Esera 4 - ICIGHAN BIBILO

¹ Kpa zum u mbaihomov mba Yuda man Benyamin ungwa er mbakwarev ve lu maan TER, Aôndo u Iserael, tempel yô,

² ve va hen Serubabel man hen mbavesen mba sha uya mba uter kpaa, ve kaa a ve er: Se kpaa ma se maa a ven imôngo, gadia se mba keren Aôndo wen, er ne kpaa ne eren nahan, se mba nan Un nagh hii sha ayange a Esar-hadon tor u Ashiria va a vese heen la je.

³ Kpa Serubabel vea Yeshua man mbavesen mba ve shi sha uya mba uter ken Iserael la, kaa a ve er: Kwagh zua se a ven sha u maan Aôndo wase iyou ga; kpa sé maa TER, Aôndo u Iserael, iyou ayol a ase er Shirushi tor u Pershia kaa se nahan.

⁴ Tsô ior mba hen tar la na Mbayuda iyol i kpen, ve ta ve mciem iyol sha u ve̱ de maan ga yô.

⁵ Ve za goho ior mba wasen ve henen u bunden awashima ve la, sha ayange a Shirushi tor u Pershia la cii, zan zan ar sha ayange a mtemtor u Dariu tor u Pershia la.

⁶ Sha ayange a mtemtor u Ahasueru, sha mhii u mtemtor na la, ve nger un washika sha u senden mba ve tema ken Yuda man Yerusalem la ityough.

⁷ Tsô sha ayange a Artashaseta la, Bishelam man Miteredati man Tabeel kua ahur a na agen, ve nger Artashaseta tor u Pershia kwagh; i nger washika la sha injangeren i Shiria, shi i gema un ken zwa u Shiria kpaa.

⁸ Rehum orjir u tamen man Shimshai orngeren, ve nger tor Artashaseta washika sha u senden Yerusalem ityough er:

⁹ Rehum orjir u tamen man Shimshai orngeren kua akar a ve a tom, mbaajiriv man ugomna man Mbaafarsa man Mbaereki man Mbababilon man Mbasusa, ka Mbaelam je la,

¹⁰ kua akuraior agen a Osenapar, orcivirigh la, va a ve uikangen, va ver ve ken gar u Samaria, kua ken tar u yande Ifi la.

¹¹ Washika u ve nger ve tindi tor Artashaseta a mi la, kaa nahan er: Mbayev ou, mba yande Ifi la, mba kaan er:

¹² Doo u tor a̱ fa er Mbayuda mba ve dugh hen we, ve ve hen vese hen Yerusalem ne, mba maan gar u ayongo man u ifer la, ve kure ugir nav je, man ve sôr imagh nagh kpaa.

¹³ Yô, tor a̱ fa hegen, aluer á maa gar ne man á kure ugir nav kpaa yô, vea kera na kpandegh shin inyaregh ki saven shin inyaregh ki peren kpaa ga, nahan inyaregh ki utor ma ve zough a mi kia bunde ve.

¹⁴ Man er se lu yan bar u hen ya u tor yô, nahan doo se u se nenge er i lu nzughul a tor ga, ka nahan man se tindi se pasen we ye,

¹⁵ sha u i̱ time ken ruamabera u abaver a uter ou, tsô ú za zua a mi ken ruamabera u abaver la, man ú fa er gar ne a lu gar u ayongo, man a lu zan utor iyol man lu vihin ityar, man ve hendan kwagh kimi hii sha ayange a tsuaa la je ye; ka nahan man i gema gar ne hingir ice kpaa ye.

¹⁶ Yô, se pase tor ve, aluer á maa gar ne, man á kure ugir nav kpaa yô, ú kera zua a kwagh yande Ifi ga.

¹⁷ Tsô tor tindi Rehum orjir u tamen la a imo, kua Shimshai orngeren kua nongo ve mba ve lu ken Samaria man mbagenev mba yande Ifi la er: Bem.

¹⁸ Washika u ne tindim a mi la, i ôr un sha ishigh yagh wanger wanger.

¹⁹ Man m kaa, nahan i time i za zua a mi, er gar ne, sha ayange a tsuaa la, lu hendan a utor, man ihendan man ayôôso lu kimi.

²⁰ Ngise utor mba ageev kpaa lu ken Yerusalem, ve tema tor sha ityar i i lu yande Ifi la cii; i lu tan ve kpandegh, ve lu saven akaa, shi ve ngohol inyaregh ki peren kpaa.

²¹ Yô, wa nen tindi, yange ior mban ve̱ de; i̱ de kera maan gar la ga, saa mo me na zwa.

²² Ver nen ishima, de gbe nen uwer sha kwagh ne ga; inja na nan man á de kwagh u vihin á ngee á seer u nan utor ican nahana?

²³ Tsô er ve ôr washika u tor Artashaseta sha ishigh ki Rehum man Shimshai orngeren, kua nongo ve yô, ve za hen Yerusalem fefa, hen Mbayuda, ve za yange ve taveraa sha agee je.

²⁴ Nahan i tile tom u iyou i TER i i lu ken Yerusalem la; i tile u zan zan inyom i sha uhar i mtemtor u Dariu, tor u Pershia la.