Genese 1 - ICIGHAN BIBILO

¹ Sha hiihii Aôndo gba Sha man tar:

² Tar yô, gba lun dang, gbilin tsô; ime lu sha zegemnger man Jijingi u Aôndo gba karen sha kwavmnger.

³ Tsô Aôndo kaa er: Iwanger i̱ lu; maa iwanger lu je.

⁴ Aôndo nenge iwanger, er i doo yô; nahan Aôndo pav iwanger a ime.

⁵ Tsô Aôndo yila iwanger er atetan, man ime yô, A yila er tugh. Nahan hingir iyange i been man pepe, ka iyange i hiihii je la.

⁶ Aôndo shi kaa er: Kwavaôndo u̱ lu hen atô u mnger, u̱ pav mngerem a mngerem.

⁷ Nahan Aôndo er kwavaôndo, A pav mngerem ma shin kwavaôndo a mngerem ma sha kwavaôndo la; maa lu di nahan je.

⁸ Tsô Aôndo yila kwavaôndo er Sha. Nahan hingir iyange i been man pepe, ka iyange i sha uhar je la.

⁹ Aôndo shi kaa er: Mngerem ma shin kwavaôndo ma̱ kohol ijiir i môm, tareghnyaagh u̱ due; maa lu di nahan je.

¹⁰ Tsô Aôndo yila tareghnyaagh er tar; man mngerem ma ma kohol mara yô, A yila ma er zegemnger. Aôndo nenge er i doo nahan yô.

¹¹ Aôndo shi kaa er: Tar u̱ mende toho, imendenev mbi wan isham man ikon i umen atam sha anza a i kposo kposo, a lun a ake kimi, sha tar; maa lu di nahan je.

¹² Tsô toho mende sha tar, imendenev mbi wan isham sha anza a mbi; man ikon i umen atam a lun a ake kimi sha anza a i. Aôndo nenge er i doo nahan yô.

¹³ Nahan hingir iyange i been man pepe, ka iyange i sha utar je la.

¹⁴ Aôndo shi kaa er: Akaa a nan iwanger a̱ lu sha kwavaôndo Sha, sha er a̱ pav atetan a tugh yô; a̱ lu sha ci u akav man ashighe man ayange kua anyom;

¹⁵ Shi a̱ lu akaa a nan iwanger sha kwavaôndo Sha, er a̱ taan iwanger sha tar yô; maa lu di nahan je.

¹⁶ Tsô Aôndo er akaavesen a nan iwanger ahar, u hemban la sha u a̱ lu a tahav atetan, u kiriki la yô, a̱ lu a tahav tugh; kua asan kpaa.

¹⁷ Tsô Aôndo ver a sha kwavaôndo Sha, er a̱ taan iwanger sha tar,

¹⁸ A̱ lu a tahav atetan man tugh, shi a̱ pav iwanger a ime kpaa. Aôndo nenge er i doo nahan yô.

¹⁹ Nahan hingir iyange i been man pepe, ka iyange i sha unyiin je la.

²⁰ Aôndo shi kaa er: Mngerem ma̱ mgbough a akaauma a zenden shimi, inyon kpaa i̱ purugh sha tar, sha kwavaôndo Sha.

²¹ Aôndo gba uzegembainyamev mba shin zegemnger man hanma kwagh u uma u zenden, u mngerem ma mgbough a mi sha anza a ve yô, man shi hanma inyon i purugh, sha inja i i. Aôndo nenge er i doo nahan yô.

²² Shi Aôndo ver ve doo doo kaa er: Mar nen kpishi, ngee nen, iv nen shin mngerem ma uzegembamngerev; inyon kpaa i̱ seer a seer ngeen sha tar.

²³ Nahan hingir iyange i been man pepe, ka iyange i sha utaan je la.

²⁴ Aôndo shi kaa er: Tar u̱ due a akaauma sha inja i a, uzendenya man akaa a a kper a kpela inya man inyamtoho i sha tar, sha anza a ve; maa lu di nahan je.

²⁵ Aôndo er inyamtoho i sha tar sha anza a i, man uzendenya di kpaa sha anza a ve, man hanma kwagh u a kper a kpela inya sha inja na. Aôndo nenge er i doo nahan yô.

²⁶ Tsô Aôndo kaa er: Sé er or sha inja i mlu wase, sha ibeen Yase; ishu i shin zegemnger man inyon i sha man uzendenya man tar cii kua hanma kwagh u kpelan inya, u a kper a kpela sha tar kpaa, ve̱ lu sha ikev ve.

²⁷ Nahan Aôndo gba or sha inja i mlu Na, lu sha inja i mlu u Aôndo je A gba nan ye; lu nomsoor man kwase A gba ve ye.

²⁸ Aôndo ver ve doo doo; Aôndo kaa a ve er: Mar nen kpishi, seer nen ngeen, iv nen tar, gema nen u, u̱ lu sha ikev yen; ishu i shin zegemnger man inyom i purugh sha kwavaôndo man hanma kwagh u uma u a zenden sha tar cii, ve̱ lu sha ikev yen.

²⁹ Aôndo shi kaa er: Nenge, M na ne hanma imendenegh ki wan isham, ki ki lu sha tar cii, man hanma kon u ityamegh ki lu sha u, ki lun a ake kimi, a̱ hingir kwaghyan wen.

³⁰ Man shi hanma inyam i sha tar, man hanma inyon i sha, man hanma kwagh u akper a kpela inya u a lu uma yô, M na ve hanma ihuugh, ki̱ lu kwaghyan ve; maa lu di nahan je.

³¹ Tsô Aôndo gema nenge hanma kwagh u Un er yô, lu u doon tsung. Nahan hingir iyange i been man pepe, ka iyange i sha ataratar je la.