Esekiel 6 - ICIGHAN BIBILO

¹ Kwaghôron u TER va her a mo, er:

² Wan u or ver ishigh you sha iwo i Iserael, ôr kwaghôron u profeti sha i,

³ kaa wer: Ne iwo i Iserael, ungwa nen kwaghôron u Ter AÔNDO; Ter AÔNDO ngu kaan a iwo man a agungu, man iwagh man apev nahan er: Nenge, ka Mo je, Me va a sanker sha a ven man Me tim ajiir a en a taven la kera.

⁴ Atse a en a nanden nagh sha mi, á vihi a kera man á hembe atse a en a nanden kwaghhumandoon sha mi la; Me haa ior enev mba i woo ve la inya, sha ishigh ki akombo a en.

⁵ Me gbir akom a Mbaiserael sha ishigh ki akombo a ve; man Me tsenda akuhe a en a̱ ningir atse a en a nan nagh sha mi a̱ tser.

⁶ Ken ajiir a en a teman cii, á tim agar a vesen kera, man ajiir a taven sha la, aa hingir ice; sha u i̱ tim atse en a nan nagh sha mi la, a̱ hingir ice, man i̱ hembe akombo a en a̱ bee, man i̱ gber atse a en a nanden kwaghhumandoon sha mi la kera, man i̱ kar a ityom yen kera purututu.

⁷ Mba i woo ve la, vea haa inya hen atô wen, man né fa er Mo M lu TER ye.

⁸ Nahan kpaa Me de asande a̱ lu uma her, gadia mbagenev ken a ven vea war sanker ken akuraior, zum u á sambe ne sha ityar ityar la.

⁹ Ve mba ve wer ken a ven la, vea umbur Mo ken akuraior henpe á yem a ve uikangen la, zum u Me vihi ishima ve i idya i i pav a Mo la kera, kua ashe a ve kpaa, a a za idya sha akombo a ve la, nahan ishima ia ndôhôr ve a ayol a ve sha ci u aferakaa a ve er sha akaa ve a ndôhôrshima la cii.

¹⁰ Man vea fa er Mo M lu TER ye; ka gbilin man M kaa Mer, Me er kwagh u bo ne ga.

¹¹ Ter AÔNDO ngu kaan nahan er: Kure ave, man kure angahar a ou, kaa wer: Wuu! Akaa a ndôhôrshima cii a ya u Iserael ne; gadia á wua ve sha sanker man sha ijen man sha bouange.

¹² U nan lu ca, bouange una wua nan; u nan lu ikua sanker una wua nan; u nan shi her man i kase nan sha utya la, ijen ia wua nan; kape Me kure ishimavihin Yam jimin cii sha a ve ne.

¹³ Man nea fa er Mo M lu TER ye, zum u mba i woo ve la, vea haa inya ken atô u akombo a ve hen atse a ve a nan nagh sha mi, á ningir á tser la, sha hanma igungu u taven man sha ityouv mbi iwoov cii, man shin hanma tinekon u ndor kpaa, man shin hanma itine i terebin u ngeen ika, hen ijiir i ve ne akombo a ve cii nagh ku dedoo la.

¹⁴ Me naregh uwegh Agh sha a ve, Me vihi tar, ua hingir ice, hii hen desereti zan zan ar hen Dibela hen ajiir a ve a teman cii, man vea fa er Mo M lu TER ye.