Genese 42 - ICIGHAN BIBILO

¹ Tsô Yakob ongo er i lu zuan a alakema ken Igipiti yô, a kaa a ônov nav er: Ka nyi ne gbe kenger ayol a en nahana?

² A kaa er: Nenge m ungwa mer alakema ngu ken Igipiti; yô, sen nen shimi, za yam nen alakema shin her sha ci wase, sha er sé lu uma sé kpe ga yô.

³ Tsô anngôôv mba Yosev pue za sha u za yamen alakema ken tar u Igipiti.

⁴ Kpa Yakob tindi Benyamin, idyondon u Yosev, a anngôôv nav imôngo ga; gadia a kaa er: Kwagh a̱ de kera za tseren un ga.

⁵ Nahan ônov mba Iserael kpaa, za va ken mbavan mbala, sha u va yamen alakema; gadia ijen lu ken tar u Kanaan.

⁶ Ka Yosev lu orkuran u tar la ye, man ka un kpaa a teen ior mba ken tar la cii alakema ye; tsô anngôôv mba Yosev va, va gure un inya, kuma ishigh inya.

⁷ Yosev nengen a anngôôv nav yô, a fa ve, kpa a er a ve er a fa ve ga yô a ôr kwagh a ve sha tswam, a pine ve er: Ne due hana? Ve kaa a na er: Ka ken tar u Kanaan se mough se ve ser, sé va yam kwaghyan ye.

⁸ Yosev fa anngôôv nav; kpa ve yô, ve fa un ga.

⁹ Tsô Yosev umbur mnyam ma ma cie un a ve la, a gema a kaa a ve er: Ne mba mbamkerev, ne va sha u va nengen ian i nyôron ken tar ne.

¹⁰ Ve kaa a na er: Ei, terem, ka kwaghyan u yamen ikpan you ne i ve ye.

¹¹ Se cii se mba ônov mba or môm; se mba ior mba mimi, se ikpan you, se mba mbamkerev ga.

¹² A kaa a ve er: Mayange ga, ne va sha u va nengen ian i nyôron ken tar ne.

¹³ Ve kaa er: Se ikpan you se mba anngôôv pue kar uhar, ônov mba or môm je, ken tar u Kanaan; u masetyô la ngu a ter wase hegen; u môm yô, ngu ga.

¹⁴ Yosev kaa a ve er: Ka kwagh u m kaa a ven je mer: Ne mba mbamkerev, la ga!

¹⁵ Ka sha kwagh ne man á kar ne ye: M bum uma u Farao je, né due heen ga, saa anngô wen u masetyô la una va heen ve.

¹⁶ Tindi nen or wen môm, nana̱ za va a anngô wen la; ne yô, hire lu nen uikangen, sha er á kar kwaghôron wen, shin ne mba a mimi jeo á lu nahan ga yô, m bum uma u Farao, mimi je ne mba mbamkerev.

¹⁷ Tsô a wuhe ve cii, ayange atar.

¹⁸ Sha iyange i sha utar la, Yosev kaa a ve er: Ka kwagh u né er, ve né lu uma ne; gadia mo m cie Aôndo:

¹⁹ Aluer nea lu ior mba mimi yô, á wuhe anngô wen môm ken iyou i i wuhu ne ker ne; kpa ne yô, tôô nen alakema yem nen a mi sha ci u ijen i hen uya enev,

²⁰ za va nen a anngô wen u kiriki her a mo; ka nahan man kwaghôron wen una lu mimi, ne kpaa, né kpe ga ye. Ka ape ve er je la.

²¹ Tsô ve kaa ayol a ve er: Mimi je, se mba a ibo sha kwagh u anngô wase, sha er se nenge ican i uma na, zum u a lu zamber a vese, kpa se wa iko ga la; ka nahan ican ne i hir sha a vese ye.

²² Ruben gema kaa a ve er: Yan m kaa a ven mer: De eren nen wanakiriki ne kwaghbo ga, kpa ne wa iko ga ga? Ka nahan man ike i awambe na ne i ker se ye.

²³ Ve fa er Yosev lu ungwan ga; gadia i lu eren ve tafinta.

²⁴ Tsô a kar hen ve kera, a gba za vaan; hidi hen ve yô, a ôr kwagh a ve, a kôr Shimeon ken ve, a kange un sha ashe ve.

²⁵ Tsô Yosev kaa er, i̱ iv aba a ve a alakema, i̱ hide a inyaregh ki hanma or ken iba u nan, i̱ na ve kwaghyan u gbenda kpaa; ka ape i er a ve je la.

²⁶ Ve kange ujaki vev alakema, tsô ve mough ve gba yemen.

²⁷ Ugen ken ve saghen iba na sha u una na jaki kwaghyan hen afo yô, a nenge inyaregh nagh; ki lu sha zwa u ibaa je!

²⁸ Tsô a kaa a anmgbianev nav er: I hidem a inyaregh yagh, kin ken iba wam ne; asema ta ve kwe, ve kenger ayol a ve, ve gba gbidyen akarkase iyol, kaan er: Ka nyi kwagh, Aôndo A er a vese nee?

²⁹ Mba va nyer hen ter ve Yakob ken tar u Kanaan yô, ve ôr un akaa a a tser ve cii, ve kaa er:

³⁰ Or la, ter u tar la, ôr kwagh a vese sha tswam, lu henen er se mba ior mba nengen tar la mker.

³¹ Kpa se kaa a na ser: Se mba mbamimi je, se mba mbamkerev ga;

³² se mba anngôôv pue kar uhar, ônov mba ter wase; u môm ngu ga, u kiriki ngu a ter wase hegen ken tar u Kanaan.

³³ Tsô or la, ter u tar la, kaa a vese er: Ka kwagh u ne fa er ne lu ior mba mimi ne: undu nen anngô wen a mo heen, tôô nen alakema sha ci u ijen i hen uya enev, gba yemen nen tsô;

³⁴ za va nen a anngô wen u kiriki hen mo; nahan me fa er ne lu mbamkerev ga, kpa ne lu ior mba mimi yô; nahan me na ne anngô wen, man né lu a ian i zenden kasua ken tar ne ye.

³⁵ Tsô er ve lu haan sam u ken aba ve yô, nenge, ikaghnyar i hanmô ve lu hen iba u nan; zum u ve, kua ter ve, ve nenge akaghanyar a ve la yô, cier ve iyol.

³⁶ Tsô Yakob ter ve, kaa a ve er: Ne sarem ya ve; Yosev ngu ga, Shimeon kpaa ngu ga, man ka ne pe kuan a Benyamin kpaa; kwagh tserem ve!

³⁷ Ruben ôr kwagh a ter na, kaa er: Aluer mea hide a na hen a we ga yô, wua ônov av mba uhar; wa un sha ikev yam, mo me hide a na her a we.

³⁸ A kaa er: Wan wam una za a ven imôngo ga; gadia anngô na kpe, mase shin un tswen; aluer kwagh á za tser un sha gbenda u né ze la yô, zum la né na ivu yam ia sen shin Sheol a ishima i vihin.