Genese 12 - ICIGHAN BIBILO

¹ Tsô TER kaa a Aberam er: Due ken tar wou man ken ityô you man ken ya u teru, yem ken tar u Me tese u la.

² Me er u, ú hingir ikurior i vesen, Me ver u doo doo, Me er iti you i̱ za gwa man shi ú lu iveren kpaa.

³ Mba vea ver u doo doo yô, Mo kpaa Me ver ve doo doo; or u nana wa u ifan la, Mo kpaa Me wa nan ifan; ka ken a we je akuraior a sha won cii aa zua a iveren ye.

⁴ Tsô Aberam yem er TER kaa Un nahan; Loti kpaa yem a na imôngo. Aberam lu anyom akunduatargber kar ataan zum u a mough ken Haran la.

⁵ Aberam mough a kwase na Sarai man Loti wan u anngô na, man inyarev vev mbi ve kohol cii, kua ior mba ve zua a mi ken Haran, ve gba yemen ken tar u Kanaan; ve za nyôr ken tar u Kanaan.

⁶ Tsô Aberam gba zenden ken tar la zan zan za ar hen tembe u Shekem, hen kon u terebin u More. Sha ayange la Mbakanaan lu ken tar la.

⁷ Tsô TER ande hen Aberam, kaa er: Me na tsombor wou tar ne. Nahan a ta TER u A ande her a na la, atse a nanden nagh sha mi heregh.

⁸ A mough heregh a yem sha iwo i i lu Betel vegher u sha ityoughkitaregh la, a za tim tenti na her; Betel lu un vegher u shin ityôtar, Ai gema lu un vegher u sha ityoughkitaregh; keregh la, a ta TER atse a nanden nagh sha mi, a yila sha iti i TER.

⁹ Aberam gba zenden veren ishigh ken Imbusutariyan la.

¹⁰ Tsô ijen gba hen tar la, nahan Aberam sen za shin Igipiti sha u una lu shir ker; gadia ijen taver hen tar la yum.

¹¹ Tsô za mgbôghom u nyôron ken Igipiti yô, a kaa a kwase na Sarai er: Nenge, m fa, u ngu kwase u doon ashe mimi;

¹² nahan zum u Mbaigipiti vea za nenge a we yô, vea kaa er: Ka kwase na je; nahan vea gema á wuam, kpa we yô, vea de u uma.

¹³ Nahan yô, ma u za kaa wer, u ngu anngôm u kwase, sha er á kpem iyol sha ci wou man uma wam kpaa a̱ war sha ci wou.

¹⁴ Tsô Aberam za nyer ken Igipiti yô Mbaigipiti nenge kwase la doo ashe tsung.

¹⁵ Mbatarev mba Farao kpaa nenge a na; tsô, ve gba wuese un sha ishigh ki Farao; maa i kua a kwase la, i za a mi hen ya u Farao.

¹⁶ Nahan a er a Aberam doo doo sha ci na; a zua a iyôngo man abua man anomajaki man ikpan i nomso man i ukase man anmgbianajaki man urakumi.

¹⁷ Kpa TER tsaha tor Farao kua ya na cii, sha atsan a vesen, sha ci u Sarai kwase u Aberam la.

¹⁸ Nahan Farao yila Aberam kaa er: Ka nyi u er a mo nahana? Inja na nan u kaam er i lu kwase wou ga?

¹⁹ Inja na nan, u kaa wer: Ka anngôm u kwase, ve m gem m koo a naa? Yô, kwase wou ngun, kua a na, yem.

²⁰ Farao shi na nomso mbagenev er ve̱ za ver un gbenda vea kwase na, kua akaa a a lu a mi cii.