Genese 16 - ICIGHAN BIBILO

¹ Kpa Sarai, kwase u Aberam, mar un ônov ga; kpa un gema lu a kpankwase u Igipiti, iti na er, Hagar.

² Nahan Sarai, kaa a Aberam, er: Nenge, TER yangem mar, nahan yô, ma u shi tee kpankwase wam ne, alaghga me wa iyagh a na. Aberam rumun zwa u Sarai la.

³ Zum u Aberam vande tsan anyom pue ken tar u Kanaan kera yô, Sarai kwase u Aberam, gema Hagar, kpankwase na u Igipiti la, na Aberam, nom na, hingir kwase na.

⁴ Tsô a tsa a Hagar, maa a wa iyav; nengen er un lu iyav; yô, ngô na hingir un kwagh u lahan sha ashe na je.

⁵ Sarai gema kaa a Aberam er: Kwagh u i erem a vihim ne, ngu sha ityough you; mo m na kpankwase wam sha ikev you, man er a nenge er un we iyav yô, m hingir un kwagh u lahan sha ashe na; yô, TER A̱ kure kwagh wam vea we ne.

⁶ Tsô Aberam kaa a Sarai er: Nenge, kpankwase wou ngu sha ikev you; er a na er i doo u yô. Nahan Sarai er un ican tsung zan zan maa a yevese un.

⁷ Ortyom u TER za kohol un hen imbormnger ken desereti, hen imbor i i lu sha gbenda u zan sha Shur la.

⁸ A kaa er: Hagar, kpankwase u Sarai, u due han u ve, man ka han u zee? A kaa er: Ka ayem m yevese ngôm Sarai ye.

⁹ Ortyom u TER la, kaa a na er: Hide hen ngôu, hire a iyol you ijime, lu sha ikev na.

¹⁰ Shi ortyom u TER kaa a na er: Me seer tsombor wou, ua ngee je á gande u ôron iyenge i u.

¹¹ Ortyom u TER shi seer kaan un er: Nenge, u ngu iyav, maren you wan u nomso je; ú ii un iti wer Ishemael, gadia TER ungwa u ken ican you.

¹² Una lu or inja er jaki i ken toho nahan, uwegh nagh kua lu ihom a hanma or, uwegh ku hanma or kpaa kua lu di ihom a na; una tema sha ishigh ki anmgbianev nav cii.

¹³ Tsô a yila iti i TER u A er kwagh a na la er: We U ngu Aôndo u nengen; gadia a kaa er: Mo kpaa, m gema m nenge a Un u A nenge a mo heen ne?

¹⁴ Ka nahan man i yer ijôr la er Ber-lahai-roi ye, ngi keela hen harga u Kadeshi a Berede.

¹⁵ Hagar mar Aberam wan u nomso. Aberam ii wan na, u Hagar mar la, iti er Ishemael.

¹⁶ Aberam lu anyom akunduanyiin kar ateratar, zum u Hagar mar Aberam Ishemael la.