Genese 29 - ICIGHAN BIBILO

¹ Tsô Yakob mough gba yemen sha tar u ior mba sha ityoughkitaregh la.

² Te ashe yô, a nenge ijôr ken ikôngo; akumauile atar gema yav hen kpe u i; gadia ka shin ijôr la man i naan akumauile mngerem ye; iwen i sha zwa u ijôr la gba ikôr kpishi.

³ Zum u, akumauile cii a va kohol her yô, i menger iwen sha zwa u ijôr la kera, i na ilev mngerem, i shi i hide a iwen la sha zwa u ijôr her.

⁴ Yakob pine ve er: Anmgbianev av, ne mba mba hana? Ve kaa er: Se mba mba ken Haran.

⁵ Shi a pine ve er: Ne fa Laban wan u Nahor la kpa? Ve rumun er: Een, se fa un.

⁶ Shi a pine ve er: Tsô ngu dedoo zee? Ve rumun er: Een, ngu dedoo; wan na u kwase Rahel ngula van a ilev la.

⁷ A kaa er: Nenge, iyange ngi her je, shighe ngu a kuma u kohol ilev ga; yô, na nen iyôngo mngerem i̱ ma, shi za nen a i, i̱ za ya toho.

⁸ Ve kaa er: Se fatyô ga, saa akumauile á vande kohol cii, man á menger iwen sha zwa u ijôr kera, man sé na iyôngo mngerem ye.

⁹ Ngur ôron a ve nahan yô, Rahel va nyôr a iyôngo i ter na; gadia ka un kuran i ye.

¹⁰ Tsô Yakob nengen a Rahel wan u Laban, anngô u ngô na, man iyôngo i Laban, anngô u ngô na yô, Yakob kporom menger iwen sha zwa u ijôr kera, na ilev mbi Laban anngô u ngô na la, mngerem.

¹¹ Tsô Yakob suse Rahel zwa, a gba vaan genger genger.

¹² Yakob ôr Rahel er un lu anngô u ter na yô, un ngu wan u Rebeka; tsô a za ayem, a za kaa ter na.

¹³ Tsô Laban ongo kwagh u Yakob wan u anngô na u kwase yô, a za ayem, a za kegh un gbenda, a kuve un, a suse un zwa, a va nyôr a na hen ya na. Shi a ôr Laban akaa la cii.

¹⁴ Laban kaa a na er: Mimi je, we, u ngu kuhe wam kua inyam yam kpaa. A tema a na kuma uwer môm.

¹⁵ Tsô Laban pine Yakob er: Ka er u lu anngôm man u gbe eren mo tom gbilin tsô yee? Kaam ase injar i á kimbin we yô.

¹⁶ Laban gema lu a ônov mba kasev uhar, iti i u vesen la er Lea, u kiriki la iti na er Rahel.

¹⁷ Lea yô, ashe na lu fuu; kpa Rahel yô, kuma ashe, doo ashe kpaa.

¹⁸ Rahel doo Yakob ishima; nahan, a kaa er: Me er u tom anyom ataankarahar sha ci u Rahel wan wou u kiriki la.

¹⁹ Laban kaa er: Guda u me na u un a u me na orgen; lu a mo.

²⁰ Tsô Yakob er tom anyom ataankarahar sha ci u Rahel; er a doo un ishima yum yô, lu un er ka ayange kpuaa tsô yô.

²¹ Nahan Yakob kaa a Laban er: Nam ase kwase wam, gadia ayange a i wam laa bee ve, m̱ tsa a na.

²² Tsô Laban kohol ior mba hen ijiir la cii, er iniongo.

²³ Iyange i been yô, a tôô wan na Lea, a za na un, tsô a tsa a na.

²⁴ Laban gema Selpa kpan na u kwase, na wan na Lea, hingir kpan na.

²⁵ Sev mbu aven yô, gema lu Lea. Nahan a kaa a Laban er: Ka nyi u er a mo nahana? M er u tom, ka sha ci u Rahel gaa? Man ka nyi u gem u tsughum nahana?

²⁶ Laban kaa er: Ka ieren yase ne ga, u vanden nan u kiriki kera a u vesen la.

²⁷ Yô, lu a na, ayange a ataankarahar a iniongo ne a̱ kure, tsô ngula kpaa sé na u, tsô ú shi ú erem tom anyom ataankarahar.

²⁸ Yakob er nahan, a lu a na ayange a ataankarahar a iniongo la; nahan a na un wan na Rahel kpaa, hingir kwase na.

²⁹ Laban shi gema Bila kpan na u kwase, na wan na Rahel, hingir kpan na.

³⁰ A tsa a Rahel kpaa; Rahel hemba doon un ishima a Lea; nahan shi a kimbir u eren un tom anyom ataankarahar.

³¹ Er TER nenge i lu wan Lea iko ga yô, A bugh un sagh; kpa Rahel yô, gema lu ikôm.

³² Tsô Lea wa iyav, mar wannomso, a ii un iti er Ruben; gadia a kaa er: TER nenge ican yam; hegen yô, me doo nomom ishima.

³³ Shi a wa iyav, a mar wannomso, a kaa er: TER ungwa, mba wan mo iko ga, ka nahan A shi A nem wan ne kpaa ye; maa a ii un iti er Shimeon.

³⁴ A shi a wa iyav, a mar wannomso, a kaa er: Hen zum ne yô, nomom una zua a mo, gadia m mar un ônov mba nomso utar; ka nahan man a ii un iti er Levi ye.

³⁵ Man a shi a wa iyav, a mar wannomso, a kaa er: Hegen yô, me wuese TER; ka nahan man a ii un iti er Yuda ye; tsô a tile mar.