Esekiel 42 - ICIGHAN BIBILO

¹ Tsô a va a a mo ken tembe u ken won sha gbenda u shin imbusutarimese la; a va a mo hen ayou a a ver ishigh hen huwa man a a ver ishigh hen iyou kpaa, vegher u ken imbusutarimese la,

² lihe aseva deri hen hunda u shin imbusutarimese la; igbanger lu aseva akunduahargber.

³ Sha ishigh ki aseva ikundu a ken tembe u ken atô la, man sha ishigh ki tembe u i wa u sha awen u ken tembe u ken won la, galeri ver ishigh sha galeri ukpo utar.

⁴ Sha ishigh ki ayou la gbenda lu, u ver ishigh ker atô, u gbangese aseva pue, u lihe aseva deri; ihinda i a ver ishigh ken imbusutarimese.

⁵ Ayou a sha kpo u masen sha la hemba ndahar, sha ci u ugaleri mbala hemba yisan ian sha kpo u masen sha la a kpo u hen atô man u shin inya la.

⁶ Gadia a lu ukpo utar, kpa a lu a a mtôm er mtôm ma sha ityembe la nahan ga; ka nahan man a sha la hemba ndahar a a shin inya man a her atô la.

⁷ Kpekpe lu ayou la ken won jighilii, ken vegher u tembe u ken won, sha ishigh ki ayou la, ilihen na lu aseva akunduahargber.

⁸ Gadia ilihen i ayou a a lu vegher u ken tembe u ken won la, lu aseva akunduahargber; kpa a sha ishigh ki tempel la lu aseva deri.

⁹ Ayou ne vegher u shin, ijiir i nyôron lu vegher u sha ityoughkitaregh la, aluer or nana kar sha tembe u ken won la, nana nyôr ken a yô.

¹⁰ Ken mcivir u kpekpe u tembe ken vegher u imbusutariyan sha ishigh ki huwa man sha ishigh ki iyou la kpaa ayou lu.

¹¹ Gbenda lu sha ishigh ki a; mlu u a lu inja môm a ayou a a lu ken vegher u imbusutarimese la, ilihen i a man igbanger i a kpaa lu kwagh môm; igbenda i duen i a, man m-er u i er a lu kwagh môm. Er igbenda i a, i nyôron la i lu la,

¹² kape igbenda i nyôron i ayou a a ver ishigh ken imbusutariyan kpaa i lu la: hunda lu sha mkur u gbenda, ka gbenda u u lu nôô sha ishigh ki kpekpe ken vegher u sha ityoughkitaregh je la, aluer or nana nyôron hen a yô.

¹³ Tsô a kaa a mo er: Ayou a shin imbusutarimese man ayou a sha imbusutariyan, a a lu sha ishigh ki huwa la, ka ayou a tseghan henpe upristi mba ve mgbôghom a TER vea yaan uicighanmbaakaav mba i hembe tseghan ve la; ka heregh vea veren uicighanmbaakaav mba i hembe tseghan ve la, man nagh ku sha samuyia, man nagh ku isholibo, man nagh ku iboogh ye, gadia ka icighanjiir je.

¹⁴ Zum u upristi vea nyôr kimi yô, ve̱ de kera duen hen icighanjiir ve̱ zaan hen tembe u ken won la ga, kpa ka her, vea veren akondo a ve, a ve er tom a mi la, gadia ka a tseghan je; vea haa akondo agen man vea kporom hen ijiir i i lu sha ci u ior mbagenev.

¹⁵ Tsô zum u a kar iyou i kimi bee yô, a due a mo hen gbenda u hunda u u ver ishigh sha vegher u sha ityoughkitaregh la, a kar a ningir a tser.

¹⁶ A kar vegher u sha ityoughkitaregh sha ikaren i iyiagh, aseva deri utaan, sha ikaren i iyiagh, ningir tser.

¹⁷ A kar vegher u ken imbusutarimese, aseva deri utaan, sha ikaren i iyiagh, ningir tser.

¹⁸ A kar vegher u ken imbusutariyan aseva deri utaan, sha ikaren i iyiagh.

¹⁹ A gema vegher u shin ityôtar, a kar aseva deri utaan sha ikaren i iyiagh.

²⁰ A kar un avegher anyiin; a lu a kpekpe, ningir tser, ilihen deri utaan, man igbanger di deri utaan, sha u paven kwagh u tseghan kposo a kwagh u i tsegh ga yô.