Genese 17 - ICIGHAN BIBILO

¹ Zum u Aberam lu anyom akunduanyiingber kar ataankaranyiin la, TER ande hen Aberam, kaa a na er: Mo M ngu Aôndo Uhembanagee, zenden sha ishigh Yagh, nahan yô, ú lu vough.

² Mo kpaa, Me ver ikyuryan Yam her atô Wam a we, Me seer we iyenge kpishi.

³ Tsô Aberam gure wa ityough inya, Aôndo gema ôr kwagh a na kaa er:

⁴ Mo yô, nenge, M ya ikur a we, ú hingir ter u akuraior kpishi.

⁵ A kera yilan iti you er Aberam ga, kpa á gema iti you er Aberaham; gadia M gema u, u hingir ter u akuraior kpishi.

⁶ Man shi Me er u, ú ngee a ônov kpishi, ú va hingir akuraior je, utor kpaa vea due ken a we.

⁷ Me taver ikyuryan Yam hen atô Wam a we kua tsombor wou u ken ijime you zan zan sha ikov ikov cii, i̱ lu ikuryan i tsôron; Me lu Aôndo wou kua u tsombor wou ken ijime you.

⁸ Me na u kua tsombor wou u ken ijime you, tar u u lu shir ker ne, ka tar u Kanaan ne cii; ua hingir kwagh ve gbem; Mo kpaa Me lu Aôndo ve.

⁹ Man Aôndo kaa a Aberaham er: We yô, waan ikuryan Yam iko, we, kua tsombor wou ken ijime you zan zan sha ikov ikov.

¹⁰ Ingin ka ikuryan Yam i né waan i iko hen atô Wam a we man tsombor wou ken ijime you ne: I̱ tsôngon hanma wannomso wen.

¹¹ Á tsôngon ne ipusu yen, á lu ikav i ikuryan her atô Wam a ven.

¹² U nan kom ayange anigheni ken ven yô, i̱ tsôngo nan; hanma nomsoor, zan zan sha ikov ikov, man marinya wou kua u i yam a yam nan sha inyar a orgen u nan lu nongo wou ga kpaa.

¹³ I̱ tsôngon marinya wou kua or u u yam sha inyar kpaa, kpee je. Ka nahan man ikuryan Yam ia lu ikuryan i tsôron ye.

¹⁴ Oripusu u i tsenge nan ipusu i nan ga yô, i̱ dugh or la ken nongo u nan kera; nan vihi ikuryan Yam.

¹⁵ Man Aôndo shi kaa a Aberaham er: De kera yer kwase wou Sarai wer, Sarai ga; kpa á yilan iti na er Sara.

¹⁶ Me ver un doo doo man Me na u wan ken a na kpaa; Me ver un doo doo una hingir akuraior, utor mba iorov kpaa vea due ken a na.

¹⁷ Tsô Aberaham gure wa ityough inya, gba sen, kaan ken ishima na er: Or u nan lu anyom deri kpaa, nana mar wana? Sara u a lu anyom akunduanyiingber je kpaa una mara?

¹⁸ Tsô Aberaham kaa a Aôndo er: Ishemael ma a shi lu uma sha ishigh You!

¹⁹ Aôndo kaa er: Ei, ka Sara, kwase wou, una mar u wan yô, ú ii un iti wer Isaka; Me taver ikuryan Yam vea na, á lu ikuryan i tsôron, sha ci u tsombor na u ken ijime na.

²⁰ Man sha kwagh u Ishemael kpaa, M ungwa msen wou; nenge, Me ver un doo doo, Me na, una mar kpishi, Me seer un iyenge, una mar utyombaiorov pue kar uhar; Me gema un una hingir zegeikurior.

²¹ Kpa ikuryan Yam yô, Me taver i ken Isaka, u Sara una mar u, sha inyom i sha, hen shighe ne nahan la.

²² Kur kwaghôron a na yô, Aôndo undu Aberaham yem.

²³ Tsô Aberaham kua wan na Ishemael man umarinya nav cii man mba a yam sha inyar cii, hanma nomsoor u hen ya u Aberaham; sha iyange la je, a tsôngo ve ipusu ve, er Aôndo kaa un yô.

²⁴ Aberaham yô, lu anyom akunduanyiingber kar ataankaranyiin zum u i tsôngo un ipusu na la;

²⁵ wan na Ishemael lu anyom pue kar atar, zum u i tsôngo un ipusu na la.

²⁶ Sha iyange la je, i tsôngo Aberaham kua wan na Ishemael kpaa,

²⁷ man nomso mba hen ya na cii; umarinya mba hen ya, man mba i yam ve sha inyar a nongo ugen kposo, i tsôngo ve a na imôngo.