Genese 40 - ICIGHAN BIBILO

¹ Tsô ken masetyô u akaa ne yô, ortoonkwaghman u tor u Igipiti man orkaanbredi na, ve er ter ve, tor u Igipiti kwaghbo.

² Ishima vihi Farao a mbavesen mba ken ya na mba uhar mbala, ka orvesen u mbatoonkwaghman man orvesen u mbakaanbredi.

³ Tsô a wa ve ken uikangen ken ya u tor u adugwer, ken gaadi her ape i wuhe Yosev la.

⁴ Un tor u adugwer la, wa ve sha ikev i Yosev er a̱ wasen ve; ve lu ken uikangen ayange kar.

⁵ Ve uhar cii mnyam cie ve tugh môm, hanma or lu a mnyam ma nan, hanma or mpase u mnyam ma nan shi lu kposo je; un ortoonkwaghman man orkaanbredi u tor u Igipiti la kpaa, ve mba i wuhe ve ken gaadi la.

⁶ Yosev za nyôr hen a ve pepe yô, a nenge ve gba teman zuduu.

⁷ A pine mbavesen mba ken ya u Farao mba i wuhe ve a na imôngo ken ya u ter na la er: Ka nyi ne lu ishiv nyian gbuu nahana?

⁸ Ve kaa a na er: Mnyam cie se, man or u pasen se ma, nan ngu ga. Yosev kaa a ve er: Ka Aôndo A lu a mpase ye gaa? Ôrom nen ma yôô.

⁹ Tsô orvesen u mbatoonkwaghman la, ôr Yosev mnyam nam, a kaa er: Mnyam ciem er, itinewain lum sha ishi je;

¹⁰ itine la ta agbaa atar, maa hôm je, gba kparen je, asume a na via atam je;

¹¹ m lu a iyongo i Farao sha uwe; tsô m zôr atam a wain, m kam shin iyongo i Farao la, m gema iyongo la, m na Farao sha uwegh nagh.

¹² Yosev kaa a na er: Inja i ma yô, ka i ne: Agbaa atar la ka ayange atar je la.

¹³ Ayange atar a lu a kar ga tsô Farao una kende u ityough sha una hide a we ken tom wou; shi ú naan Farao iyongo na sha uwegh nagh er zum u, u lu ortoonkwaghman na la nahan.

¹⁴ Aluer wea za zua a mkpeyol yô, umbur mo, shi er a mo dedoo, ôr kwagh wam a Farao, dughum ken ya ne kera;

¹⁵ gadia mimi je i iim a ii ken tar u Mbaheberu; heen kpaa, m er ma kwagh man ve va wuhem ken gaadi ga.

¹⁶ Zum u orvesen u mbakaanbredi nenge mpase la doo nahan yô, a kaa a Yosev er; Mo kpaa mnyam ciem, m nenge a akese a bredi u pupuu atar, lum sha ityou.

¹⁷ Shin ikese i sha la akaayan a kaan a kaa anza kposo kposo lu shimi sha ci u Farao; inyon lu va yan mo a shin ikese sha ityou je.

¹⁸ Yosev gema kaa er: Inja i ma yô, ka i ne: Akese atar la, ka ayange atar je la;

¹⁹ ayange atar á lu a kar ga tsô Farao una kende a ityough you una kar a mi sha, una hambe u sha kon, inyon ia ya inyam you.

²⁰ Tsô sha iyange i sha utar la, lu iyange i umbur mmar u Farao la, a yôr mbatomov nav cii iwer; tsô a kende orvesen u mbatoonkwaghman man orvesen u mbakaanbredi ityough sha, ken mbatomov nav mbala.

²¹ A shi a hide a orvesen u mbatoonkwaghman ken tom na u toon kwaghman la, a shi a hingir or u nan Farao iyongo sha uwe.

²² Kpa a sende orvesen u mbakaanbredi, er Yosev vande pasen ve nahan.

²³ Nahan kpaa, orvesen u mbatoonkwaghman la, kera umbur Yosev ga, a hungul un.