Esera 5 - ICIGHAN BIBILO

¹ Tsô mbaprofeti, Hagai man Sekaria wan u Ido, ve ôr kwaghôron u profeti a Mbayuda mba ve lu ken Yuda kua Yerusalem la, ken iti i Aôndo u Iserael.

² Nahan Serubabel wan u Shealtiel man Yeshua wan u Yosadaki ve mough, shi ve gba maan iyou i Aôndo i i lu ken Yerusalem la; mbaprofeti mba Aôndo, lu a ve imôngo, lu wasen ve.

³ Hen shighe la je Tatenai gomna u yande Ifi la vea Shetar-bosenai, man nongo ve, va her a ve, va pine ve nahan, er: Ka an nan ne ne zwa u maan iyou ne man u kuren gilgar ne kpaa?

⁴ Shi ve pine ve er: Ati a ior mba ve lu maan iyou ne er nana?

⁵ Kpa ishe i Aôndo ve lu sha mbavesen mba Mbayuda, nahan ve kera yange ve er ve̱ de ga, zan zan i za a kwagh ne hen Dariu, man a mase nan imo ken washika sha kwagh ne ye.

⁶ Washika u i kura washika u Tatenai gomna u yande Ifi la ker, man Shetar-bosenai kua nongo ve, ugomna mba ve lu yande Ifi la, ve tindi hen tor Dariu;

⁷ ve tindi un a washika i nger ker nahan er: Hen tor Dariu: Bem cii!

⁸ Doo u tor a̱ fa, se za ken tar u Yuda, hen iyou i Aôndo u vesen, mba maan i sha uzegembaawenev, man mba wan ikpande ken ukpekpe, tom la ngu zan hemen sha gbashima, man ngu zan dedoo sha ave ve.

⁹ Tsô se pine mbavesen mbala, se kaa a ve nahan ser: Ka an nan ne ne zwa u maan iyou ne man u kuren gilgar ne kpaa?

¹⁰ Shi se pine ati ve sha u se pase u, man sha u se nger ati a mbahemenev vev yô.

¹¹ Ve gema ve kaa a vese er: Se mba mbayev mba Aôndo u Sha man tar, se mba maan iyou i lu i maa i anyom kar kpishi la, i zegetor u Iserael ugen lu maa i, kure kpaa la.

¹² Kpa er uter asev bam Aôndo u Sha yô, A na ve sha ikev i Nebukadinesar tor u Babilon, Orkaldi, a yôhôl iyou ne, shi a kura ior a yem a i ken Babilon.

¹³ Kpa sha inyom i hiihii i Shirushi tor u Babilon la, tor Shirushi na zwa er i̱ maan iyou i Aôndo ne.

¹⁴ Ikav mbi zenaria man mbi azurfa kpaa mbi ken iyou i Aôndo, mbi Nebukadinesar lu kura ken tempel u a lu ken Yerusalem yem a mi ken tempel u Babilon la, tor Shirushi due a mbi ken tempel u Babilon la, i gema mbi i na sha ikev i or u i yilan nan er Shesebasar, u a ver un er a̱ lu gomna la;

¹⁵ a kaa a na er: Tôô ikav mbin yem a mi, za ver mbi ken tempel u a lu ken Yerusalem la; yô, i̱ maa iyou i Aôndo hen ijiir i i la.

¹⁶ Nahan Shesebasar shon ne va, va tim imagh ki iyou i Aôndo i i lu ken Yerusalem ne; hii sha iyange la zan zan nyian je mba maan i, kpa mba a kure i ga.

¹⁷ Nahan, aluer tor a nenge a doo yô, i̱ ker ken iyou i koson ityakerada i tor i ken Babilon la, i̱ nenge, shin a lu nahan, er tor Shirushi lu na zwa u maan iyou i Aôndo ne ken Yerusalem yô, tor kpaa a̱ pase se ishima na sha kwagh ne.