Eseter 6 - ICIGHAN BIBILO

¹ Hen tugh mbula tor fatyô u yaven ga; nahan a kaa er, i̱ va a ruamabera u umbur akaa, ka u abaver a utor je la, nahan i va ôr un sha ishigh ki tor.

² Tsô i zua a kwaghngeren keregh er Mordekai pase kwagh u Bigetan man Tereshi, ka mbaerentom ken iyou i tor, ve uhar, ve lu ken mbakuranhunda, man ve nôngo u wuan tor Ahasueru.

³ Tsô tor pine er: I wuese Mordekai, i civir un sha ci u kwagh shon nana? Tsô mbatomov mba tor mba ve eren un tom la, kaa a na er: I er un ma kwagh ga.

⁴ Tsô tor pine er: Ka an nan lu hen tembe? Yô, Haman nyôr hen tembe u ken won u ya u tor kera ve, sha u una ôr kwagh a tor er á sende Mordekai sha kon u un tim sha ci na la.

⁵ Mbatomov mba tor gema kaa a na er: Nenge, Haman tile, ngu hen tembe. Tor kaa er: Kaa nen un, a̱ nyôr.

⁶ Tsô Haman nyôr. Tor pine un er: Á er a or u i sar tor pe nan nan icivir la nana? Nahan Haman hen ken ishima na, er: Ka an je nan hembe doon tor u una na nan icivir, a lu mo ga?

⁷ Tsô Haman kaa a tor er: Or u i doo tor u nan nan icivir yô,

⁸ i̱ va a ikav mbi torov mbi tor a vanden haan man nyinya u tor a hende, u i cir un idyer i tor la;

⁹ i̱ na akondo kua nyinya la sha ikev i or môm u ken atiator a tor a hemban la, sha u ve̱ za haa or u nan doo tor u nan nan icivir la; yô, i̱ ver nan nana̱ tema sha nyinya, nana̱ ningir sha tembe u ken atôgar, i̱ yôô nan sha hemen, i̱ kaan er: Kape á er a or u nan doo tor, u nan nan icivir ne.

¹⁰ Tsô tor kaa a Haman er: Yô, er fefa, tôô akondo kua nyinya, er u kaa nahan, za er a Mordekai, Oryuda, u a tem hen hunda u ya u tor la nahan; de panden ma kwagh môm ken akaa a u kaa ne ga.

¹¹ Nahan Haman tôô akondo kua nyinya la, za wuha Mordekai, a er un a ningir hen tembe u hen atôgar, shi a gba yôôn un sha hemen er: Kape á er a or u nan doo tor, u nan nan icivir ne.

¹² Tsô Mordekai shi hide hen hunda u ya u tor; kpa Haman yô, yem hen ya na fefa a ijungwen, a yisa kwagh sha ityou.

¹³ Haman za ôr kwase na Sereshi kua akar a na cii, akaa a a tser un cii. Nahan ior nav mbafankwagh man kwase na Sereshi gema kaa a na er: Aluer Mordekai u u hii u gban sha ishigh nagh la, una lu or u ken nongo u Yuda je yô, ú fatyô u hemban un sha ma kwagh je ga, kpa ú gba sha ishigh nagh kpee.

¹⁴ Er ve lu ôron kwagh a na nahan yô mbaerentom ken iyou i tor za va, ve za a Haman fefa hen iwer i Eseter yôr la.