Esera 9 - ICIGHAN BIBILO

¹ Zum u i kure akaa ne yô, atiator va her a mo, ve kaa er: Ior mba Iserael man upristi kua Mbalevi ve kem ayol a ve sha akaahôngorough a ior mba hen ityar ne ga, ka i Mbakanaan man Mbahiti man Mbaperishi man Mbayebushi man Mbaamon man Mbamoabi man Mbaigipiti kua Mbaamor je la.

² Gadia ve er ônov vev mba kasev sha ci ve ayol a ve man sha ci u ônov vev kpaa; nahan icighantsombor nungwa a atôatyev a hen ityar ne; ka atiator man mbatarev je, ve hemen sha kwaghbo ne ye.

³ Zum u m ungwa kwagh ne yô, m ande ikondo yam kua riga wam kpaa, man m gbera ice yam i sha ityou man indyer yam kpaa, m tema kông.

⁴ Tsô mbacian akaaôron a Aôndo u Iserael cii, ve va kohol her a mo sha ci u kwaghbo u mbakwarev la; kpa m tema her kông, zan zan nagh ku aikighe kuma.

⁵ Sha shighe u nagh ku aikighe la yô, m mough a iheen yam, a ikondo yam i anden kua riga wam kpaa, m gure anu inya, m naregh ave sha TER, Aôndo wam;

⁶ m kaa mer: Ahii! Aôndo wam, m va ahenge, kunya kôrom u kenden ishigh yagh sha a We Aôndo wam, gadia afer a ase seer je kar ityough yasegh sha, ibo yase kôndo ar Sha je.

⁷ Hii sha ayange a uter asev je, se lu ken zegeibo zan zan nyian; ka sha ci u afer a ase kpaa, i tôô se a utor asev man upristi asev, i na se sha ikev i utor mba ityar igen, man shi i na se sha sanker, man ken uikangen, man ishar i yan, man kunya u sha ishi, er i lu nyian nahan.

⁸ Man hegen yô, ka anshighe kpuaa tsô, TER, Aôndo wase, A zungu se mhôônom i de se asande a a wer ne, man i ne se se lu a imande i manden ken icighanjiir Na, je Aôndo wase A wanger se ashe man A na i yôhôl se iyol kpuaa ken ikangenev yasev.

⁹ Gadia se mba ikpan je, nahan kpaa Aôndo wase gbihi se ken ikangenev yasev kera ga, kpa A er, doo utor mba Pershia a vese sha u ve̱ na i̱ yôhôl se iyol er se̱ maa iyou i Aôndo wase man se̱ sôr atse a i la her, man sha u wan se igyar ken Yuda man ken Yerusalem.

¹⁰ Hegen yô, ken ijime i akaa ne shi sé kaa nana, Aôndo wase? Gadia se undu atindi a Ou,

¹¹ a U we se sha mbayev Ou mbaprofeti, U kaa Wer: Tar u ne ze sha u za ngohol u la, ka tar u wang ga, sha ci u mlu u wang ga u ior mba ken ityar la, sha akaahôngorough a ve iv u a mi la sha mlu ve u wang ga la, hii hen ikighir ingin ar hen ngila.

¹² Yô, de kera rumun nen ônov enev mba kasev ve̱ eren ônov vev mba nomso ga, man shi de kera eren nen ônov vev mba kasev sha ci u ônov enev mba nomso ga; de keren nen bem shin mkpeyol sha ci ve mayange je ga, sha er né taver, né ya mdoom ma tar la, shi né undu ônov enev dyako u u gbem yô.

¹³ Man ahegen ken masejime u akaa a a tser se cii, sha ci u ityom yase i ifer man zegeibo wase ne kpaa, Aôndo wase, U tsaha se sha mngee u afer a ase la ga, shi U na se asande ne kpaa,

¹⁴ nahan shi sé vihi atindi a Ou, sé zua ivese a ior mba ve eren akaahôngorough angan nahana? Nahan Ú kera yuwe a vese je, Ú tim se, man asande á kera shi ga, shin mô u waren kpaa nana kera lu ga gaa?

¹⁵ TERE, Aôndo u Iserael, We U ngu u perapera je, gadia se mba asande a waren, er i lu nyian nahan; nenge, se tile a ibo yase iyol sha ishigh You; gadia mô u nana fatyô u tilen sha ishigh You sha ci u kwagh ne nan ngu ga.