yakob hen Padan-aram je ne, kua Dina wan na u kwase; kohol ônov nav mba nomso kua mba kasev cii yô, lu iorov ikundugber kar utar.

¹⁶ Ônov mba Gadi yô, ka: Sefion man Hagi man Shuni man Esebon man Eri man Arodi kua Areli.

¹⁷ Ônov mba Asher yô, ka: Imna man Isheva man Ishevi man Beria, kua Sera anngô ve u kwase; ônov mba Beria ka: Heber kua Malkiel.

¹⁸ Mban ka ônov mba Selpa, u Laban na Lea wan na u kwase je ne; mban ka mba a mar a Yakob yô, ve lu iorov pue kar ataratar.

¹⁹ Ônov mba Rahel kwase u Yakob yô, ka: Yosev kua Benyamin.

²⁰ Yosev kpaa i mar un Manase man Eferaim ken tar u Igipiti, ka Asenati wan u Potifera pristi u On, mar un ve ye.

²¹ Ônov mba Benyamin yô, ka: Bela man Beker man Asebel man Gera man Naaman man Ehi man Rose man Mupim man Hupim kua Ardi.

²² Mban ka ônov mba Rahel a mar a Yakob je ne; ve cii, ve lu iorov pue kar unyiin.

²³ Ônov mba Dan yô, ka: Hushim.

²⁴ Ônov mba Nafetali yô, ka Yaheseel man Guni man Yeser man Shilem.

²⁵ Mban ka ônov mba Bila, u Laban na Rahel wan na u kwase je ne, a mar ve a Yakob; ve cii, ve lu iorov utaankaruhar.

²⁶ Ior mba ve za ken Igipiti a Yakob imôngo cii, mba ve dugh ken iyol na yô, wa kasev mba ônov mba Yakob ker ga yô, ve cii, ve lu iorov akunduatar kar ataratar;

²⁷ ônov mba Yosev mba i mar un ve ken Igipiti lu iorov uhar; nahan ior mba hen ya u Yakob mba ve va hen Igipiti yô, ve cii, ve lu akunduatargber.

²⁸ A tindi Yuda er a̱ vande hemen a̱ za hen Yosev sha u a̱ va kegh un gbenda ken Goshen yô; nahan ve va nyôr ken tar u Goshen je.

²⁹ Tsô Yosev zer ikyekye na sha anyinya, unde, yem za kegh ter na Iserael gbenda ken Goshen; tesen iyol na her a na yô, a kamber un ave sha mon a gba vaan un sha mon, vaa je shighe kar.

³⁰ Iserael gema kaa a Yosev er: Hegen yô, me gba kpen tsô, gadia m nenge ishigh you er u lu uma her je ve.

³¹ Tsô Yosev kaa a anngôôv nav man ior mba ter na, er: Me za, me za kaa Farao mer: Nenge, anngôôv av man ior mba terem mba ve lu ken tar u Kanaan, ve va kohol mo ve;

³² ka ior mba kuran ilev, kera je kpaa ve vande lun mbakuranilev, man ve va a ilev vev mbi kiriki kua ibua, man akaa a ve lu a mi cii.

³³ Aluer Farao una yila ne, una pine ne er: Ka nyi tom ne erene?

³⁴ Yô, kaa nen ner: Mbayev ou mba kor ilev, hii er se lu iyev je, zan za ainge, se a uter asev kpaa; sha u ne̱ tema ken tar u Goshen yô; gadia hanma orkuranilev nan ndôhôr Mbaigipiti ishima je.