Esekiel 46 - ICIGHAN BIBILO

¹ Ter AÔNDO ngu kaan nahan er: Hunda u tembe u ken atô u u ver ishigh vegher u sha ityoughkitaregh la, i̱ wuhe u ayange ateratar a yaren tom la cii, kpa sha iyange i memen yô, i̱ bugh u, man sha iyange i uwer u he kpaa, i̱ bugh u.

² Tor una nyôr sha puadwer u hunda u ken won la, man una tile hen imbusuhunda man upristi vea na nagh ku nanden man iniav nav mbi bemev man una gure inya sha kpandehunda, tsô maa una due; kpa á wuhe hunda la ga, zan zan iyange i been.

³ Ior mbagenev yô, ior mba hen tar la, ve̱ gure inya hen ijiir i nyôron hen hunda la, sha ishigh ki TER, sha ayange a memen kua sha iwer i he kpaa.

⁴ Nagh ku nanden ku tor una na TER sha iyange i memen yô, kua lu agumaiyôngo ataratar a a lu a ihogholough iyol ga yô, man nomiyôngo kpaa, u a lu a ihogholough iyol ga yô,

⁵ man nagh ku sha samuyia efa môm sha ci u nomiyôngo, man nagh ku sha samuyia sha ci u agumaiyôngo yô, ku a lu er a fetyô u nan la, man hin u mkure môm kpaa, sha hanma efa.

⁶ Kpa sha iyange i uwer u he la yô, ku a lu gumbua u a lu a ihogholough iyol ga yô, man agumaiyôngo ataratar kua nomiyôngo môm, mba ve lu a ihogholough iyol ga yô;

⁷ una na nagh ku sha samuyia, efa môm sha ci u nombua, man efa môm sha ci u nomiyôngo, man sha ci u agumaiyôngo er a fetyô yô, man hin u mkure môm sha hanma efa.

⁸ Zum u tor una nyôr yô, una nyôr sha gbenda u puadwer u hunda la, shi ka sha u una due ye.

⁹ Kpa zum u ior mbagenev mba hen tar la, vea va sha ishigh ki TER sha uiniongo mba i ver la yô, u nan nyer sha hunda u hen vegher u imbusutarimese sha u za civir yô, nana̱ due sha hunda u hen imbusutariyan la; man u nan nyer sha hunda u sha imbusutariyan la, nana̱ due sha hunda u shin imbusutarimese nana̱ kera hide nana due sha hunda henpe nan nyer la ga, kpa nana̱ yem hemen jighilii.

¹⁰ Man tor yô, zum u vea nyôron yô, a̱ nyôr a ve imôngo, man zum u vea duen yô, un kpaa a̱ due.

¹¹ Sha ayange a uiniongo mba i ver la, nagh ku sha samuyia kua lu efa môm sha ci u nombua man efa môm sha ci u nomiyôngo, man sha ci u agumaiyôngo er a fetyô u nan yô, man hin u mkure môm sha hanma efa.

¹² Zum u tor una na nagh ku sha ishima i dedoo, a lu nagh ku nanden shin iniav mbi bemev er ka nagh ku sha ishima i dedoo ku nan TER yô, i̱ bugh un hunda u u ver ishigh vegher u sha ityoughkitaregh la, nahan una na nagh ku nanden man iniav nav mbi bemev, er a eren sha iyange i memen nahan; tsô a̱ due, una duen kera yô, i̱ wuhe hunda.

¹³ Na gumiyôngo u a lu inyom i môm, u a lu a ihogholough iyol ga yô, sha ci u nagh ku nanden ku nan TER ayange ayange; naan un pepe.

¹⁴ Naan nagh ku sha samuyia kpaa a na imôngo pepe, môm ken ataratar u efa, man môm ken utar u hin u mkure, sha u haan sha mwem ma kengese; ka nagh ku sha samuyia ku nan TER gbem je la, ka kwaghôron u jirigh u gbem.

¹⁵ Kape vea naan gumiyôngo man nagh ku sha samuyia man mkurem, pepe, sha ci u nagh ku nanden ku gbem gbem la.

¹⁶ Ter AÔNDO ngu kaan nahan er: Aluer tor una na môgen ken ônov nav iwua yô, hingir dyako u nan je, á hingir kwagh u ônov nav, ka kwagh ve, ka dyako.

¹⁷ Kpa aluer una pande dyako na una na môgen ken mbatomov nav iwua yô, á hingir kwagh u nan zan zan á za ar sha inyom i pasen tuhwan la, tsô ia hide hen tor; dyako na yô, ka ônov nav mba nomso vea saa a min ye.

¹⁸ Man shi tor a̱ de ngohol kwagh ken dyako u ior nav ga, sha u a̱ de duen ve ken dyako ve kera ga yô; a̱ na ônov nav mba nomso dyako sha kwagh u a lu u na iyol na yô, sha u i̱ de zende ma or u ken ior Av sha dyako u nan kera ga yô.

¹⁹ Tsô a nyôr a mo hen ijiir i nyôron i hen kpehunda la, a za a mo hen uicighan mba ukpombaayoughouv mba ve ver ishigh shin imbusutarimese la; yô, nenge, ijiir igen lu ken ijime vegher u shin ityôtar la.

²⁰ Tsô a kaa a mo er: Ingin ka ijiir i upristi vea jiidi nagh ku iboogh man nagh ku isholibo, henpe vea kaa nagh ku sha samuyia, sha u ve̱ de duen a mi ken tembe u ken won la, ve̱ tseghan ior ga yô.

²¹ Nahan a va a mo ken tembe u ken won la, a za a mo hen azongo a tembe a anyiin la; yô, nenge, ken hanma zongough ku tembegh, tembe ugen lu.

²² Sha azongo a anyiin a tembe la, ityembe igen lu, i i kase i, lihe aseva akunduahar man gbangese aseva ikundugber, i inyiin la cii lu ikaren môm.

²³ Kpekpe kase i inyiin cii, ningir tser, man i er ajiir ajiir kwagh sha mi shin amagh a ukpekpe, ningir tser.

²⁴ Nahan a kaa a mo er: Angan ka ajiir a jiir kwagh, henpe mbaerentom u iyou vea jiir nagh ku ior yô.