Genese 45 - ICIGHAN BIBILO

¹ Zum la Yosev kera fatyô u wan ishima sha ishigh ki mba ve tile a na cii la ga, a genger imo, a kaa er: Karem a hanma or heen kera. Ma or kera tile a Yosev zum u a pase iyol na hen anngôôv nav la ga.

² Tsô a ngor mliam, a gba vaan genger genger; Mbaigipiti ungwa, kua mba hen ya u Farao kpaa.

³ Yosev kaa a anngôôv nav er: Ka mo Yosev je ne! Terem ngu uma hereghe? Kpa anngôôv nav kera fatyô u bughun zwa a na ga, gadia kondo ve iyol sha ishigh nagh gbong.

⁴ Yosev kaa a anngôôv nav er: Kporom nen her a mo yôô. Ve kporom. A kaa er: Ka mo Yosev anngô wen u lu ne tee ken Igipiti ne.

⁵ Kpa hegen yô, asema a̱ de vihin ne ga, shi i̱ de kera cier ne iyol er ne teem heen kpaa ga, gadia ka sha u yiman uma u ior, Aôndo A tindim er m̱ vande hemen a ven ye.

⁶ Gadia hegen ka anyom ahar a ijen i lu sha tar ne ne; mase shin anyom ataan a á kaha sule ga, shi á sunda kwagh kpaa ga yô.

⁷ Aôndo tindim er m̱ vande hemen a ven sha u né shi vor sha won, man sha u yiman ne sha myem u vesen.

⁸ Ka ne ne tindim m ve heen ga, kpa ka Aôndo je; A verem m̱ lu ter u Farao man orvesen u nengen sha ya na cii kpaa, man orkurantar u Igipiti cii.

⁹ Yem nen hen terem fefa, za kaa nen un, ner: Wan wou Yosev kaa er: Aôndo verem m hingir orvesen u nengen sha Igipiti cii, va va kohol mo, de ngôôr ga.

¹⁰ Ka ken tar u Goshen ú va tema, ú lu a mo ikua ikua ye, we a ônov ou man ônov mba ônov ou, man iyôngo kua ivo man abua a ou, man akaa a u lu a mi cii.

¹¹ Me koso u heregh, gadia anyom a ijen mase shin ataan; sha u ú de kera hingir oribanave ga yô, we a ônov ou kua mba ve lu mba ou cii.

¹² Nenge, ashe a en nga nengen, man ashe a idyondon wam Benyamin kpaa, ka zwa wam je u er kwagh a ven ye.

¹³ Man shi ôr nen terem icivir yam i ken Igipiti cii man akaa a ne nenge cii; va nen a terem heen fefa.

¹⁴ Tsô a kôr Benyamin ave sha mon, a gba vaan; Benyamin kpaa lu vaan un sha mon.

¹⁵ A suse anngôôv nav cii zwa, a lu kuven ve vaan; ken masetyô la anngôôv nav ôr kwagh a na.

¹⁶ Gwa u kwagh ne nyôr hen ya u Farao je, i kaa er: Anngôôv mba Yosev va; kwagh la doo Farao kua mbatomov nav cii.

¹⁷ Tsô Farao kaa a Yosev er: Kaa a anngôôv ou wer: Er nen nahan, kange nen ujaki enev ikav, mough yem nen ken tar u Kanaan,

¹⁸ za kua nen a ter wen man ior enev, va nen her a mo; me na ne veghertar u Igipiti u hemban doon, yaan nen ahôm a tar ne.

¹⁹ I na u zwa ve, kaa a ve wer: Tôô nen akeke ken tar u Igipiti sha ci u ônov enev mba kiriki man kasev enev kpaa, za kua nen a ter wen, va nen.

²⁰ Ishima i̱ de nyian ne sha mkogholom enem ga, gadia veghertar u Igipiti u hemban doon cii ka u wen je.

²¹ Ka ape ônov mba Iserael er la; Yosev na ve akeke, sha imo i Farao; a na ve kwaghyan u gbenda kpaa.

²² A na hanmô ve ikondo i sha iyange i ikaa, ser ser; kpa Benyamin yô, a na un agbenger a azurfa deri utar, man akondo a sha iyange i ikaa, ataan.

²³ Ter na kpaa, a tindi un a ujaki pue mba ve lu a ikav mbi akaa a dedoo a ken Igipiti man anmgbianajaki pue a a lu a ikav mbi alakema man bredi man kwaghyan u gbenda sha ci u ter na yô.

²⁴ Tsô a na anngôôv nav gbenda ve mough; a kaa a ve er: De hingir nen num sha gbenda ayol a en ga.

²⁵ Ve mough ken Igipiti, ve va ken tar u Kanaan hen ter ve Yakob,

²⁶ ve ôr un er: Yosev ngu uma her, ka un je a lu orkuran u tar u Igipiti ye. Nahan ishima hume un ken vanger, gadia a na ve jighjigh ga.

²⁷ Ve ôr un kwaghôron u Yosev a er ve la cii; man zum u a nenge akeke a Yosev tindi sha u va tôôn un a mi yô, jijingi u Yakob ter ve hide nder.

²⁸ Tsô Iserael kaa er: Kuma; wan wam Yosev ngu uma her; me za me za nenge a na er m lu a kpe ga ne.