Genese 4 - ICIGHAN BIBILO

¹ Or la tsa a kwase na Ifa, maa a wa iyav, a mar Kain, a kaa er: M zua a nomsoor sha iwasen i TER.

² Man shi a mar idyondon na Abel. Abel lu orkuranilev, kpa Kain yô, gema lu or u kahan sule.

³ Ayange nga tse yô, Kain tôô iyiav mbi ken sule va na TER nagh a mi.

⁴ Abel kpaa pande ônov mba tsutswav mba ilev nav, va na ahôm a ve. TER rumun Abel kua nagh nagh.

⁵ Kpa Kain man nagh nagh yô, A rumun ga. Nahan ishima vihi Kain tsung, a kera saan ishigh sha ga.

⁶ Nahan TER kaa a Kain er: Ka nyi ishima i vihi we, man ka nyi u saan ishigh sha ga?

⁷ Aluer wea er sha mi yô, ma u saan ki sha gaa? Man aluer wea er sha mi ga yô, nenge, isholibo kegh sha hunda je; ka sha a we je isharen i i, i lu ye, kpa ka we man ú hemba i ye.

⁸ Tsô Kain ôr kwagh a anngô na Abel; man er ve lu ken toho yô, Kain mough num a idyondon na Abel, wua un je.

⁹ Nahan TER pine Kain er: Anngôu Abel, ngu hana? A kaa er: M fa ga, m kor anngômô?

¹⁰ Tsô A kaa er: U er nana? Awambe a anngôu nga genger imo hen inya, yilan Mo.

¹¹ Hegen yô, ú lu a ifan iyol hen inya i i aver zwa sha u ngohol awambe a anngôu sha uwegh ough ne;

¹² aluer ú kaha sule kpaa, inya ia kera doo iyiagh ga; ú hingir or u yevese man or u zenden a zende sha won.

¹³ Tsô Kain kaa a TER er: Mtsaha wam ne gandem.

¹⁴ Nenge ase, nyian U zendam sha tar kera; me gema me lu U myer, or u yevese man or u zenden a zende sha won. Nahan yô, hanma or u nana kohol mo nana wuam je.

¹⁵ Tsô TER kaa a na er: Nahan yô, hanma or u nana wua Kain, á or iyev sha a nan kwa taankaruhar. Shi TER ver Kain ikav, sha u or nana zua a na kpaa, nana̱ de woo un ga yô.

¹⁶ Nahan Kain kar sha ishigh ki TER kera, za tema ken tar u Noda u u lu Eden vegher u sha ityoughkitaregh la.

¹⁷ Tsô Kain tsa a kwase na, maa a wa iyav mar Heno; nahan a maa gar, a ii gar la iti sha iti i wan na, Heno.

¹⁸ Heno mar Irada; Irada mar Mehuyael; Mehuyael mar Metushael; Metushael mar Lameki.

¹⁹ Lameki er kasev uhar, u môm iti na er Ada, ugen iti na er Shila.

²⁰ Ada mar Yabal; ka un man lu ter u mba ve tem ken utenti ve lun a ilev la ye.

²¹ Iti i anngô na er Yubal; ka un man lu ter u mba ve koho mbaadiguve ve tenge amar la ye.

²² Shila mar Tubal-kain, orvaren-iwa i iyôv mbi bashiv kua mbi iliv kpaa; man anngô u Tubal-kain u kwase yô, iti na er Naama.

²³ Lameki gema kaa a kasev nav er: We Ada vea Shila, ungwa nen imo yam; ne kasev mba Lameki ver nen ato sha kwaghôron wam: M wua or sha ci u nan gberem ivav, ka wanyekwaor je, sha ci u iyol i nan vihim yô.

²⁴ Aluer á or iyev i Kain kwa taankaruhar yô, i Lameki yô, á lu kwa akunduatargber kar utaankaruhar.

²⁵ Adam shi tsa a kwase na, nahan a mar wannomso; a ii un iti er Setu, gadia a kaa er: Aôndo verem vor ugen sha ityough ki Abel, gadia Kain wua un.

²⁶ Setu kpaa gema mar wan, ii un iti er Enoshi. Ka sha ayange la je man i hii u yilan sha iti i TER ye.