Esekiel 34 - ICIGHAN BIBILO

¹ Kwaghôron u TER va her a mo, er:

² Wan u or, ôr kwaghôron u profeti sha mbakuran mba Iserael, ôr kwaghôron u profeti, kaa a ve, ka mbakuran je la, wer: Ter AÔNDO ngu kaan nahan er: Kwagh á tser mbakuran mba Iserael mba ve koson ayol a ve la! Kera ka iyôngo man mbakuran ve koson i gaa?

³ Ne mba ye ahôm a i, man ne mba hee akondo a sha aive a i, ne mba woo i i kehen dindim dindim; kpa iyôngo yô, ne mba koson i ga.

⁴ I zunen la, ne taver i ga, i uange la ne sôr i ga, i i kever la, ne kange i ga, i i tsum la, ne hide a i ga, man i i saa la kpaa, ne ker i ga; kpa ka sha agee man sha ipila ne tem tor sha i ye.

⁵ Nahan i sambe kera, sha ci u orkuran lu ga yô, i gema i hingir kwaghyan u inyamtoho cii, maa i sambe kera.

⁶ Iyôngo Yam lu zenden kughukuku sha iwo cii, man sha hanma igungu u taven; een, i sambe iyôngo Yam sha tar wuee, man ma or u keren shin u tôvon i lu ga.

⁷ Nahan yô, ne mbakuran, ungwa nen kwaghôron u TER:

⁸ Ter AÔNDO ngu kaan nahan er: Er M lu u uma ne, mimi je, sha ci u iyôngo Yam i hingir ishar yô, man iyôngo Yam hingir kwaghyan u inyamtoho cii, sha ci u orkuran nan lu ga, man mbakuranilev Av kpaa ker iyôngo Yam ga, kpa mbakuranilev koso ayol a ve, ve koso iyôngo Yam ga,

⁹ sha ci u nahan yô, ne mbakuranilev, ungwa nen kwaghôron u TER:

¹⁰ Ter AÔNDO ngu kaan nahan er: Nenge, M ngu num a mbakuranilev; Me ker iyôngo Yam hen a ve, Me kera rumun Mer ve̱ lu mbakosoniyôngo ga; mbakuranilev kpaa vea kera koso ayol a ve ga; Me yima iyôngo Yam sha zwa ve, sha u i̱ de kera luun kwaghyan ve ga yô.

¹¹ Gadia Ter AÔNDO ngu kaan nahan er: Nenge, Mo iyol Yam, Me ker iyôngo Yam man Me tôv i hwange.

¹² Er orkuranilev ka nan tôv ikumile i nan sha iyange i nan lu ker atô u iyôngo i nan i i sambe i wue wue la, kape Mo kpaa Me tôv iyôngo Yam; Me yima i ken ajiir a i sambe i la cii, sha iyange i abeen man angôghime la.

¹³ Me due a ve ken akuraior, me kohol ve ken ityar i sha won, Me va a ve ken tar ve jim; Me koso ve sha iwo i Iserael, hen iwagh man ken ajiir a ior ve tem ken tar la cii.

¹⁴ Me koso ve hen ijiir i toho u doo her yô; vea zenden vea yaan toho sha ugôgômbaiwoov mba Iserael; ka heera vea yav hen ijiir i dedoo ye, man hen ijiir i toho u lu gese gese yô, vea yaan kwagh sha iwo i Iserael.

¹⁵ Mo iyol Yam Me koso iyôngo Yam, man Me na ia yav inya, kape Ter AÔNDO A kaa ne.

¹⁶ Me ker kwagh u a saa yô, man Me hide a kwagh u a tsum kera la, man Me kange kwagh ua kever yô, man Me taver kwagh u a gbe angev yô; kpa kwagh u gban ikôr man u taver la, Me tim un kera; Me koso ve sha gbenda vough.

¹⁷ We ikumuile Yam yô, kape Ter AÔNDO A kaa ne: Nenge, Me ôr ijir her atô u iyôngo a iyôngo man her atô u anomaiyôngo a ukpev.

¹⁸ Er ne ye gwergwe u dedoo nahan, kuma ne gaa, ne shi ne ndyar kwagh u a shi la sha angahar a ene?

¹⁹ Nahan iyôngo Yam i̱ ya kwagh u ne ndyar angahar a en sha mi, man i̱ ma kwagh u ne hundu sha angahar a en shinii?

²⁰ Nahan yô, Ter AÔNDO ngu kaan a ve nahan er: Nenge, Mo iyol Yam, Me ôr ijir her atô u iyôngo i kehen a i kanden.

²¹ Sha ci u ne mgbegha i aseer la sha imbusu man sha vandegh, man ne tume ve ikor, ne sambe ve wue wue,

²² sha ci u nahan yô, Me yima ikumuile Yam man ia kera lu ishar ga; man Me ôr ijir her atô u iyôngo a iyôngo.

²³ Me ver orkuran môm sha a ve, nana koson ve, ka wanakiriki Wam Davidi je la, ka un una koson ve shi ka un kpaa una hingir orkuran ve ye.

²⁴ Mo TER Me hingir Aôndo ve, man wanakiriki Wam, Davidi, una tema tor sha a ve; ka Mo TER M kaa nahan ye.

²⁵ Me ya ikur i bem a ve, Me er inyamtoho i vihin kwagh ia due hen tar la kera, man vea tema bem bem ken taaikôngo, man vea yav shin ikô kpaa.

²⁶ Me gema ve kua ajiir a a kase sha igungu Wam la, aa hingir iveren i dedoo; Me na ikumenura ua nôô sha shighe na; á lu ikumenura u haan iveren.

²⁷ Ikon i ken ikôngo ia ume atam, man tar kpaa ua doo iyiagh, vea tema bem bem ken tar ve; nahan vea fa er Mo M lu TER ye, zum u Me kever amande a igbur ve la, man Me yima ve sha ikev i mba ve ker ve, ve hingir ikpan la.

²⁸ Vea kera lu ishar i akuraior ga, man inyamtoho kpaa ia kera ya ve ga, kpa vea tema bem bem, ma or nana kera ta ve mciem iyol ga.

²⁹ Me na iyiav mbia doo ve je, mbia za gwa, ijen ia kera tim ve ken tar ve kera ga, man vea kera ya kunya hen akuraior kpaa ga.

³⁰ Nahan vea fa er Mo TER, Aôndo ve, M lu a ve imôngo, man ve, ya u Iserael kpaa ve lu ior Av yô, kape Ter AÔNDO A kaa ne.

³¹ Ne iyôngo Yam, iyôngo i M koson i, ne mba ior, man Mo yô, M ngu Aôndo wen, kape Ter AÔNDO A kaa ne.