Genese 30 - ICIGHAN BIBILO

¹ Tsô er Rahel nenge un mar Yakob ônov ga yô, Rahel gba nôngon anngô na iwuhe; a kaa a Yakob er: Nam ônov, gayô me kpe.

² Tsô Yakob nyoon ishima a Rahel gba kaan er: Mo m ngu er Aôndo u A nyim u ônov mba ken uya la, shinii?

³ A kaa er: Kpan wam u kwase Bila ngun, tsa a na, a̱ mar sha ikum yam, mo kpaa m̱ wa iyagh a na.

⁴ Tsô a na un kpankwase na Bila, hingir kwase na, Yakob tsa a na.

⁵ Bila wa iyav, mar Yakob wannomso.

⁶ Tsô Rahel kaa er: Aôndo kurem ijir, A ungwa imo yam, A nam wannomso; ka nahan man a ii un iti er Dan ye.

⁷ Bila kpankwase u Rahel shi wa iyav mar Yakob wannomso u sha uhar.

⁸ Rahel kaa er: Ka sha iniôngon i tsung i m nenge a anngôm la, man m hembe un ye; ka nahan man a ii un iti er Nafetali ye.

⁹ Er Lea nenge er un til mar yô, a tôô Selpa kpankwase na, a na Yakob, hingir kwase na.

¹⁰ Selpa kpankwase u Lea la, mar Yakob wannomso.

¹¹ Tsô Lea kaa er: Ikôr doo ve! Maa a ii un iti er Gadi.

¹² Selpa kpankwase u Lea, shi mar Yakob wannomso u sha uhar.

¹³ Nahan Lea kaa er: Saan mo iyol yum! Gadia ônkasev vea wuese er i saan mo iyol; maa a ii un iti er Asher.

¹⁴ Tsô sha ayange a i lu sundan alakema la, Ruben za, za zôr mkehem ken toho, va a mi hen ngô na Lea. Tsô Rahel kaa a Lea er: Shi pandem mkehem ma wan wou ne he!

¹⁵ A kaa a na er: Mngohol u u ngohol mo nom ne yô, ka u kwagh u kiriki, sar u pe ngohol mkehem ma wan wam kpaa ha? Rahel kaa er: A lu nahan yô, nyian tugh a̱ tsa a we sha ci u mkehem ma wan wou la.

¹⁶ Yakob za hidi ken toho aikighe yô, Lea za kegh un gbenda gba kaan er: Ka her a mo ú va tsa ye, gadia m goho u a goho sha mkehem ma wan wam je. Tsô hen tugh mbula a maa a tsa a na.

¹⁷ Aôndo kpaa ver ato hen Lea, a wa iyav, a mar Yakob wannomso u sha utaan.

¹⁸ Nahan Lea kaa er: Aôndo nam injar yam, sha er m ne nomom kpan wam u kwase; maa a ii un iti er Isakar.

¹⁹ Lea shi wa iyav mar Yakob wannomso u sha ataratar.

²⁰ Tsô Lea kaa er: Aôndo nam iwua i dedoo, hegen yô, nomom una wa ikile her a mo, gadia m mar un ônov mba nomso ataratar; maa a ii un iti er Sebulon.

²¹ Ken masetyô la, a mar wan u kwase, a ii un iti er Dina.

²² Aôndo umbur Rahel, shi Aôndo wa un iko kpaa, nahan A bugh un sagh.

²³ A wa iyav, a mar wannomso. Nahan a kaa er: Aôndo kar a iheen yam kera ve,

²⁴ maa a ii un iti er Yosev; a kaa er, TER A̱ seer mo wannomso!

²⁵ Rahel maren Yosev yô, Yakob kaa a Laban er: Nam gbenda, m̱ yem ken ya wam man ken tar wam kpaa.

²⁶ Nam ase kasev av man ônov av mba m er u tom sha ci u ve yô, m̱ yem; gadia we iyol you u fa tom wam u m er u yô.

²⁷ Tsô Laban kaa a na er: Aluer a shi doo u a mo yô, m nenge ikav er TER A verem doo doo sha ci wou yô.

²⁸ Shi a kaa er: Kaam injar you, me na u.

²⁹ A kaa a na er: We iyol you kpaa, u fa tom u m er u yô, man er mlu u ilev you mbi lu her a mo kpaa.

³⁰ Gadia er yan m lu a va ga la, kwagh u u lu a mi lu kpeghee tsô, kpa a gema a seer ngeen; TER ver u doo doo sha avindigh a am cii; tsô ka hanma shighe je, mo kpaa me koso ior mba hen ya wama?

³¹ Tsô a pine er: Ka nyi m̱ na uwe? Yakob kaa er: De nem kwagh môm ga; me shi me koson ilev you man shi me kuran mbi kpaa, aluer wea erem kwagh ne yô:

³² Me nyôr hen ilev you cii, nyian, me sange mbi lun amian amian man mbi lun abeen abeen, hanma iyôngo i il man hanma ivo i lun abeen abeen man amian kpaa, ka mbi mbia lu injar yam je la.

³³ Nahan perapera wam una erem shiada sha ayange a ken hemen, zum u ú va nenge injar yam yô; hanma ivo i i lu amian amian shin abeen abeen ga, man iyôngo i i lu il kpaa ga, aluer á zua a mi her a mo yô, hingir iv je ve.

³⁴ Laban kaa er: Doo yum, i̱ lu er u kaa nahan.

³⁵ Sha iyange la je, a sange ukpev mba anger anger kua abeen abeen man ungômbaivoov mba amian amian man abeen abeen, hanmô i i lu a ibeenegh ki pupuu iyol, man iyôngo i il cii; a gema i a na i sha ikev i ônov nav.

³⁶ Tsô a gbihi ian i kuman zende u ayange atar hen atô na vea Yakob. Yakob lu kuran ilev mbi Laban mbigenev mbi mbi shi her la.

³⁷ Tsô Yakob tôô anigboov mba ndorov mba kon u popeler man u amondi kua u pelatanu, a bugh ve avuu iyol, ihange ihange, due ken u kungun.

³⁸ A ver anigboov mba a bugh ve avuu la sha ishigh ki akumauile shin utso mba akumauile a ze, a za me mngerem ker yô; mbia za maan yô, mbi gba keren noov.

³⁹ Akumauile gba keren noov sha ishigh ki anigboov mbala, nahan akumauile mar mba lun anger anger man amian amian kua abeen abeen kpaa.

⁴⁰ Yakob pav aniyôngov ver ve kposo, man a gema ilev mbi ver ishigh ken mbi lun anger anger kua mbi iliv cii, mbi ken ikum i Laban la; a pav akum a na kposo, a zua a, a a Laban la ga.

⁴¹ Tsô hanma shighe u ilev mbi taver ayol mbia keren noov yô, Yakob a ver mbi anigboov mbala sha ishi shin utso, sha u ve̱ keren noov hen atô u anigboov mbala.

⁴² Kpa zum u ilev mbia kera taver iyol ga yô, a kera ver ve shimi ga; nahan mbi taver ga la, lu mbi Laban, kpa mbi taver mbila lu mbi Yakob.

⁴³ Nahan or la za hemen tsung, a zua a akumauile a tamen man ikpan i ukase man ikpan i nomso man urakumi kua ujaki kpishi kpaa.