Genese 33 - ICIGHAN BIBILO

¹ Yakob te ashe nengen Isou van a ior deri unyiin a na ityô yô, a pav ônov a wa sha ikev i Lea man Rahel man ikpan i ukase ihiar la.

² A ver ikpan i ukase la a ônov vev sha hemen, Lea vea ônov nav ve dondo, Rahel vea Yosev ve mase.

³ Un iyol na kar hemen ve, gba guren tan inya kwa taankaruhar je, zan zan za mgbôghom a anngô na.

⁴ Isou kura ayem za kohol un kuve un, kamber un ave sha mon, gba susen un zwa; tsô ve gba vaan.

⁵ A ta ashe a nenge kasev a ônov mbala, a kaa er: Mban mba ve lu a we ne yô, ka unô? A kaa er: Ka ônov mba Aôndo A zungu wanakiriki wou mhôônom a mi yô.

⁶ Tsô ikpan i ukase kporom a ônov vev, ve gure inya;

⁷ Lea kpaa kporom a ônov nav ve gure inya; ken masejime la yô, Yosev kpaa kporom vea Rahel va gure inya.

⁸ Nahan a pine er: Awashima wou a ikpelaakaa i m zough a mi la yô, ka nana? A kaa er: Ka sha u ma i doo terem a mo yô.

⁹ Isou kaa er: M ngu a kwagh kumam anngôm; kwagh u u lu a mi yô, a̱ lu u wou tsô.

¹⁰ Yakob kaa er: Ei, aluer hegen i doo u a mo yô, shi ngohol ishughun yam i sha uwegh agh ne, gadia m nenge ishigh you je er i nengen a ishigh ki Aôndo nahan, shi doo u a mo kpaa.

¹¹ Yô, shi ngohol ishughun yam, i i ze u a mi la; gadia Aôndo zungwem mhôônom, kwagh wam kpaa kumam. A za un iyol, tsô a ngohol.

¹² Tsô a kaa er: Yô, sé mough sé yem, mo me hemen we.

¹³ Kpa a kaa a na er: Terem u fa er mbayev ve taver ga, akum a iyôngo man ivo kua abua kpaa a a lu a mo, nga a ônov ityô, nahan aluer á zende a ve apera apera, iyange i môm tseegh tsô kpaa akum a iyôngo man ivo cii, aa kpe.

¹⁴ Yô, terem a̱ gba hemen wanakiriki na tsô; mo me zaan a ve tegh tegh, sha inja i uzendenya mba ve lum sha ishi, man sha injazende i mbayev, zan zan me za kohol terem hen Seir.

¹⁵ Isou kaa er: Yô, me pande ior av me undu u a mi. A kaa er: Nahan kpee shinii? De kera, i̱ doo terem a mo.

¹⁶ Isou kôr gbenda iyange la je, yem ken Seir.

¹⁷ Kpa Yakob yô, kar yem hen Sukoti za maa ya na keregh, kua atôrauile kpaa; ka sha ci u nahan man i yer ijiir la iti er Sukoti ye.

¹⁸ Yakob za nyôr ken gar u Shekem, u a lu ken tar u Kanaan la dedoo er a due ken Padan-aram yô; a haa afo ken akôngo a gar.

¹⁹ Shi a yam tiôntar henpe a tim tenti na la, a ônov mba Hamor, ter u Shekem, sha agbenger a inyar kuma deri.

²⁰ A ta atse a nan nagh sha mi heregh, a ii a iti er El-elohe-Iserael (ka Aôndo u Iserael A lu Aôndo ye).