Esekiel 44 - ICIGHAN BIBILO

¹ Tsô a hide a mo hen hunda u ken won u icighanjiir u u ver ishigh vegher u sha ityoughkitaregh la; u lu vingir.

² TER kaa a mo er: Hunda ngun u̱ lu vingir, á bugh u ga, ma or nana nyôr hen u ga, gadia TER, Aôndo u Iserael, nyôr hen u, sha ci u nahan yô, u̱ lu vingir.

³ Tor yô, una tema kimi sha ci u a lu tor yô, sha u yan kwaghyan sha ishigh ki TER; ka sha gbenda u puadwer la, una nyôron, shi ka sha u, una duen kpaa ye.

⁴ Tsô a za a mo hen hunda u u lu vegher u shin imbusutarimese sha ishigh ki iyou la, m kenger yô, nenge, iengem i TER mgbough ken iyou i TER; nahan m gba m kuma ishigh inya.

⁵ Tsô TER kaa a mo er: Wan u or, ver ishima dedoo, kenger sha ashe ou man ungwa sha ato ou, akaa a Me kaa u cii, sha akaaôron a jirigh a sha iyou i TER cii man atindi a i cii; ver ishima dedoo sha mnyer u ken iyou man sha hanma gbenda u duen hen icighanjiir kpaa.

⁶ Kaa a mbahendan kwagh mban, ka ya u Iserael je la, wer: Ne ya u Iserael, aeren a en a ndôhôrshima cii a kuma, kape Ter AÔNDO A kaa ne;

⁷ sha ci u ne nyer a atôatyev a a tsenge ken asema ga, man shi sha mlu u iyolough kpaa a tsenge ga yô, ner, a̱ tema ken icighanjiir Wam, a̱ hôngor a iyou Yam, zum u ne va a kwaghyan Wam, ahôm man awambe la, sha u a̱ vihi ikuryan Yam, seer sha aeren a ou a ndôhôrshima la cii.

⁸ Ne kera wa iko sha tom u sha akaa Am a tseghan la ga; kpa ne gema ne ver atôatyev sha u a̱ eren Mo tom ken icighanjiir Wam.

⁹ Ter AÔNDO ngu kaan nahan er: Ma or u ityôtyev u nan tsenge ken ishima ga, man sha mlu u iyolough kpaa nan tsenge ga, u ken atôatyev cii, a a lu ken Mbaiserael la, nana nyôr ken icighanjiir Wam ga.

¹⁰ Kpa Mbalevi mba ve undum ve yem ca, zum u Iserael kaha la, mba ve undum sha u dondo akombo a ve la, vea ya mtsaha sha ifer ve la.

¹¹ Vea lu mbatomov ken icighanjiir Wam, vea kuran ihinda i iyou, vea eren tom ken iyou; vea wuan nagh ku nanden, man nagh ku sôngon sha ci u ior, vea tile sha ishigh ki iorov, vea eren tom.

¹² Sha ci u ve lu eren ve tom sha ishigh ki akombo ve man ve hingir ya u Iserael ityôikaa i nôngon gbev sha ifer; nahan M bum sha kwagh ve, kape Ter AÔNDO A kaa ne, Mer, vea ya mtsaha u sha ifer ve la.

¹³ Vea kera kporom hen a Mo sha u eren Mo tom u pristi ga, man shi vea kera kporom hen akaa a tseghan a Am ga, ka akaa a i hembe tseghan a je la, kpa vea ya kunya ve, sha aeren a ve a ndôhôrshima a ve er yô.

¹⁴ Nahan M ver ve mer ve̱ nengen sha iyou, ve̱ eren tom u i cii, man akaa cii a á va gba u eren ken i yô.

