Esekiel 45 - ICIGHAN BIBILO

¹ Man shi zum u né kar tar sha ishor i eren sha ci u dyako yô, pande nen tar la tsegha nen sha ci u TER, u̱ lu icighantiôntar; ilihen i u i̱ lu aseva dubu ikundu kar utaan man igbanger i u i̱ lu aseva dubu ikundu; ua hingir icighankwagh zan zan ikighir i u jimin cii.

² Á tôndo tiôn ker sha ci u icighanjiir, ken vegher ne aseva deri utaan, man vegher la kpaa aseva deri utaan a̱ lu akuku ningir tser; shi i̱ gbihi ian aseva akunduahargber ken won ningir tser.

³ Man sha tar u i kar la, shi gbihi ian ilihen dubu ikundu kar utaan man igbanger dubu pue; icighanjiir una lu ker, ka icighanjiir u hemban je la;

⁴ ka icighantiôntar je la; una lu sha ci u upristi, ka mbaerentom ken icighanjiir mba ve kporom sha u eren TER tom yô; una lu ijiir sha ci u uya vev, man ijiir i tseghan sha ci u icighanjiir la.

⁵ Man tiôn u a lihe aseva dubu ikundu kar utaan man a gbangese aseva dubu pue, una lu sha ci u Mbalevi, ka mbaerentom u ken iyou la, a̱ lu kwagh ve, sha ci u agar a vea tema kimi yô.

⁶ Sha ci u kwar u gar yô, ver nen igbanger aseva dubu utaan, man ilihen dubu ikundu kar utaan, hen kpe u icighannagh la; ua lu sha ci u ya u Iserael cii.

⁷ Man tiôn u tor yô, vegher u keen man vegher u keen u icighannagh, man u kwar u gar, hii hen icighannagh la, man sha ishigh ki kwar u gar, vegher u shin ityôtar yem shin vegher u ityôtar, man hen vegher u ityoughkitaregh yem vegher u sha ityoughkitaregh, ilihen na ia lu vough a kwar môm u ken ikwar igen la, hii shin ikighir i shin ityôtar zan zan za ar sha ikighir i sha ityoughkitaregh.

⁸ Veghertar la una lu kwagh na ken Iserael; nahan utor Av vea kera seer u kighir ior Av ga, kpa vea na ya u Iserael tar la sha mlu u ikwe ve.

⁹ Ter AÔNDO ngu kaan nahan er: I̱ kuma ne, ne utor mba Iserael; de nen ipila man mkighir, eren nen kwagh sha mimi man sha perapera; de nen u zendan ior Av, kape Ter AÔNDO A kaa ne.

¹⁰ Lu nen a uikaren mba mimi, efa u vough man bav u vough.

¹¹ Efa man bav ve̱ lu ikaren môm, i bav a̱ lu môm-ken-upue u homer; ka sha homer ikaren una lu vough ye.

¹² Man shekel yô, a̱ lu ugera ikundu; kohol ushekel ikundu man ushekel ikundu kar utaan man ushekel pue kar utaan, á lu ne mina.

¹³ Ka nagh ku kenden sha, ku né va na ne: môm ken ataratar u efa ken hanma homer u alakema, man môm ken ataratar u efa ken hanma homer u shair;

¹⁴ man mkurem ma i ver sha tindi, sha bav u mkure, ma lu môm ken pue u bav ken hanma kor, ka ubav pue je la, ka homer kpaa; gadia ubav pue ka homer môm;

¹⁵ man gumiyôngo môm ken hanma ikumuile i i lu deri uhar, u ken ajiir a hômon a Iserael, sha ci u nagh ku sha samuyia man nagh ku nanden man iniav mbi bem, sha u nan iwom sha ci ve, kape Ter AÔNDO A kaa ne.

¹⁶ Ior mba hen tar la cii ve̱ na nagh kun sha ci u tor u Iserael.

¹⁷ Tor yô, kwagh na ka u nan iniav mbi nanden man iniav mbi sha samuyia man iniav mbi man, sha uiniongo, man sha iwer i he, man sha ayange a memen, sha uiniongo mba i ver ken ya u Iserael cii; ka un una na nagh ku isholibo man nagh ku sha samuyia man nagh ku nanden man iniav mbi bem sha u nan iwom, sha ci u ya u Iserael ye.

¹⁸ Ter AÔNDO ngu kaan nahan er: Sha uwer u hiihii sha iyange i hiihii i uwer la, tôô gumbua u lun a ihogholough iyol ga, wanger icighanjiir.

¹⁹ Pristi a̱ pande awambe a nagh ku isholibo, a̱ shighe sha ambusu a ihinda a iyou la, man sha azongo a anyiin a gbor u atsegh man sha ambusu a hunda u tembe u kimi la.

²⁰ Kape ú er sha iyange i sha utaankaruhar i uwer la, sha ci u hanma or u nan er isholibo abu man sha mlan yô; ka nahan man né na iwom sha ci u iyou la ye.

²¹ Sha uwer u hiihii, ayange a u pue kar anyiin la, né er iniongo i Paseka, iniongo i ayange ataankarahar la, á ya bredi u i we kwa sha min ga yô.

²² Sha iyange la tor una na nombua sha ci u nagh ku isholibo sha ci na iyol na man sha ci u ior mba ken tar la cii.

²³ Ayange a ataankarahar la cii una na TER nagh ku nanden sha anomabua ataankarahar man anomaiyôngo ataankarahar a a lu a ihogholough iyol ga yô, ayange ayange, sha ayange a ataankarahar la cii, man kpev môm kpaa hanma iyange sha ci u nagh ku isholibo.

²⁴ Shi una na nagh ku sha samuyia, efa môm sha ci u hanma nombua, man efa môm sha ci u hanma nomiyôngo, man hin u mkure môm sha hanma efa.

²⁵ Sha uwer u sha utaankaruhar, ayange a u pue kar ataan sha iniongo la kpaa, una na nagh nahan vough, ayange ataankarahar la cii; nagh ku isholibo man nagh ku nanden man nagh ku sha samuyia, man mkurem di nahan vough.