Genese 41 - ICIGHAN BIBILO

¹ Anyom nga kar ahar vough yô, mnyam cie Farao er un tile hen kpe u ifi u Nil;

² nenge, abua ataankarahar due shin ifi u Nil, a dedoo, a kehen, lu yan awoo.

³ Ken masejime, abua agen ataankarahar due shin ifi u Nil vihi ashe, kande, va tile a abua agen la hen kpe u ifi u Nil.

⁴ Abua a vihin ashe a kanden la gema ya abua a ataankarahar a dedoo a kehen la. Tsô Farao nder.

⁵ Shi hidi yaven yô mnyam kimbir cien un; tsô nenge, asagher a alakema ataankarahar due sha itine i môm, wa asange king king, doo u nengen.

⁶ Ken masejime asagher agen shi due ataankarahar a lun tsaasaa, ahumbe a sha ityoughkitaregh va ta sha mi, uma a kera.

⁷ Asagher a tsaasaa la gema mena asagher a ataankarahar a dedoo a wan king king la. Farao nderen yô, gema lu mnyam ma cien tsô.

⁸ Tsô sev mbu aven yô, hingir un ken ishima hang; a tindi er i̱ za yila mbaahiriv mba Igipiti kua mbafankwagh cii, ve̱ va; tsô Farao ôr ve mnyam nam; kpa mô ve môm u pasen Farao ma, lu ga.

⁹ Tsô orvesen u mbatoonkwaghman gema ôr kwagh a Farao kaa er: Nyian ne, m umbur asorabo am;

¹⁰ yan Farao yuwe a mbatomov nav, verem uikangen ken ya u tor u adugwer, mo kua orvesen u mbakaanbredi;

¹¹ hen tugh môm je mnyam cie se, mo kua un; hanmô wase mnyam ma nan lu a mpase u ma je.

¹² Wanye u Heberu lu a vese ker imôngo, lu wanakiriki u tor u adugwer; se ôr un ma, nahan a pase se mnyam asem; hanma or a pase nan inja i mnyam ma nan.

¹³ Tsô er a pase se yô, maa er di sha mi nahan vough; mo i hide a mo ken tom wam; wen yô, i sende un sha kon.

¹⁴ Tsô Farao tindi er i̱ za yila Yosev; nahan i dugh un ken gaadi fese je; a hondo ishigh, a musan akondo a na, a va nyôr hen Farao.

¹⁵ Farao kaa a Yosev er: Mnyam ciem, man or u pasen ma, nan ngu ga; man m ungwa mba teren we er, aluer u ungwa mnyam yô, u fa u pasen ma.

¹⁶ Yosev gema kaa a Farao er: Mo ga: Aôndo Una na imo sha u i̱ kpe Farao iyol yô.

¹⁷ Farao kaa a Yosev er: Ken mnyam am yô, m tile hen kpe u ifi u Nil,

¹⁸ tsô nenge, abua ataankarahar due shin ifi u Nil, a kehen, doo u nengen, lu yam awoo.

¹⁹ Ken masejime abua agen ataankarahar shi due gengaa, vihi ashe tsung, kande kpishi, imba i ken tar u Igipiti cii, m lu a vande nengen a mi vihin nahan ga yô;

²⁰ abua a kanden a vihin ashe la gema ya abua a ataankarahar a hiihii a kehen la,

²¹ haa shin uya, nahan kpaa, u fa wer nga a shin uya mayange ga, gadia a vihi ashe heregh tsô, er ashen nahan. Tsô m nder.

²² Shi ken mnyam am kpaa, m nenge asagher ataankarahar, due sha itine i môm wa king king, doo u nengen;

²³ ken masejime asagher agen shi due ataankarahar tsuasaa, shi lu tsaasaa, ahumbe a sha ityoughkitaregh va ta sha mi, uma a kera.

²⁴ Asagher a tsaasaa la mena asagher a ataankarahar a doon la; m gema m ôr mbaahiriv ma, kpa mô ve môm fatyô u pasen mo ma ga.

²⁵ Yosev kaa a Farao er: Mnyam ma Farao ma inja i môm tsô; ka kwagh u Aôndo A we ishima u eren, man A pasen Farao ye.

²⁶ Abua a dedoo a ataankarahar la, ka anyom ataankarahar je la; asagher a alakema a ataankarahar a dedoo la kpaa, ka anyom ataankarahar je la; mnyam man ma inja i môm tsô.

²⁷ Abua a ataankarahar a kanden man a vihin a a dugh ken ijime i a la, ka anyom ataankarahar je la, man shi asagher a ataankarahar a tsaasaa a ahumbe a sha ityoughkitaregh a ta sha a uma a kera la, á lu anyom ataankarahar a ijen je la.

²⁸ Ka kwagh u m kaa Farao je la mer: Kwagh u Aôndo A we ishima u eren yô, A pase Farao.

