Esekiel 43 - ICIGHAN BIBILO

¹ Tsô ken masetyô ne yô, a va a mo hen hunda, ka hunda u u ver ishigh vegher u sha ityoughkitaregh la.

² Yô, nenge, iengem i Aôndo u Iserael za va vegher u sha ityoughkitaregh; ihuran lu er ka ihuran i mngerem ma vesen nahan, tar wanger sha iengem Na la.

³ Mpase u m nenge mi lu er mpase u m vande nengen mi zum u A va sha u va timin gar yô; man shi lu er mbampase mba m nenge a mi hen ifi u Cebar; tsô M gba m kuma ishigh inya.

⁴ Iengem i TER nyôr ken iyou sha hunda u u ver ishigh vegher u sha ityoughkitaregh la.

⁵ Tsô Jijingi kendem sha, va a mo ken tembe u ker atô; yô, nenge, iengem i TER iv ken iyou.

⁶ M ungwa A lu ôron kwagh a mo ken tempel er orgen gema tile a mo yô.

⁷ A kaa a mo er: Wan u or, ka ijiir i ikônough Yagh ki torough je ne, man ijiir i tan angahar Am, henpe Me tema hen atô u ônov mba Iserael gbem sha won yô; ya u Iserael vea kera seer u hôngor a iti Yam i tseghan ga, shin ve, shin utor vev kpaa ga, sha idya ve man sha akom a utor vev zum u ve kpe la;

⁸ gadia ve wa kpandehunda ve, dondo sha kpandehunda wam, man imbusuhunda ve kpaa dondo sha imbusuhunda Yam, saa di kpekpe tsô lu hen atô Wam a ve ye; ve hôngor a icighanti Wam sha akaa a ndôhôrshima a ve, a ve er la, nahan M tim ve kera sha iyugh Yam.

⁹ Ahegen yô, vea kar a idya ve man akom a utor vev kera ca a Mo; Mo kpaa Me tema ken atô ve gbem sha won.

¹⁰ We wan u or, pase ya u Iserael kwagh u tempel, sha u ve̱ va ahenge sha aferakaa a ve; ve̱ kar ikaren i mlu na la.

¹¹ Aluer vea va ahenge sha kwagh u ve er cii yô, tese ve mlu u tempel, man m-er u i er un, man ajiir a duen man ajiir a na a nyôron man mlu na cii, man akaa a wan a na cii, mlu na, man atindi na cii; nger a sha ashe ve, sha u ve̱ waan mlu na cii man akaa a wan a na cii iko, ve̱ eren sha mi.

¹² Ka tindi u tempel ne: sha ityough ki uwoogh, iningirtar la cii, ningir tser, ia lu icighankwagh u i hembe tseghan un yô. Yô, nenge, ka tindi u tempel je ne.

¹³ Ka uikaren mba sha aseva mba atse a nanden nagh ne (ishiva la, ka ishiva man igbangese i ikevwe): Ityô i a tav ishiva i môm, igbanger i a lu ishiva môm, man akur a a kuma ishiva i abe môm, ningir tser; ka imagh i atsegh je ne.

¹⁴ Hii hen ityô i a shin inya zan zan za ar hen gbor u shin lu aseva ahar, igbanger na ishiva i môm; hii hen gbor u kiriki zan zan za ar hen gbor u vesen la, lu aseva anyiin, igbanger na ishiva i môm.

¹⁵ Ikegher i a lu aseva anyiin; hii hen ikegher kôndo sha, akor lu anyiin.

¹⁶ Ikegher i atse la lihe aseva pue kar ahar, i gbangese aseva pue kar ahar, lu akuku.

¹⁷ Ilihen i gbor i lu aseva pue kar anyiin, igbanger na kpaa lu aseva pue kar anyiin, lu akuku; kur na u u ningir tser la, lu tiônshiva, ityô na lu ishiva môm ningir tser; agbur a unden a a la, ver ishigh vegher u sha ityoughkitaregh.

¹⁸ A kaa a mo er: Wan u or, Ter AÔNDO ngu kaan nahan er: Ka atindi a á wa sha kwagh u atse ne sha iyange i á er a la, sha u nan nagh ku nanden sha a man sha u haan awambe sha a kpaa.

¹⁹ Na Mbalevi mba ve lu upristi mba ken tsombor u Sadoki, mba ve kporom her a Mo, sha u eren Mo tom la, na ve gumbua sha ci u nagh ku isholibo, kape Ter AÔNDO A kaa ne.

²⁰ Pande awambe a na, felegh sha akor a anyiin la, man sha azongo a anyiin a gbor la, man sha kur la ningir tser; kape ú wanger a, man ú na iwom sha ci u a la.

²¹ Nahan tôô gumbua u nagh ku isholibo la, i̱ nande un sha ijiir i iyou la, i i vande veren i la, ken akôngo a icighanjiir.

²² Iyange i sha uhar la, va a kpev u a lu a ihogholough iyol ga yô, sha ci u nagh ku isholibo, wanger atse, er i vande wanger a sha gumbua la nahan.

²³ Zum u ú wanger a ú bee yô, ú na gumbua u a lu a ihogholough iyol ga yô, man nomiyôngo môm u ken ikumuile, u a lu a ihogholough iyol ga yô.

²⁴ Va ver ve sha ishigh ki TER, upristi ve̱ haa bar sha a ve, ve̱ na TER nagh ku nanden sha mi.

²⁵ Ayange ataankarahar cii, ú sôr ivo i môm sha hanma iyange sha ci u nagh ku isholibo, shi ve̱ sôr gumbua man nomiyôngo môm u ken ikumuile, ve uhar cii ve̱ de lu a ihogholough iyol ga.

²⁶ Ayange ataankarahar cii, ve̱ na iwom sha ci u atse la, ve̱ wanger a, ve̱ tsegha a.

²⁷ Zum u vea iv ayange la yô, hii sha iyange i anigheni la yem ken hemen ve upristi ve̱ naan iniav yenev mbi nanden sha atse la, man iniav yenev mbi bem, man Me rumun ne, kape Ter AÔNDO A kaa ne.