Esekiel 4 - ICIGHAN BIBILO

¹ We wan u or, tôô ikamegh, ver sha ishigh you, kpela foto u gar sha mi, ka Yerusalem je;

² kase un sha utya, maa ayouautya a taver, ta atihi a inyaagh, haa un afo kpaa, man ver akeke a hemben kpekpegar, a̱ kase un a̱ tser.

³ Man shi tôô gbandeiyô, ver un a̱ hingir kpekpe u iyôô her atô wou a gar; man ver ishigh sha mi, kase un sha utya, gema ta num sha a na, i̱ hingir ya u Iserael ikav.

⁴ We yô, yav ken ihan you i imese, gema iferkwagh i ya u Iserael penda sha mi, iyenge i ayange a u yav sha mi la, ú tôô iferkwagh ve.

⁵ Gadia m ver u iyenge i anyom a iferkwagh ve sha iyenge i ayangegh, ka ayange deri utar man akunduanyiingber; kape ú tôô iferkwagh i ya u Iserael je la.

⁶ Man shi zum u ú bee ayange angan yô, yav ken ihan you i yan, tôô iferkwagh i ya u Yuda kpaa; M ver u ayange akunduahar, iyange i môm sha ci u inyom i môm.

⁷ Ver ishigh kenger Yerusalem u i kase un la, bugh ikondo sha uwe kera, man ôr kwaghôron u profeti sha a na kpaa.

⁸ Nenge, m ta u ikor, sha u ú kera gema ú yav ken ihan igen ga yô, zan zan ú bee ayange a i kase u sha utya ne.

⁹ Shi tôô alakema man shair man alev man alev a kiriki man amine man agase, wa ve shin ityegh i môm, er bredi a mi sha ci wou; iyenge i ayange a ou a u yav ken ihan you la, ayange deri utar man akunduanyiingber, una lu kwaghyan wou.

¹⁰ Kwaghyan u ú ya yô, á kar u myohom á kuma ushekel ikundu sha hanma iyange, ú yaan un sha shighe u i ver yô.

¹¹ Mngerem kpaa ú ma sha ikaren ma ma kom môm ken ataratar u hin (painti môm man tiôn); ú maan sha shighe u i ver yô.

¹² Yaan un er ka umasa mba i er sha shair nahan, kaa un sha usu u sha akôngo a or sha ashe ve.

¹³ TER gema kaa er: Kape Mbaiserael vea ya kwaghyan ve u a lu wang ga, ken akuraior, henpe Me zenda ve vea yem la.

¹⁴ Tsô m kaa mer: Uwu, Tere, AÔNDO! Nenge, m ngu a vande hôngor ga; gadia hii er m lu iyev la je zan zan hegen m ngu a vande yan kwagh u a gbe kpen ga, shin u inyam i kume i ande un kpaa ga, man inyam i ndôhôr ishima kpaa ngi a nyôrom ken zwa ga.

¹⁵ Nahan A kaa a mo er: Nenge, M na u akôngo a bua sha ityough ki akôngo a or, kaa kwaghyan wou sha usu u a.

¹⁶ Man shi A kaa a mo er: Wan u or, nenge, Me vihi kwaghyan u ve suur sha mi la kera, ken Yerusalem; vea kar myohom ma kwaghyan, vea ya un a ishima i nyian, man vea kar mngerem sha ikaren, vea ma a mciem;

¹⁷ sha ci u kwaghyan man mngerem á ban ve, man á kpiligh ve iyol hanma or a orgen, man vea use ken iferkwagh ve.