Genese 28 - ICIGHAN BIBILO

¹ Isaka yila Yakob ver un doo doo, wa un kwagh kaa er: De eren kwase ken ônkasev mba Kanaan ga.

² Mough yem ken Padan-aram hen ya u Betuel, ter u ngôu, za er kwase ken ônov mba Laban, anngô u ngôu.

³ Aôndo Uhembanagee, A̱ ver u doo doo, A̱ ngee u ônov, A̱ seer we iyenge u hingir ikpila i akuraior yô,

⁴ A̱ na u iveren i Aberaham, we a tsombor wou, sha u u̱ ya dyako u tar u u lu shir ker ne, u Aôndo lu na Aberaham yô.

⁵ Tsô Isaka na Yakob gbenda; nahan a yem ken Padan-aram hen Laban wan u Betuel, Orshiria, anngô u Rebeka ngô u Yakob vea Isou la.

⁶ Er Isou nenge Isaka ver Yakob doo doo na un gbenda er a̱ yem Padan-aram, a̱ za er kwase keregh, man lu veren un doo doo wan un kwagh kaan er: De eren kwase ken ônkasev mba Kanaan ga la,

⁷ man a shi a nenge Yakob ungwa kwaghôron u ter man ngô na, je a yem Padan-aram kpaa,

⁸ man er Isou nenge er ônkasev mba Kanaan ve doo ter na Isaka ga yô,

⁹ Isou nyiishi yem hen Ishemael, za er Mahalata, wan u Ishemael, wan u Aberaham, anmgbian u Nebayoti, seer sha kasev mba un lu a mi la.

¹⁰ Tsô Yakob mough hen Bersheba gba yemen ken Haran.

¹¹ A za ar hen ijiir igen a tsa heregh, gadia iyange i mire; a tôô iwen i môm ken awen a hen ijiir la, a ver, a penda ityough sha mi, a yav her.

¹² Mnyam cie un er gogo tuur shin inya, za suur ityough sha aôndo je; mbatyomov mba Shaav mba Aôndo gema lu unden man shi hungwan sha mi.

¹³ Man TER tile sha ityough nagh kaa er: Mo M ngu TER, Aôndo u teru Aberaham, Aôndo u Isaka kpaa; tar u u yav her ne, Me na u u kua tsombor wou kpaa.

¹⁴ Tsombor wou ua hingir er vuulevu u hen inya yô, ú samber je ú za ar ityôtar man ityoughkitaregh man imbusutarimese man imbusutariyan; ka ken a we kua ken tsombor wou je man akuraior a sha won cii aa zua a iveren ye.

¹⁵ Nenge, M ngu a we, Me kuran we henpe ú za cii, Me shi Me hide a we ken tar ne kpaa; gadia Me undu u ga, saa Me kure kwagh u M kaa u ne ve.

¹⁶ Tsô Yakob nder, a kaa er: Mimi je, TER ngu hen ijiir ne, man mo yô, m fa ga.

¹⁷ Cier un iyol, a kaa er: Ijiir ne i cier iyolo! Ka ma kwagh ugen ga, ka iyou i Aôndo je, ka hunda u Sha je.

¹⁸ Tsô Yakob mough pepe, a tôô iwen i a yav a penda ityough sha mi la, a tim i sha, er i̱ lu ikav i umbur; a haa mkurem sha ityough ki i.

¹⁹ Shi a ii ijiir la iti er Betel; kpa kera yô, i vanden yilan gar la iti er Lushi.

²⁰ Man shi Yakob tsegha zwa, kaa er: Aluer Aôndo Una lu a mo, Una kuram sha gbenda u m ze ne, Una nam kwaghyan sha u m̱ ya, man akondo sha u m̱ zer.

²¹ Zan zan mea hide hen ya u terem dedoo yô, nahan TER Una lu Aôndo wam,

²² iwen i m tim i sha mer i̱ lu ikav i umbur ne yô, ia hingir iyou i Aôndo; man akaa a Ú nam cii, me tsuwa môm-ken-upue me na U.