²⁹ Nenge, anyom ataankarahar nga van a iyiav mbia ngee ken tar u Igipiti cii yô;

³⁰ ken masejime la, anyom ataankarahar a ijen aa dondo, imbayia la cii ia hungul ken tar u Igipiti, ijen ia vihi tar cii;

³¹ fan a fa tsô kpaa, á kera fa er iyange iyiav lu ken tar ne ga, sha ci u ijen i ia gba la, gadia ia taver kpishi.

³² Er i kimbir Farao mnyam mara kwa har yô, ka sha ci u Aôndo A we ishima er Una er kwagh la kpee je yô, man Una er fefa kpaa.

³³ Yô, Farao a̱ ker or u tsôngon ishima u fan kwagh, a̱ ver nan sha tar u Igipiti.

³⁴ Farao a̱ er kwagh ne: a̱ ver mbanengen sha tar ne, a̱ tsuwa tihi môm ken atihi a ataankarahar a iyiav mbi dumbur ne.

³⁵ Shi ve̱ kohol akaayan cii, ken anyom a dedoo a a ve ne, ve̱ ombo iyiav sha imo i Farao, mbi̱ lu kwaghyan ken agar, ve̱ kura mbi kpaa.

³⁶ Kwaghyan la, á koso un sha ci u tar ne, sha ci u anyom a ataankarahar a ijen ia va gba ken tar u Igipiti la, sha u tar u̱ de timin sha ijen ga yô.

³⁷ Kwagh la doo Farao kua mbatomov nav cii.

³⁸ Farao kaa a mbatomov nav er: Se fatyô u zuan a or u Jijingi u Aôndo A lu ken a nan er or ne nahan kpa?

³⁹ Farao gema kaa a Yosev er: Er Aôndo A tese u akaa ne cii, nahan yô, ma or u tsôngon ishima fan kwagh er we nahan ngu ga;

⁴⁰ ka we, ya wam una lu sha ikev you ye, ka sha imo you kpaa, man ior av cii vea zaan ye; ka sha ikônough ki torough tsô, me hemba u min ye.

⁴¹ Farao kaa a Yosev er: Nenge, m ver u sha tar u Igipiti cii.

⁴² Tsô Farao tsuwa kunya na ken uwe, u i ver ikav sha mi la, wa Yosev ken uwe, a haa un akondo a dedoo a pupuu iyol, shi a har un shirigh ku zenaria sha mon kpaa;

⁴³ a penda un sha ikyekye i anyinya na, i sha uhar la; ve gba yôôn zan un sha hemen er: Haa nen inya! Kape a ver un sha tar u Igipiti cii la.

⁴⁴ Shi Farao kaa a Yosev er: Ka mo Farao; ken tar u Igipiti cii, ma or nana kende uwegh ku nan shin nguhar u nan ga, saa sha imo you.

⁴⁵ Farao gema ii Yosev iti er Safenati-panea; man shi a na un Asenati wan u Potifera, pristi u On, a er. Tsô Yosev mough gba zenden ken tar u Igipiti.

⁴⁶ Anyom a Yosev lu ikundugber zum u a tile sha ishigh ki Farao tor u Igipiti la. Yosev mough hen Farao, gba zenden ken tar u Igipiti cii.

⁴⁷ Ken anyom a ataankarahar a iyiagh dumbur la, ishule doo iyiagh ishima i môm.

⁴⁸ A kohol kwaghyan u ken anyom a ataankarahar la, u ken tar u Igipiti cii, a ombo kwaghyan ken agar; kwaghyan ken sule u u kase u ningir gar yô, a ombo un ker.

⁴⁹ Yosev koso samuyia er waarawa u zegemnger nahan, ngee je i de u ôron iyenge, gadia gande u ôron.

⁵⁰ Yosev mar ônov mba nomso uhar er inyom i ijen lu a va ga la, ka mba a mar a Asenati wan u Potifera, pristi u On, la.

⁵¹ Yosev ii u iunda la iti er Manase, gadia a kaa er: Aôndo na m hungul ican yam cii kua ya u terem cii kpaa.

⁵² Idyondon la, a ii un iti er Eferaim; gadia a kaa er: Aôndo nam, m mar ônov ken tar u ican yam.

⁵³ Tsô anyom a ataankarahar a iyiagh dumbur ken tar u Igipiti la, bee kera.

⁵⁴ Anyom a ataankarahar a ijen hii, er Yosev lu kaa yô; ijen gba sha ityar cii; kpa ken tar u Igipiti cii yô, kwaghyan lu han han kpaa.

⁵⁵ Zum u ijen kôr tsung sha tar u Igipiti cii yô, ior vaa kwaghyan a Farao; nahan Farao kaa a Mbaigipiti er: Za nen hen Yosev, kwagh u una kaa ne yô, er nen.

⁵⁶ Ijen lu sha won cii; Yosev bugh iuna cii, gba teen, Mbaigipiti yamen; ijen kôr ken tar u Igipiti taveraa.

⁵⁷ Tar cii gba van ken Igipiti hen Yosev sha u va yamen kwaghyan; gadia ijen kôr sha won cii.