Esekiel 9 - ICIGHAN BIBILO

¹ Tsô A genger imo sha ato am, A kaa er: Kporom nen ikua ikua, ne mba ne nengen sha gar, hanma or a ikagh ki nan ki tswamegh ken uwe.

² Tsô nenge, ior ataratar za va sha gbenda u Hunda u Sha, u u ver ishigh sha imbusutarimese la, hanma or a ikagh nagh ki utya ken uwe; orgen lu a ve, cir akondo a pupuu iyol, lu a korough ku inki ku orngeren hen ikooso. Ve nyôr ve za tile hen kpe u atse a togula a nanden nagh sha mi la.

³ Tsô iengem i Aôndo u Iserael mough sha cerubi, henpe i vande lun la, kar yem hen kpandehunda u iyou; A yila or u nan cir ikondo i pupuu iyol u nan lu a korough ku inki ku orngeren hen ikooso i nan la.

⁴ TER maa kaa a nan er: Za kar ken atô u gar, ken atô u Yerusalem, ver ikav sha atsul a ior mba ve lu a asema a shirin man ve vaa sha ci u akaa a ndôhôrshima a i eren ken a na la cii.

⁵ Man mbagenev mbala yô, A kaa a ve sha ato am er: Nyôr nen ken gar ken ijime na, wua nen; ishe yen i̱ de tangen ga, man shi de zungu nen mhôônom kpaa ga;

⁶ wua nen mbatamen man mbayevikaior man anuunaukase man mbayev mba kiriki man kasev; kpa de kera benden nen hanma or u nan lu a ikav la ave ga; hii nen hen icighanjiir wam je. Tsô ve hii sha mbatamen mba ve lu sha ishigh ki iyou la.

⁷ Man A kaa a ve er: Hôngor nen a iyou la, iv nen ityembe sha mba i woo ve la, yem nen je. Tsô ve yem, ve gba wuan ior ken gar.

⁸ Tsô, er ve lu wuan la yô, m shi her tswen, nahan m gure, m kuma ishigh inya, m vaa, m kaa mer: Ahii! Ter AÔNDO Ú tim asande a Iserael a a shi her ne cii sha mhee u iyugh You sha Yerusaleme?

⁹ Nahan A kaa a mo er: Iferkwagh i ya u Iserael man u Yuda i gba ikôr je cier iyol, man tar mgbough a awambe, man gar kpaa iv a mban u mimi; gadia mba kaan er: TER undu tar ne, man TER ngu nengen ga.

¹⁰ Nahan Mo kpaa, ishe Yam ia tange ga, man shi Me zungwe mhôônom, ga, kpa Me hire ve a ieren ve la sha ityough vegh.

¹¹ Man nenge, or u a haa ikondo i pupuu iyol, u a lu a korough ku inki hen ikooso na la, a hide, a va kaa er: M er kwagh u U kaam Wer, m̱ er la, ve.