¹⁵ Kpa Mbalevi mba ve lu upristi, ônov mba Sadoki, mba ve lu eren tom ken icighanjiir Wam, zum u Mbaiserael ve kaha ve undum la, ka ve vea kporom her a Mo sha u eren Mo tom man vea tile sha ishigh Yagh sha u nan Mo nagh sha ahôm man awambe, kape Ter AÔNDO A kaa ne;

¹⁶ ka ve vea nyôr ken icighanjiir Wam man ka ve vea kporom hen tebul Wam, sha u eren Mo tom, man u veren ishima sha tom Wam.

¹⁷ Zum u vea nyôr hen ihinda i tembe u ken atô la, vea haa akondo a pupuu; kwagh u sha ul a̱ de lu sha ayol a ve, shighe u ve eren tom ken ihinda i tembe u ken atô, man ken iyou la kpaa ga.

¹⁸ Ve̱ kange atsar a sha ikondo i pupuu sha ityouv vev man ve̱ huwa afo a sha ikondo i pupuu shin iwenge; ve̱ de zeren kwagh u una na iusa ia due ve ga.

¹⁹ Zum u vea due u zan ken tembe u ken won, ken tembe u ken won hen ior yô, ve̱ er akondo a ve a eren tom a mi la, ve̱ ver a ken ukparmbaayoughouv mba icighanjiir la, ve̱ haa akondo agen, sha u ve̱ de gem ior ve̱ hingir uicighanmbaiorov sha akondo a ve la ga.

²⁰ Ve̱ de kera gbongor ityouv vev ga, man shi ve̱ de kera rumun ice ve i̱ lihen ga, ve̱ tôndo a tôndo ice i sha ityouv vev tsô.

²¹ Ma pristi a̱ de me wain zum u una lu nyôron ken tembe u ken atô la ga.

²² Man shi ve̱ de eren kwasecôghol ga, shin kwase u i pav a nan kpaa ga; kpa i̱ lu anuunaukase a megh megh a ken tsombor u ya u Iserael, shin kwasecôghol u nan lu kwasecôghol u ma pristi yô.

²³ Ve̱ tese ior Av mkposo u icighankwagh a kwagh u i tsegh un ga yô, man ve̱ na ve sha u paven kwagh u a lu wang ga kposo a kwagh u wang.

²⁴ Sha kwagh u ayôôso yô, ve̱ lu mbaôron ijir, ve̱ kure ijir sha akaaôron a jirigh a Am; ve̱ waan atindi a Am man akaawan a Am iko ken uiniongo mba M ver la cii, man ve̱ tseghan ayange a memen a Am.

²⁵ Ve̱ de ze henpe ikomor i lu sha u vea hôngor ayol a ve ga; saa sha ter shin sha ngô, shin sha wan u nomso, shin u kwase, shin sha anngô u nomso shin u kwase u a vande eren nom ga, vea fatyô u hôngor ayol a ve.

²⁶ Ken masetyô u i wanger nan yô, i̱ ôr ayange ataankarahar sha ci u nan.

²⁷ Sha iyange i nana nyôr ken icighanjiir, ken tembe u ken atô la, nana̱ na nagh ku isholibo ku nan, kape Ter AÔNDO A kaa ne.

²⁸ Dyako ve yô, ka Mo M lu dyako ve ye; nea na ve ma kwar ken Iserael ga, ka Mo M lu kwar ve ye.

²⁹ Ve̱ yaan nagh ku sha samuyia man nagh ku isholibo man nagh ku iboogh; man hanma kwagh u i tswer Iserael cii una hingir u ve.

³⁰ Iyiav mbi hemban doon mbi tsutswav cii mbi hanma kwagh, man hanma nagh ku kenden sha ku iniav yenev mbi kenden sha cii, mbia hingir mbi upristi; man shi mwem enem ma geran ma hemban doon kpaa, na nen upristi sha u iveren i̱ lu sha ya wou.

³¹ Ma kwagh u a gbe kpen tsô, shin u i ande un a ande, shin á lu inyon, shin zendenya kpaa, upristi ve̱ de ye ga.