Genese 39 - ICIGHAN BIBILO

¹ I yem a Yosev shin Igipiti; Potifar orvesen u ken ya u Farao, tor u adugwer, Origipiti, yam un a Mbaishemael mba ve za a na shin her la.

² TER lu a Yosev, nahan ikôr doo un; lu hen ya u ter na, Origipiti.

³ Ter na kav er TER A lu a na yô, man shi er hanma kwagh u a ker ave mi cii TER A veren un doo doo yô,

⁴ nahan doo un a Yosev, a gba eren un tom; man a gema a ver un or u nengen un sha ya; a gema akaa a a lu a mi cii, a wa un sha ikev.

⁵ Tsô hii hen shighe u a ver un or u nengen un ya kua sha akaa a a lu a mi cii la yô, TER ver ya u Origipiti la doo doo sha ci u Yosev; iveren i TER lu sha akaa a a lu a mi cii, a ken ya kua a ken won kpaa.

⁶ Akaa a a lu a mi cii a gema a wa Yosev sha ikev; er a lu a na yô, ma kwagh kera gba un u veren ishima sha mi ga, saa di kwaghyan u un yaan la tsô. Yosev yô, kuma ashe, doo ashe kpaa.

⁷ Tsô ken masejime u akaa ne yô, kwase u ter na la, gema ashe kenger Yosev kaa er: Va yav a mo.

⁸ Kpa a venda, a kaa a kwase u ter na la er: Nenge, er mo m lu a terem yô, ma kwagh kera gba un u veren ishima sha mi ken ya na ga; akaa a na cii kpaa, a gema a wam sha ikev;

⁹ ma or u hemban mo hen ya ne ngu ga; ma kwagh kpaa, a yangem ga, saa we tseegh, sha ci u we u ngu kwase na; a er nan man me er kwaghbo u vesen ne, me er Aôndo isholibo nahana?

¹⁰ Shin er a zer ôron kwagh a Yosev ayange ayange nahan kpaa, Yosev wa iko u yaven a na ga, shin u teman a na imôngo tsô kpaa ga.

¹¹ Tsô iyange igen yô, a nyôr ken iyou sha u eren tom na; ior mba hen ya cii lu her ga.

¹² Tsô a kôr un sha ikondo na, a kaa er: Va yav a mo; a undu un a ikondo na la, a yevese a due ken won.

¹³ Tsô nengen er a undu riga na sha ikev na a yevese a dugh yô,

¹⁴ a yila ior mba hen ya na, a ôr kwagh a ve, a kaa er: Nenge nen, a va na se Orheberu ne er a va neen iyar sha a vese; a va nyôr er una va yav a mo, tsô m gbire vaa;

¹⁵ ongo er m gbir vaa nahan yô, a undu ikondo na her a mo, a yevese, a due ken won.

¹⁶ Tsô a koso ikondo na la her, zan zan ter na kar hiden hen ya.

¹⁷ A tôô akaa la a ôr un, a kaa er: Kpan u Heberu u u ne se ne, a va nyôr her a mo, ngu va eren iyar a mo;

¹⁸ tsô m gbir vaa genger genger yô, a undu ikondo na her a mo a yevese a due.

¹⁹ Ter na ongo kwaghôron u kwase na ôr un, er: Kape kpan wou a er a mo la yô, ishima nyoon un.

²⁰ Ter u Yosev kôr un wa ken gaadi, her ape i wuhe mbakwarev mba tor la; maa a lu ker ken gaadi.

²¹ Kpa TER lu a Yosev, eren a na dedoo, A na doo orkurangaadi la a na.

²² Orkurangaadi gema mbakwarev mba ve lu ken gaadi la ca ca, wa Yosev sha ikev; hanma kwagh u i eren her kpaa, i lu un a er ye.

²³ Ishima i kera nyian orkurangaadi sha ma kwagh môm u a lu sha ikev na ga, gadia TER lu a na; kwagh u a eren kpaa, TER A veren kwagh la doo doo.