Eseter 1 - ICIGHAN BIBILO

¹ Tsô sha ayange a Ahasueru (ka Ahasueru shon u a tema tor hii hen India je, zan zan ar hen Etiopia la, sha uipaven deri man ikundu kar utaankaruhar);

² sha ayange la, er tor Ahasueru tema sha ikônough nagh ki torough, ki ki lu ken garutya u Shushan la,

³ sha inyom i sha utar i tor na la, a er atiator a na iniongo kua mbatomov nav cii; ikumutya i Pershia man Media, ashagbaior kua atiator a ken uipaven mba, tile un sha ishi;

⁴ a tese mngee u akaa a tor na man iengem i icivir i mhembe na, ayange kpishi je, kuma ayange deri man akunduanyiin.

⁵ Er ayange la bee yô, tor er iniongo sha ci u mba ve lu ken garutya u Shushan cii, mbavesen kua mbakiriki, ayange ataankarahar, sha tembe u sule u ikon u hen iyou i tor la.

⁶ I har akondo agen sha, a pupuu man a lun ikôn ikôn kua a kwel, i kange a sha ikor i sha mou u pupuu man mou u nyian dindee sha ikunya i azurfa man sha mtôm ma sha iwen i mabel; ugambe mba teman sha mi lu mba zenaria man azurfa, i ver ve sha tembe u i we u awen a nyian man a pupuu man a ayaikure kua a ir.

⁷ Ve na ve kwaghman shin ayongo a zenaria, ayongo la lu atô kposo kposo, man wain u tor kpaa kpishi, sha inja i tor.

⁸ Mme la kpaa lu sha tindi, i kighir or ga; gadia tor kaa mbahemenev mba hen ya na cii, ve̱ er a hanma or sha ishima i nan.

⁹ Shi Vaseti pendatyo u tor kpaa a er kasev iniongo ken iyou i tor i Ahasueru la.

¹⁰ Tsô sha iyange i ataankarahar la, er ishima i tor lu saan saan sha msôr yô, a kaa Mehuman man Biseta man Harbona man Bigeta man Abageta man Setar kua Karkashi, ka mbatomov mba ken iyou i tor, mba utaankaruhar mba ve lu eren tor Ahasueru tom je la, er,

¹¹ ve̱ za va a Vaseti pendatyo u tor la, sha ishigh ki tor a idyer i tor, sha u tesen ior kua atiator mdooashe na; gadia a doo u kenger.

¹² Kpa Vaseti, pendatyo u tor la, venda imo i tor, i mbatomov mba ken iyou i tor va kaa un la, a za ga; nahan ishima vihi tor je, lu yeghen a yegh.

¹³ Tsô tor ôr kwagh a mbafankwagh mba fan ashighe, gadia kape i vaan a akaa a tor sha ishigh ki mbafan atindi kua ijirôron la;

¹⁴ mba ve dondo sha a na yô, lu: Karshena, Shetar, Ademata, Tarshishi, Merese, Marsena man Memukan, ka atiator a ataankarahar a Pershia man Media, mba ve kenger tor sha ishi je la, shi ka ve, ve tema mbahemenev mba hii hii ken tartor na ye, a pine ve er:

¹⁵ Sha tindi yô, sé er nan a Vaseti pendatyo u tor er a er sha imo i tor Ahasueru sha zwa u mbatomov mba ken iyou i tor mban ga nee?

¹⁶ Nahan Memukan gema kaa sha ishigh ki tor man atiator a na er: Vaseti, pendatyo u tor er tor kwaghbo tseegh ga, kpa ka atiator cii kua ior mba ve lu sha uipaven mba tor Ahasueru cii.

¹⁷ Gadia kwagh u pendatyo u tor a er ne una gba kasev cii ker ato, nahan noov vev vea hingir ve kwagh u lahan, aluer a samber a gwa er: Tor Ahasueru kaa er, Vaseti pendatyo na a̱ va sha ishigh nagh, kpa a vende u van yô.

¹⁸ Nyian je ashagbaukase a Pershia man Media aa ungwa kwagh u pendatyo u tor a er ne, nahan vea ôr kwagh ne a atiator a tor cii, nahan yô, iheen kua ishima i vihin ia mough taveraa.

¹⁹ Aluer tor a nenge a doo un nahan yô, tindi a̱ due hen tor, man i̱ nger un ken atindi a Mbapershia man Mbamedia, sha u i̱ de gem un ga, er Vaseti a̱ de kera shi ve sha ishigh ki tor Ahasueru mayange ga; man shi tor a̱ gema icivir na la, a̱ na kwase ugen u nan hembe un yô.

²⁰ Tsô zum u á yôô tindi u tor u una wa ken tartor na cii la yô, gadia u vese, kasev cii vea civir noov vev, á hii sha mba vesen zan zan á ar sha mba kiriki je.

²¹ Kwaghôron la doo tor kua atiator; nahan tor er sha imo i Memukan la;

²² a tindi uwashika sha uipaven mba tor cii, hen hanma ipaven sha mnger u i je, man hen hanma ikurior sha zwa u i, a nger er, hanma orya nana̱ nengen sha ya u nan, shi nana̱ ôron kwagh sha zwa u ityô i nan.