Filemon 1 - ICIGHAN BIBILO

¹ Paulu orkwar u Kristu Yesu vea Timoteu, anmgbian wase, mba sughun Filemon u doon ishima, ortom a vese imôngo,

² man Apia anmgbian wase u kwase u doon ishima man Arekipu, orutya a vese imôngo man nongo u Kristu u ken ya wou kpaa.

³ Mrumun u sha mhôôn a̱ lu sha a ven man shi bem mba ve dugh hen Aôndo Ter wase man Ter Yesu Kristu kpaa.

⁴ M ngu sughun Aôndo wam gbem hanma shighe u ka mea umbur we ken mbamsen av yô,

⁵ gadia m ungwa gwa u dooshima wou man jighjigh wou u nan u u lu a mi hen Ter Yesu man uicighanmbaiorov cii yô.

⁶ M ngu eren msen mer mnyer wou u u nyer nongo ken jighjigh u nan ne yô, a̱ wase, a̱ er tom ken we, a̱ ar a we ken mfe u fan akaa a doon cii a se lu a mi ken Kristu la.

⁷ Gadia m ember kpishi shi m zua a ishimasurun sha dooshima wou, anmgbian, er u ne asema a taver uicighanmbaiorov yô.

⁸ Nahan yô, shin er m lu a vangertiôr ken Kristu kpishi sha u kaan we kwagh u a doo u eren yô,

⁹ nahan kpaa, sha ci u dooshima yô, hemba doon mo u zamber a zamber—mo Paulu u m lu tamenor ne, u hegen m hingir orkwar u Kristu kpaa ne,

¹⁰ m ngu zamber a we sha ci u wan wam Onesimu u m mar un ken uikangen ne.

¹¹ Ngise yô lu u a inja ga, kpa hegen yô, ngu u a inja, mo kpaa, ngum a inja je.

¹² M ngu hiden we a na, un u a hingir mo er ka ishima yam nahan ne.

¹³ Mo yô sarem pe ma a lu a mo heen sha u una erem tom sha ityough you ken ikangenev mbi sha ci u ivangeli ne.

¹⁴ Kpa lum pe gban eren kwagh sha mfe wou ga ze, sha u erdoo wou a̱ de lu sha mkighir ga, kpa i̱ lu sha ishima you yô.

¹⁵ Alaghga lu sha ci u kwagh ne man a kera lu a we ga, sha anyangem kpeghee, sha u ú mase lun a na gbem ye.

¹⁶ Kera ngu er kpan nahan ga, a hemba kpan, a hingir anmgbian u doon ishima, jim yô, ka u wam man hire we ve una kera lu u wou ga yee? Ka anmgbian ken iyol kua ken Ter kpaa.

¹⁷ Nahan aluer wea fa wer mo m ngu kwagh môm vea we yô, rumun un er ma u rumun mo nahan.

¹⁸ Aluer una vihi u kwagh shin una lu u a kwagh kpaa, nger kwagh la nam, i̱ hingir u wam.

¹⁹ Mo Paulu m ngu ngeren kwagh ne sha uwegh agh je, mo me kimbi; u ngum a injô je kua iyol you sha mi cii, kpa me kera ôr kwagh sha mi kpee ga.

²⁰ Een, anmgbian ma m zough a iwasen hen a we ken Ter. Taver mo ishima ken Kristu.

²¹ M nger u kwagh ne, m fa dedoo ú ungwa imo yam. M fa ú er kwagh je á hemba kwagh u m kaa ne kpaa.

²² Kwagh ugen kpaa, sôrom ijiir i tsan her, gadia m ver ishima mer sha mbamsen enev yô, á na ne mo.

²³ Epafera u a lu orkwar a mo imôngo ken Kristu Yesu yô, ngu sughun we.

²⁴ Marku kpaa nahan, kua Aristareku man Dema man Luka mba ve lu eren tom a mo imôngo ne.

²⁵ Mrumun u sha mhôôn u Ter Yesu Kristu a̱ lu a jijingi wou.