Esekiel 41 - ICIGHAN BIBILO

¹ A va a mo ken kpar u vesen, a kar ambusu a hunda, igbanger aseva ataratar hen vegher ne, man igbanger aseva ataratar ken ngula ka igbanger i tabernakel je la.

² Igbanger i ijiir i nyôron lu aseva pue; ukpekpe mba hen ijiir i nyôron lu aseva ataan keen man shi aseva ataan keen; a kar ilihen na lu aseva akunduahar man igbanger na aseva ikundu.

³ Nahan a nyôr kpar u ken atô, a kar imbusu i ijiir i nyôron la, lu aseva ahar; man ijiir i nyôron yô, lu aseva ataratar; igbanger i hen kpe u ijiir i nyôron la, lu aseva ataankarahar.

⁴ A kar ilihen na, lu aseva ikundu, man igbanger na kpaa lu aseva ikundu sha ishigh ki kpar u vesen la; a kaa a mo er: Ngun ka icighankpar u hemban je ne.

⁵ Nahan a kar kpekpe u iyou, lu aseva ataratar; man igbanger i ayou a ken akpe lu aseva anyiin, ningir iyou hanma vegher tser.

⁶ Ayou a ken kpe la, lu ukpo utar, igen sha igen, a lu ikundugber sha hanma nongo; i wa ugbor sha kpekpeyou sha ci u maan ayou a ken kpe la sha mi, ningir tser, sha u suur a sha mi, sha u a̱ de suur ken kpekpe u iyou la ga.

⁷ Ayou a a kase ken akpe la hanma kpo u sha ugen seer igbanger, gadia m-maa u kpekpeyou ken won la sondough yem sha, ningir iyou tser; ka nahan man igbanger i iyou lu seer a seer kôndon sha ye; or nana duen hen iyou i shin u yemen sha i mase sha la yô, nan kar ken i hen atô la.

⁸ M shi m nenge iyou lu a tsembe ningir tser; amagh a ayou a ken akpe la tav kuma iyiagh ki jimin, lu aseva ataratar zan zan za ar hen ijuwan la.

⁹ Mcivir u kpekpe u ken won u ayou a ken akpe la, lu aseva ataan; tsembe u iyou u a due ken inya di kpaa lu nahan.

¹⁰ Harga u hen atô u ayou a ken akpe la man ayou a sha tembe gbangese aseva ikundu, ningir iyou tser hanma vegher.

¹¹ Ihinda i ayou a ken akpe la ver ishigh hen tsembe u iyou u a due ken inya la, hunda môm ver ishigh shin imbusutarimese, hunda ugen di ver ishigh sha imbusutariyan; igbanger i tsembe u iyou u a due ken inya la lu aseva ataan ningir tser.

¹² Iyou i i ver ishigh sha tembe u u lu vegher u shin ityôtar la, gbangese aseva akunduatargber; kpekpe u i la civir aseva ataan, ningir tser, man ilihen i i lu aseva akunduanyiingber.

¹³ Nahan a kar iyou, ilihen i i lu aseva deri; man tembe la man iyou kua ukpekpe mba i, lihe aseva deri;

¹⁴ man igbanger i ishigh ki iyou kpaa man shi tembe u u ver ishigh vegher u sha ityoughkitaregh la kpaa, lu aseva deri.

¹⁵ A kar ilihen i iyou i i lu sha ishigh ki tembe ken ijime i u la, ukpombaayoughouv man ugaleri mba i, vegher u keen man u keen kpaa, lu aseva deri; man ker atô u tempel man upuadwer mba sha tembe kpaa,

¹⁶ man ikpandeihinda i shin, man uwindou mba lun ahura ahura, man ugaleri mba ve ningir ve tser la cii— sha ishigh ki kpandehunda u shin, i cir ikon ningir tser— hii shin inya zan zan za ar sha uwindou (uwindou yô, i cir ve),

¹⁷ man sha ian i hunda vegher u sha zan zan ken iyou i ker atô je, man ken won kpaa, man kpekpe cii, ningir tser, kimi man ken won kpaa, i kar a kar cii.

¹⁸ I er ucerubi man atineavilegh sha mi, itinevilegh lu her haregh u cerubi a cerubi, hanma cerubi lu a ishiv ihiar;

¹⁹ ishigh ki orough ver ishigh sha itinevilegh vegher u keen, man ishigh ki gumbegha ver di ishigh sha itinevilegh vegher ken; kape i er ken iyou cii ningir tser la.

²⁰ Hii shin inya zan zan za ar sha hunda vegher u sha, i er ucerubi man atineavilegh sha kpekpe u tempel.

²¹ Sha kwagh u tempel yô, ikpandehunda lu akuku; ishigh ki icighankpar la, lu inja môm a tempel.

²² Atse a nanden nagh sha mi la, i er a sha ikon, ityaven i a lu aseva atar, man ilihen i a lu aseva ahar; azongo a a, man ityô i a, man ambusu a a, lu sha ikon cii. Tsô a kaa a mo er: Ngun ka tebul u a lu sha ishigh ki TER yô.

²³ Tempel kua icighankpar lu a ucivir uhar uhar.

²⁴ Ucivir la lu akpaar ahar, akpaar ahar a geman; akpaar ahar sha hunda môm, man akpaar ahar di sha ugen.

²⁵ Sha ucivir mba tempel la, i er ucerubi man atineavilegh, er i er sha ukpekpe nahan; man i zor haav mbu sha ikon sha ishigh ki puadwer ken won.

²⁶ Man uwindou mba lun ahura ahura man atineavilegh lu sha ukpekpe mba puadwer vegher u keen man shi vegher u keen kpaa; kua sha ayou a ken akpe man ihaav mbi i zor a zor mbi la.