Genese 44 - ICIGHAN BIBILO

¹ Tsô a kaa a or u nengen sha ya na er: Iv ior mban kwaghyan ken aba er vea fatyô u tôôn yô, wa inyaregh ki hanma or sha zwa u iba u nan.

² Gema wa iyongo yam i azurfa la sha zwaibaa u u masetyô la, kua inyaregh nagh ki alakema kpaa. A er er Yosev kaa un nahan.

³ Sev mbu hiin u wanger yô, i na ior mbala gbenda, ve a ujaki vev.

⁴ Tsô er ve due ken gar ve lu a gba ca ga je tsô, Yosev kaa a wanakiriki na u nengen un sha ya la er: Mough, zenda ior mban ijime; wea kohol ve yô, pine ve wer: Ka nyi ne or iyev i kwagh u dedoo sha ifer nahana?

⁵ Kera ka i je man terem a me kwagh a min shi a tsengeôron akaa min kpaa ye gaa? Ne er kwaghbo er ne er nahan yô.

⁶ Za kohol ve yô, a ôr ve akaa ne.

⁷ Ve gema ve kaa a na er: Ka nyi man terem a er imbakwagh ne nahan? Ikpan you ia fatyô u eren imbakwagh ne mayange je ga.

⁸ Nenge, inyaregh ki iyange se zua a mi sha ijôibaa yase la, se mough a mi ken tar u Kanaan je, se va na u, man á er nan man se ii azurfa shin zenaria ken ya u teru?

⁹ Kpan wou u á zua a mi her a nan la yô, nana kpe, se kpaa sé gema sé hingir ikpan i teru.

¹⁰ A kaa er: Ka sha mi, i̱ er sha imo yen la, un u á zua nan a mi la, nana hingir kpan wam; kpa ne mbagenev yô, né lu a ishô.

¹¹ Tsô hanmô ve shir iba u nan fese, sagh je.

¹² Tsô a gba keren, a hii hen u vesen la je zan zan za kighir hen u kiriki; i za zua a iyongo la ken iba u Benyamin.

¹³ Tsô ve gba anden akondo a ve, hanma or kange jaki u nan ve hide ken gar.

¹⁴ Yuda kua anngôôv nav ve va hen ya u Yosev, un hira lu her; ve gure inya sha ishigh nagh.

¹⁵ Yosev kaa a ve er: Ka nyi kwagh, ne er nahana? Ne kera fa er or er mo nahan nana fa kwagh la kpee gaa?

¹⁶ Yuda kaa er: Ka nyi je shi sé ôr a tereme? Sé kaa nana? Sé er nan man sé ôr ishô yasa? Ka Aôndo je A pase ifer i ikpan you ye; nenge, ikpan i terem ne, se kua un u i zough a iyongo sha ikev na ne.

¹⁷ Tsô a kaa er: Me fatyô u eren nahan mayange ga, or u i zough a iyongo la sha ikev i nan yô, ka nan nana hingir kpan wam ye; kpa ne yô, yem nen hen ter wen bem bem.

¹⁸ Tsô Yuda kporom her a na, kaa er: Ku terem, m ngu zamber we; de kpan wou, a̱ ôr kwagh sha ato a terem, de kera yugh a kpan wou ga; gadia u ngu je er Farao nahan.

¹⁹ Terem iyange pine ikpan na er: Ne mba a ter shin anngô kpa?

²⁰ Se kaa terem ser: Se mba a ter, a bee iyol, man wanyekwaor ngu her u i mar un tamen; anngô na yô, saa, ka un a mase shin hen ngô na ye, a doo ter na ishima tsô.

²¹ Tsô u kaa ikpan you wer: Va nen a na her a mo, m̱ nenge a na sha ashe am.

²² Se kpaa se kaa a terem ser: Wanakiriki la una fatyô u undun ter na ga; gadia una undu ter na yô, ter na una kpe.

²³ Kpa u kaa ikpan you wer: Aluer anngô wen u kiriki una va a ven imôngo ga yô, mayange né kera nenge ishigh yagh ga.

²⁴ Tsô zum u se za hen terem, wanakiriki wou la, se ôr un kwaghôron wou, terem.

²⁵ Ter wase kaa er: Shi za nen, za yam nen kwaghyan kpeghee.

²⁶ Se kaa ser: Se fatyô u zan ga. Aluer anngô wase la una lu a vese imôngo yô, sé za, gadia sé fatyô u gba za nengen ishigh ki or la ga, saa anngô wase u masetyô una lu a vese imôngo.

²⁷ Tsô terem, wanakiriki wou la, kaa a vese er: Ne fa er kwase wam a marem ônov uhar tsô yô;

²⁸ u môm undum, m kaa mer: Mimi je, kwagh kôr un, ande un javer javer. Mayange m kera nenge a na ga zan zan nyian;

²⁹ aluer né kuan mo a ngun kpaa, man kwagh una za tseren un yô, zum la né na ivu yam ia sen shin Sheol a ishima i vihin.

³⁰ Hegen yô, aluer me za hen terem wanakiriki wou, man wan ne una lu a vese ga yô, er ishima na cii i lu sha a na nahan,

³¹ aluer una nenge er wan ne a lu ga yô, una kpe keng; ikpan you ia na ivu i ter wase, wanakiriki wou ia sen shin Sheol a ishima i vihin.

³² Gadia kpan wou rumun a terem er una paa wan ne ityough, a kaa er: Aluer mea hide a na ga yô, me gba lun a ibo sha ishigh ki terem gbem tsô.

³³ Yô, shi rumun kpan wou a̱ lu kpan u terem sha ityough ki wan ne; wan ne a̱ yem a anngôôv nav imôngo.

³⁴ Gadia me er nan man me za hen terem, aluer wan ne una lu a mo imôngo ga yôô? Ma m nenge kwagh u bo u una tser terem la ga.