Genese 25 - ICIGHAN BIBILO

¹ Aberaham shi er kwase ugen, iti na er Ketura.

² A mar un Shimeran man Yokeshan man Medan man Midian man Ishebaki man Shua.

³ Yokeshan mar Sekeba kua Dedan. Ônov mba Dedan yô, ka: Ashurim man Letushim kua Leumim.

⁴ Ônov mba Midian yô, ka: Efa man Efer man Hanoki man Abida kua Eldaa; mban cii ka ônov mba Ketura.

⁵ Aberaham gema akaa a na cii, na Isaka.

⁶ Kpa ônov mba Aberaham mar a kasev nav mbagenev mbala yô, Aberaham na ve iwua; er a lu uma her la je, a na ve gbenda er ve̱ pav a wan na Isaka, ve̱ yem vegher u sha ityoughkitaregh ken tar u sha ityoughkitaregh la.

⁷ Iyenge i anyom a mtse u Aberaham a tsa sha won yô, lu anyom deri man akunduatargber kar ataan.

⁸ Tsô Aberaham sure; a tsa sha won man a mase kpen ye, hingir tamenor, bee iyol; a za kohol ior nav.

⁹ Ônov nav Isaka man Ishemael, ve ii un ken bar u Makpela, ken tiôntar u Eferon wan u Sohar Orhiti, u a lu sha ishigh ki Mamre la.

¹⁰ Ka tiôntar u Aberaham yam a Mbahiti je la; ka ker man i ii Aberaham kua kwase na Sara ye.

¹¹ Tsô ken masejime u Aberaham kpe kera yô Aôndo ver wan na Isaka doo doo; Isaka tema hen Ber-lahai-roi.

¹² Ingin ka icombor i Ishemael, wan u Aberaham, u Hagar, Wanigipiti, kpankwase u Sara, mar Aberaham ne:

¹³ Angan ka ati a ônov mba Ishemael, ka ati ve sha ikov ve ne: Waniunda u Ishemael yô, ka Nebayoti; u dondon yô, ka: Kedar man Adebeel man Mibesam

¹⁴ man Mishema man Duma man Masa,

¹⁵ Hadadi man Tema man Yetur man Nafishi kua Kedema;

¹⁶ mban ka ônov mba Ishemael, ka ati a ve je ne, sha agar a ve man afo a ve, uityombaiorov pue kar uhar, sha akur a ve.

¹⁷ Angan ka anyom a Ishemael tsa ne: lu anyom deri man ikundugber kar ataankarahar; tsô a sure, a kpe, a za kohol ior nav.

¹⁸ Ve tema twev vev, hii hen Havila zan zan za ar hen Shur u a lu sha ishigh ki Igipiti, sha ian i yemen sha Ashiria la. A tema sha ishigh ki anmgbianev nav cii.

¹⁹ Ingin ka icombor i Isaka, wan u Aberaham ne: Aberaham mar Isaka.

²⁰ Isaka lu anyom akunduahar zum u a er wan u Betuel Orshiria u hen Padan-aram; ka Rebeka anngô u Laban Orshiria je la.

²¹ Isaka zamber a TER sha ci u kwase na, gadia lu ikômkwase; TER kpaa rumun, ungwa zamber na, nahan kwase na Rebeka maa wa iyav.

²² Tsô ônov gba keman ayol a ve ken iyav nav; nahan a kaa er: Er kwagh ne a va er nahan yô, ka nyi i erem nee? Tsô a za a za pine TER.

²³ TER gema kaa a na er: Ka akuraior ahar a lu ken iyav ou ye; akuraior ahar aa pav ken iyol you je; ikurior i môm ia hemba igen agee; u vesen la una shiren u kiriki.

²⁴ Tsô ayange nga kom a una mar yô, i kav un a ônov mba ahinav ken uya.

²⁵ U iunda la due nyian bong, iyol na cii lu er ka ikondo i aivegh yô, nahan i ii un iti er Isou.

²⁶ Ken masetyô la anngô na due, kôr uwegh sha ikishinguhar i Isou, nahan i ii un iti er Yakob; Isaka lu anyom akunduatar zum u a mar ve la.

²⁷ Mbayev mbala vese; Isou hingir ortato u fan ikôr; kpa Yakob yô, lu or u kumbur ga, teman ken utenti tsô.

²⁸ Isou doo Isaka ishima gadia un lu or u wan akor yum: Yakob yô, gema doo di Rebeka ishima.

²⁹ Yakob jiidi kwagh, tsô Isou za hide ken toho, a vôr.

³⁰ Nahan Isou kaa a Yakob er: Shi nam kwagh u nyian ashe ne, m̱ ya, gadia m vôr; ka nahan man i yila un iti er Edom ye.

³¹ Yakob kaa er: Yô, vande teen mo dyako wou u waniunda la ve.

³² Isou kaa er: Tsô, nenge, m ngu nôngon ku, dyako wam u waniunda la, una lum a inja sha nyi?

³³ Yakob kaa er: Yô, vande bumun ase; nahan a bum a na, a tee Yakob dyako na u waniunda.

³⁴ Tsô Yakob na Isou bredi man alev a jiidi; a ya, a ma, a mough, a yem a nagh; kape Isou laha dyako na u waniunda la.